ރާއްޖެ އިން ތަޖަކިސްތާންގެ މައްޗަށް ކުރި ހޯދައިފި

ކާވާ ފިރިހެން ވޮލީބޯޅަ ޗެމްޕިއަންޝިޕުގެ ލީގު ބުރުގައި ދިވެހި ރާއްޖެ އިން ކުޅުނު ފަހު މެޗުގައި ތަޖަކިސްތާންގެ މައްޗަށް ކުރި ހޯދައިފި އެވެ.

މުބާރާތުގައި ރާއްޖެ އިން ކުޅުނު ފުރަތަމަ މެޗުގައި ކިރްގިސްތާން އަތުން ސީދާ ތިން ސެޓުން ބަލިވި ނަމަވެސް، ދެ ވަނަ މެޗުގައި ތުރުކެމިނިސްތާން އަތުން ބަލިވީ ފަސް ސެޓު ކުޅެގެންނެވެ. ތިން ވަނަ މެޗުގައި އަފްޣާނިސްތާނާ ދެކޮޅަަށް ނިކުތްއިރު، އެ މެޗުން ރާއްޖެ ބަލިވީ ސީދާ ތިން ސެޓުންނެވެ. އަދި ހަތަރު ވަނަ މެޗުގައި މުބާރާތް ބާއްވާ ޤައުމު އުޒްބަކިސްތާން އަތުން ވެސް ރާއްޖެ ވަނީ ސީދާ ތިން ސެޓުން ބަލިވެފަ އެވެ.

ލީގު ބުރުގައި ރާއްޖޭގެ ފަހު މެޗުގައި ބުދަ ދުވަހު ތަޖަކިސްތާނާ ދެކޮޅަށް ކުޅުނު މެޗު ރާއްޖެ އިން ކާމިޔާބު ކުރީ ތިން ސެޓު އެއް ސެޓުންނެވެ. މިއީ މިއަހަރުގެ މުބާރާތުގައި ރާއްޖެ އަށް ހޯދުނު ފުރަތަމަ މޮޅެވެ.

މެޗު ފުރަތަމަ ސެޓު ފަށައިގެން ރާއްޖެ އިން ލީޑުގައި ކުޅެމުން ދިޔަ ނަމަވެސް، ދެ ފަހަރެއްގެ މަތިން ތަޖަކިސްތާނުން ވަނީ ނަތީޖާ ހަމަހަމަ ވެސް ކޮށްފަ އެވެ. ނަމަވެސް ސެޓުގެ ވަކި ހިސާބަކުން ލީޑު ނަގައި، ރާއްޖެ އިން ފުރަތަމަ ސެޓު ކާމިޔާބު ކުރީ 25-20ންނެވެ. ދެ ވަނަ ސެޓު ފަށައިގެން ވެސް ލީޑުގައި ކުޅެމުން ދިޔައީ ރާއްޖެ އިންނެވެ. ނަމަވެސް ސެޓުގެ މެދަކާ ހަމައިން ތަޖަކިސްތާނުން ވަނީ އެއްވަރުކޮށް، ލީޑު ވެސް ނަގައިފަ އެވެ. އެ ލީޑުގައި އޮވެ އެ ޓީމުން ދެ ވަނަ ސެޓު ކާމިޔާބު ކުރީ 20-25ންނެވެ.

ރާއްޖެ އިން ވަނީ ޖެހިގެން ކުޅުނު ދެ ސެޓު ވެސް ކާމިޔާބުކޮށް މެޗުން މޮޅުވެފަ އެވެ. ތިން ވަނަ ސެޓު ފަށައިގެން ތަޖަކިސްތާނުން ލީޑު ނެގި ނަމަވެސް، ރާއްޖެ އިން ވަނީ ވަކި ހިސާބަކުން ސެޓުގައި ކުރި ހޯދައިފަ އެވެ. ރާއްޖެ އިން ހޯދި ލީޑުގައި އޮވެ މި ސެޓު ކާމިޔާބު ކުރީ 25-23 އިންނެވެ. ފަހު ސެޓުގައި ވެސް ވާދަވެރި ކުޅުމެއް ފެނުނުއިރު، ސެޓުގެ ފަހު ވަގުތު ކުރި ހޯދައި ރާއްޖެ އިން ވަނީ 25-22ން ހަތަރު ވަނަ ސެޓު ކާމިޔާބުކޮށް މެޗުން މޮޅުވެފަ އެވެ.

މުބާރާތުގެ ލީގު ބުރުގެ މެޗުތައް ރާއްޖެ އަށް ނިމިފައިވާއިރު، ރާއްޖެ ދެން ކުޅެނީ ކްލެސިފިކޭޝަން މެޗުގައި ތަޖަކިސްތާނާ ދެކޮޅަށެވެ.