މޮޅު ހުރިހާ ކުޅުންތެރިން ގައުމީ ޓީމާ ގުޅިއްޖެ، ތަފާތުވާނެ: ވޮލީ އެސޯސިއޭޝަން
22 ފެބުރުއަރީ 2023 | ބުދަ 05:57މުބާރާތުގައި ރާއްޖެ ވާދަކުރާނީ މެލޭޝިޔާ އަދި ސިންގަޕޫރާއެކު
ގައުމީ އަންހެން ވޮލީޓީމް: މި ޓީމް ކުރިއަށްވުރެ މޮޅުވާނެ ކަމަށް އެސޯސިއޭޝަނުން ބުނޭ
ތަފާތު ސަބަބުތަކާހުރެ މީގެ ކުރިން ގައުމީ އަންހެން ވޮލީ ޓީމާ ދުރުގައި ތިބި ހުރިހާ ކުޅުންތެރިން އަލުން ގައުމީ ޓީމުން ޖާގަ ހޯދައިފި ކަމަށާއި ޓީމުގެ ފެންވަރު ތަފާތުވާނެ ކަމަށް ވޮލީބޯޅަ އެސޯސިއޭޝަނުން ބުނެފި އެވެ.
މާދަމާ ނޫން އަނެއް ދުވަހު ފަށާ ފޯނޭޝަންސް ކަޕުގެ އަންހެން ޑިވިޝަނަށް ތައްޔާރުވާ ޓީމާ ބެހޭ ގޮތުން އެސޯސިއޭޝަންގެ އެކްސްކޯ މެންބަރު ޝުއައިބް އަހުމަދު ރާއްޖެ ޓީވީގެ ކުޅިވަރު ފައިލް ޕްރޮގްރާމުގައި ވާހަކަ ދައްކަމުން ބުނީ މިފަހަރުގެ ޓީމުގައި ކޯޗަށް ވަރަށް ގިނަ އޮޕްޝަންސްތައް ހުންނާނެ ކަމަށެވެ.
އޭނާ އަދި ބުނީ މި އަހަރަކީ ގައުމީ ޓީމަށް ގިނަ މުބާރާތްތަކެއް ކުޅެންޖެހިފައިވާ އަހަރެއް ކަމަށާއި މިހެންވެ ފޯނޭޝަންސް ކަޕަކީ މި މުބާރާތްތަކަށް ތައްޔާރުވާން ވެސް ލިބޭ ރަނުގެ ފުރުސަތެއް ކަމަށެވެ.
ގައުމީ އަންހެން ޓީމު ފަރިތަކުރަމުންދަނީ ކުރީގެ އެއްވަން ވޮލީބޯޅަ ކުޅުންތެރިޔާ އިބްރާހީމް ނިޒާމުގެ ބެލުމުގެ ދަށުންނެވެ.
ފޯނޭޝަންސް ކަޕުގެ އަންހެން ޑިވިޝަނުގައި ވާދަކުރަނީ މެލޭޝިޔާ އާއި ސިންގަޕޫރާއި ރާއްޖެ އެވެ. ފައިނަލުން ފުރުސަތު ލިބޭނީ ލީގު އުސޫލުން ބުރެއް ކުޅުމަށްފަހު އެންމެ ޕޮއިންޓް ހޯދާ ޓީމަކަށާއި ދެ ވަނަ އަދި ތިންވަނަ ކުޅެގެން މޮޅުވާ ޓީމަކަށެވެ.
