ޖިމީ ކާޓަރ އަށް ދެން އިތުރު މެޑިކަލް "އިންޓަރވެންޝަން" ތައް ނުދޭނެ

އެމެރިކާގެ ކުރީގެ ރައީސް ޖިމީ ކާޓަރ އަށް ދެން އިތުރު މެޑިކަލް "އިންޓަރވެންޝަން" ތައް ދިނުމުގެ ބަދަލުގައި ބޭނުންފުޅުވާ "ހޮސްޕިސް ކެއާ" އާ އެކު އޮންނަވާނީ ގެކޮޅުގައި އާއިލާއާ އެކު ކަމަށް ކާޓަރ ސެންޓަރުން ބުނެފި އެވެ. މެޑިކަލް "އިންޓަރވެންޝަން" ދިނުމަކީ ދިމާވާ ކުއްލި ސިއްހީ މައްސަލަތަކުގައި ބޭސްވެރިކަމުގެ ގޮތުން ޑޮކްޓަރުން ދޭ އަވަސް ފަރުވާއެވެ.

ކާޓަރ އަށް އާއިލާ އާއި ޚާއްސަ މެޑިކަލް ޓީމުގެ ފުރިހަމަ ސަޕޯޓު ލިބިވަޑައިގަންނަވާކަމަށާއި މި މުހިންމު ދަނޑިވަޅުގައި އާއިލާ އަށް ބޭނުންވަނީ "ޕްރައިވަސީ" ކަމަށް ކާޓަރ ސެންޓަރުން ހޮނިހިރު ދުވަހު ނެރުނު ބަޔާނެއްގައި ބުނެފައި ވެއެވެ.

ޖިމީ ކާޓަރ އަށް ކާފަ ވިދާޅުވާ ޖޯޖިޔާގެ ކުރީގެ ސެނެޓަރެއް ކަމަށްވާ ޖޭސަން ކާޓަރ ވަނީ ކާފާފުޅުގެ ދެކަނބަލުން މިވަގުތު ތިއްބެވީ ހަމަޖެހިގެން އުފަލުގައި ކަމަށް ވިދާޅުވެފައެވެ. އަދި އެދެކަނބަލުންގެ ގެކޮޅަކީ އަބަދުވެސް ލޯތްބާއި އުފާވެރިކަމުން ފުރިގެންވާ ތަނެއްކަމަށް ވިދާޅުވެ ހެޔޮއެދޭ ހުރިހާ ފަރާތްތަކުން ފާޅުކުރަމުން ގެންދާ ހެޔޮއެދުމުގެ ޝުއޫރުތަކަށް ޖޭސަން ޝުކުރު އަދާ ކުރައްވާފައި ވެއެވެ.

ޖިމީ ކާޓަރ އާއި އަނބިކަނބަލުން ރޮސްލީން ވަނީ 2021 ގައި ކައިވެނިފުޅަށް 75 އަހަރު ފުރުން ފާހަގަ ކުރައްވާފައެވެ. އެދެކަނބަލުންނަށް ހަތަރު ބޭފުޅުން ލިބިވަޑައިގެންފައި ވެއެވެ.

ޖިމީ ކާޓަރ އަށް ވަނީ މިފަހުން ސިއްހީ އެތައް މައްސަލަތަކެއް ކުރިމަތިވެވަޑައިގެންފައެވެ. މިގޮތުން މެލަނޯމާ ކިޔާ ހަމުގެ ކެންސަރު ޖެހިވަޑައިގެން ބަލީގެ އަސަރު ލިވަރ އަދި ސިކުނޑި ހިމެނޭހެން ހަށިކޮޅުގެ އެހެން ބައެއް ގުނަވަންތަކަށް ވެސް ވަނީ ކޮށްފައެވެ.

އުމުރުފުޅުން 98 އަހަރުގެ ކާޓަރ އަކީ މިވަގުތު ދުނިޔޭގައި ހުންނެވި އެންމެ އުމުރުފުޅުން ދޮށީ ކުރީގެ ރައީސް އެވެ. ޑިމޮކްރެޓިކް ޕާޓީ އަށް ނިސްބަތްވެ ވަޑައިގަންނަވާ ކާޓަރ އެމެރިކާގެ ރައީސް ކަން ކުރެއްވީ އެއް ދައުރުގައެވެ. އެއީ 1977 އިން 1981 އަށެވެ. ދެވަނަ ދައުރަކަށް ކުރިމަތި ލެއްވި ނަމަވެސް އެފަހަރުގެ އިންތިޚާބު ކާމިޔާބުކުރެއްވީ ރޮނަލްޑް ރޭގަން އެވެ.

1924 ވަނަ އަހަރު ދުނިޔޭގެ އަލިކަން ދެކެވަޑައިގެންނެވި ޖިމީ ކާޓަރ ސިޔާސީ މައިދާނަށް ނިކުމެވަޑައިގެންނެވީ ފަސްދޮޅަހުގެ އަހަރުތަކުގައި ސްޓޭޓް ސެނެޓަރަކަށް ހޮވިވަޑައިގެންނެވި ހަމައިންނެވެ. އެއަށް ފަހު 1971 ވަނަ އަހަރު ގަވަރުނަރަކަށް ހޮވިވަޑައިގެންނެވިއެވެ. އޭގެ ހަ އަހަރު ފަހުން ބޭއްވުނު އިންތިޚާބްގައި އޭރު ރައީސް ކަމުގައި ހުންނެވި ގެރަލްޑް ފޯޑް ބަލި ކުރައްވާ ރައީސް ކަމަށް، އަދި 39 ވަނަ ކޮމާންޑަރ އިން ޗީފް ކަމަށް ވަޑައިގެންނެވި އެވެ.

ވައިޓް ހައުސް އިން ނުކުމެވަޑައިގެންނެވުމަށް ފަހު ވެސް ޖިމީ ކާޓަރ ގެންދެވީ ތަފާތު އިޖްތިމާއީ މަސައްކަތްޕުޅު ތަކުގައި ބައިވެރިވެވަޑައިގަންނަވަމުންނެވެ. އަދި އިންސާނީ ހައްގުތައް ހިމާޔަތް ކުރެއްވުމަށް ކާޓަރ ކުރެއްވި މަސައްކަތް ޕުޅަށް 2002 ވަނަ އަހަރު ނޯބެލް ޕީސް ޕްރައިސް ވެސް ލިބިވަޑައިގެންފައިވެއެވެ.

ޖިމީ ކާޓަރ އެންމެ ފަހުން އުފަން ދުވަސް ފާހަގަކުރައްވާފައިވަނީ އޭނާ އާއި އަނބިކަނބަލުން ވެސް އުފަންވެވަޑައިގެންނެވި ކުޑަ އަވަށެއް ކަމަށްވާ ޕްލެއިންސްގައެވެ.