ތުރުކީ-ސޫރިޔާ ބިންހެލުން: "ޢިމާރާތް ތަކުގެ ބައިތައް ނެގުން ހުއްޓާލައިފި... އެކަމަކު، އެކެއްގެ ހިލަމެއް، ނިޝާނެއް ނެތް"

ފެބުރުއަރީ މަހުގެ 6 ވަނަ ދުވަހު މުޅި ދުނިޔެ ސިއްސުވާލީ ތުރުކީވިލާތާއި ސޫރިޔާ ހިއްސާ ކުރާ ބޯޑަރު ސަރަޙައްދަށް، ރެކްޓަރ މިންގަނޑުން 7.8ގެ ބާރު މިނުގައި އައި ވަރުގަދަ ބިންހެލުމުގެ ޚަބަރާއެކުގައެވެ. ތުރުކީވިލާތާއި ސޫރިޔާއިން ލިބެމުންދާ މަރުގެ ރިޕޯޓްތަކުގެ ޢަދަދު، ހާސްހާހުން އިތުރު ވަމުން ދާ އިރު، އެއަށް ވުރެ ބޮޑު ސިހުމެއް ލިބެއެވެ. ފެބުރުއަރީ 14 ވަނަ ދުވަހަކީ، ބިންހެލުން އައިތާ 8 ވަނަ ދުވަހެވެ. މަރުވިކަން ކަށަވަރުވި މީހުންގެ ޢަދަދު 35000 އަށް އަރާފައި ވާ އިރު، އަސްލު ޢަދަދުތައް އެއަށްވުރެ މަތިވާނެކަމީ ޤަބޫލު ކުރަންޖެހޭ ހިތްދަތި ޙަޤީޤަތެކެވެ. ނަމަވެސް، ކޮންމެ މީހަކުވެސް ހިތުގެ އެންމެ އަޑިން އެދެމުންދަނީ، ވީނުވީއެއް ނޭނގި ގެއްލިފައި ވާ މީހުން ދިރިހުއްޓާ ފެނުމަށޭ ދެންނެވުމަކުން ދޮގަކަށް ނުވާނެއެވެ.

ބިންހެލުމުގެ ކާރިޘާގައި އޭނާގެ ފުރާނަ ސަލާމަތްވި އެކަކީ ނިޖްމިތިން ދިމިރްޖީއެވެ. އޭނާ މިއަދު މަޑުކޮށްލައިގެން އެ ހުރީ، ބިންހެލުން އައި އިރު، އޭނާއަށް ބޮޑުބެކިއާ އަންހެން ދަރިފުޅާ، އެ ކުއްޖާގެ ރޫމްމޭޓުން ހިއްސާ ކުރަމުން ދިޔަ އެޕަރޓްމަންޓް ހުރި ސަރަޙައްދުގައެވެ. އެއީ ކަހްރަމަންމަރާސްގައި އިރެއްގައި ގެއެއް ނަމަވެސް، މިއަދު އެ އިމާރާތަކީ ބިމާހަމަވެފައިވާ ގައު ކުނޑިތަކެކެވެ.

އެތައް މިލިއަން ބަޔަކު ރެފިއުޖީންނަށް ހަދާލި ބިންހެލުމުގެ ކާރިޘާއަށް ފަހު ބޮޑުބޭބެ ދަރިފުޅާއި އޭނާގެ ރޫމްމެޓުންގެ އެއްވެސް ޚަބަރެއްނުވެއެވެ.

ނިޖްމިތިންއަށް ބޮޑުބޭބެ ކިއާ، ޢުމުރުން 18 އަހަރުގެ ރުމޭސާ ކިލިޗްއަކީ ޔުނިވަރސިޓީގައި ތަޢުލީމު ހާސިލު ކުރަމުން ދިޔަ ދަރިވަރެކެވެ. އެ ފްލެޓެއްގައި 8 ދަރިވަރަކު ދިރިއުޅެމުން ދިޔައެވެ. އެ ޢާއިލާތަކުން މިހާރު ވަނީ ހޮސްޕިޓަލަށް ގޮސް، ޑީއެންއޭ ސާމްޕަލްވެސް ދީފައެވެ. ގެއްލިފައިވާ މީހުން ދެނެގަންނަން ފަސޭހަވާނެތީއެވެ.

ރުމޭސާމެން ދިރިއުޅެމުން ދިޔަ ކަހްރަމަންމަރާސްގެ ބައެއް ހިސާބުތަކުގައި މީހުން ހޯދުމަށް ހިންގި ރެސްކިއު އޮޕަރޭޝަންތައްވެސް މިހާރު ވަނީ ހުއްޓާލާފައެވެ. ބައެއް ސައިޓްތަކުގައި ހުރި ބަރު ގައު ކުނޑިތައް ނެގުމުގެ މަސައްކަތަށް އެކްސްވޭޓަރުތައްވެސް ވަނީ ބޭނުން ކުރަން ފަށާފައެވެ. ބިންހެލުން އައިތާ 220 ގަޑިއިރު ފަހުންވެސް ދިރިހުއްޓާ ފެނިދާނެ ކަމުގެ ޢުއްމީދު ނަގާނުލާ ތިބި ބަޔަކީ ޢާއިލާ މެންބަރުންނެވެ. އެމީހުން ދަނީ އެކްސްކަވޭޓަރު ބޭނުން ކުރުން ފަދަ ކަންކަން ކުރަމުންދާތީ ކަންބޮޑުވުން ފާޅު ކޮށްފައެވެ. ގެއްލިފައިވާ މީހުން ފެނޭތޯ ހޯދާ ދިނުމަށް އާދޭސް ކުރަމުންނެވެ.

ސުންނާފަތިވެ ބިމާހަވެފައިވާ ޢިމާރާތްތަކުގެ ކުރިމަތީގައި ހުރި ގަހުގައި އެލުވާފައި ވަނީ، އަދިވެސް ޚަބަރެއް ލިބިފައިވާ ނުވާ ކުދިންގެ ފޮޓޯތަކެވެ. ޢުއްމީދަކީ އެމީހުން ދެނެގަނެވުމެވެ.

ފެބުރުއަރީ 6 ވަނަ ދުވަހުގެ ބިންހެލުމާ ގުޅިގެން ކުރިމަތިވި ކާރިޘާގައި މަރުވި މީހުންގެ ޢަދަދުތައް މިހާރު ވަނީ 1939 ވަނަ އަހަރު ތުރުކީވިލާތަށް އައި ބާރުގަދަ ބިންހެލުމުގައި މަރުވި މީހުންގެ ޢަދަދަށްވުރެ އިތުރުވެފައެވެ. އެ ފަހަރުގެ ކާރިޘާގައި 31643 މީހެއްގެ ފުރާނަ ވަނީ ގެއްލިފައެވެ. ފެބުރުއަރީ 6 ވަނަ ދުވަހުގެ ކާރިޘާއަކީ، ތުރުކީވިލާތުގެ މި ފަހުގެ ތާރީޚުގައި އެ ޤައުމަށް ކުރިމަތިވި އެންމެ ގެއްލުންދެނިވި ބިންހެލުމުގެ ކާރިޘާއެވެ. އަދި މި ބިންހެލުމަކީ މި ޤަރުނުގައި ކުރިމަތިވި ޤުދުރަތީ ކާރިޘާތަކުގެ ތެރެއިން 6 ވަނަށް އެންމެ ގިނަ ޢަދަދެއްގެ ބައެއްގެ ފުރާނަ ގެއްލިދިޔަ ކާރިޘާއެވެ. އޭގެ ކުރިއަށް އޮތީ 2005 ވަނަ އަހަރު ޕާކިސްތާނަށް އައި ބިންހެލުމެވެ. އެ ހާދިޘާގައި މަރުވި މީހުންގެ ޢަދަދު، 73000 އަށްވަނީ އަރާފައެވެ.