ބޮރޫޝިއާ ޑޯޓްމަންޑް އޮތީ ހުރިހާ ހާލަތަކަށް ތައްޔާރަށް ކަމަށް އެ ޓީމުގެ ކޯޗު އެޑިން ޓާޒިިކް ބުނެފި އެވެ.

ޓާޒިކް މިހެން ބުނީ ޔުއެފާ ޗެމްޕިއަންސް ލީގުގެ ގަދަ 16 ގެ ފުރަތަމަ ލެގުގައި ޗެލްސީއާ ދެކޮޅަށް ނުކުންނަ މެޗުގެ ކުރިން ވާހަކަ ދައްކަމުންނެވެ. އެގޮތުން ޗެލްސީ އަށް ދެކޮޅަށް ނުކުންނައިރު ޑޯޓްމަންޑުން ހުރިހާ ކަމަކަށް ތައްޔާރުވާނެ ކަމަށާއި، އަބަދުވެސް ފޯކަސް ބަހައްޓާނީ ކުރިއަށް އޮތް މެޗަށް ކަމަށެވެ. އޭނާ ބުނީ ޑޯޓްމަންޑުން ބޭނުންވާ ގޮތަކީ ވެސް އެއީ ކަމަށެވެ. އަދި އެކަމުގެ ތެރޭގައި އެންމެ ފަހު ހަފްތާގައި ޑޯޓްމަންޑަށް ރަނގަޅަށް ކުރެވުނު ކަންކަމާއި، ގޯސްކޮށް ކުރެވުނު ކަންކަން ވެސް ހިމެނޭނެ ކަމަށެވެ. އަދި މީގެ ދެ އަހަރު ކުރިން ޗެމްޕިއަންސް ލީގު ކާމިޔާބު ކުރި ޓީމާ ދެކޮޅަށް ނުކުންނައިރު، ހުރިހާ ކަމަކަށް ތައްޔާރު ކަމަށާއި، ބޭނުންވަނީ މެޗައިގެން ކުރިއަށް ދާން ކަމަށެވެ. އޭނާ ބުނީ ފުރަތަމަ މެޗު ވެސް ވެގެންދާނީ ވަރަށް އުނދަގޫ މެޗަކަށް ކަމަށާއި، އެ މެޗުން އަދި ގޮތެއް ކަނޑަނޭޅޭނެ ކަމަށެވެ. ނަމަވެސް ދެ ވަނަ މެޗަށް ނުކުންނައިރު، ފުރަތަމަ މެޗުގެ ހިތްހަމަޖެހުން އޮންނަން ބޭނުންވާނެ ކަމަށެވެ.

މީގެ އިތުރުން ޓާޒިކް ބުނީ އޭނާ ޤަބޫލު ކުރާ ގޮތުގައި ކުރިއަށް އޮތް ބުރަށް ދިޔުމަށް ކުޅުންތެރިން ހަމައެކަނި އަޒުމު ކަނޑައަޅާނީ ނޫން ކަމަށެވެ. އޭނާ ބުނީ ކުޅުންތެރިން އެކަމަށް އަޒުމު ކަނޑައަޅައި، އެކަމަށް ގަދައަޅާ މަސައްކަތް ކުރާނެ ކަމަށް ވެސް އުންމީދު ކުރާ ކަމަށެވެ. އަދި ސަބެސްޓިއަން ހާލާ އަކީ ޑޯޓްމަންޑަށް ވަރަށް މުހިންމު ކުޅުންތެރިޔެއް ކަމަށާއި، ގިނަ ދުވަސްތަކެއް ވަންދެން ޓީމަށް އޭނާ ގެއްލުނު ކަމަށެވެ. ޓާޒިކް ބުނީ ބޭނުންވަނީ ހަމައެކަނި ހާލާ ނޫން ކަމަށާއި، ޓީމުގައި ތިބި އެންމެހާ ކުޅުންތެރިން ވެސް ބޭނުންވާ ކަމަށެވެ. ޓާޒިކް ވަނީ ޗެލްސީން ނިމުނު ޓްރާންސްފާ މާކެޓުގައި ގިނަ ކުޅުންތެރިންތަކެއް ހޯދާފައިވާކަން ވެސް ފާހަގަކޮށްފަ އެވެ. އޭނާ ބުނީ ޑޯޓްމަންޑުން އެކަމާމެދު މާބޮޑަށް ވިސްނުމުގެ ބޭނުމެއް ނެތް ކަމަށާއި، ބޭނުންވަނީ މެޗުން މޮޅުވާން ކަމަށެވެ.

ޔުއެފާ ޗެމްޕިއަންސް ލީގުގެ ގަދަ 16ގެ ފުރަތަމަ މެޗުގައި ޑޯޓްމަންޑުން އަމިއްލަ ދަނޑުގައި ޗެލްސީއާ ދެކޮޅަށް ނުކުންނާނީ ބުދަ ދުވަހުގެ ރޭ ރާއްޖެ ގަޑިން ދަންވަރު އެކެއް ޖަހާއިރު އެވެ.