ސްޕޮންސަރުން ބޭނުންވުމުން ސާފް ޗެމްޕިއަންޝިޕް އިންޑިޔާ އަށް

މުބާރާތުގެ މާކެޓިން ޕާޓްނަރުން އެދުމުގެ މަތީން ކުރިއަށް އޮތް ސާފް ޗެމްޕިއަންޝިޕް ފުޓްބޯޅަ މުބާރާތް އަންނަ ޖޫން މަހު އިންޑިޔާގައި ބާއްވަން ނިންމައިފި އެވެ.

މިއަހަރުން ފެށިގެން ދެކުނު އޭޝިޔާގެ އެންމެ ބޮޑު ފުޓްބޯޅަ މުބާރާތުގެ މާކެޓިން ޕާޓްނަރުންނަކީ ޑުބާއީގެ ސްޕޯޓްސް ޕާޓްނަރ އިންޓަނޭޝަނަލް އެވެ. އެމީހުންނަށް ޕާޓްނަރުކަން ލިބުނީ އެކަމަށް އެދި ކުރިމަތިލި ކުންފުނިތަކުގެ ތެރެއިންނެވެ. ކުރިއަށް އޮތް 2029 ވަނަ އަހަރުގެ ނިޔަލަށް އެމީހުންނަށް ޕާޓްނަރުކަން ދިނީ ހޯމަ ދުވަހު ބޭއްވި ސާފްގެ އެކްޒެކެޓިވް ކޮމިޓީގެ ބައްދަލުވުމުގަ އެވެ. ޕާޓްނަރުން އެދިފައިވަނީ ސާފް ޗެމްޕިއަންޝިޕުގެ ކޮންމެ ދެ މުބާރާތުން އެއް މުބާރާތް އިންޑިޔާގައި ބާއްވައިދިނުމަށެވެ.

ސާފް ޗެމްޕިއަންޝިޕުގެ އެންމެ ކާމިޔާބު ގައުމު ކަމަށްވާ އިންޑިޔާގައި މި އަހަރުގެ މުބާރާތް ބާއްވަން މިހާރު ދީފައިވާ ތާރީހަކީ އަންނަ ޖޫން މަހު އެވެ. މުބާރާތް ކުޅޭނެ ދަނޑެއް އަންނަ މަހުގެ ކުރިން ނިންމަންޖެހޭނެ އެވެ.

މި އަހަރުގެ މުބާރާތް ބާއްވަން އެދިފައިވަނީ އިންޑިޔާގެ އިތުރުން ނޭޕާލްގަ އެވެ. ސާފް ޗެމްޕިއަންޝިޕް ކުޑަތަންވަމުން އަންނައިރު މި ސަރަހައްދުގެ ހަތް ގައުމުގެ ތެރެއިން ސްރީލަންކާ ފުޓްބޯޅަ ފެޑަރޭޝަން ފީފާއިން ވަނީ ސަސްޕެންޑްކޮށްފައެވެ. އެންމެ ފަހުގެ މުބާރާތް 2021ގައި ރާއްޖޭގައި ބޭއްވިއިރު އެންމެ ފަހުގެ ޗެމްޕިއަނުންނަކީ ވެސް އިންޑިޔާއެވެ. އެގައުމުގެ ފަހުން ރާއްޖެ އަކީ މުބާރާތުގެ ދެ ވަނަ އަށް އެންމެ ކާމިޔާބު ގައުމެވެ. ރާއްޖެ ތަށި ހޯދާފައިވަނީ 2008 އާއި 2018ގަ އެވެ.