ޕެރިސް ސެއިންޓް ޖާމަން (ޕީއެސްޖީ)ގެ ކުޅުންތެރިންނަކީ ބޮޑެތި މެޗުތަކަށް ފަރިތަ ކުޅުންތެރިންތަކެއް ކަމަށް އެ ޓީމުގެ ކޯޗު ކްރިސްޓޮފާ ގަލްޓިއޭ ބުނެފި އެވެ.

ގަލްޓިއޭ މިހެން ބުނީ މި ސީޒަންގެ ޔުއެފާ ޗެމްޕިއަންސް ލީގުގެ ގަދަ 16 ގެ ފުރަތަމަ މެޗުގައި ޖަރުމަނުގެ ބަޔާން މިއުނިކާ ދެކޮޅަށް ނުކުންނަ މެޗުގެ ކުރިން ވާހަކަ ދައްކަމުންނެވެ. ގަލްޓިއޭ ބުނީ ކުރިއަށް އޮތް މެޗަށް ނުކުންނާނީ އެންމެ ފަހު ފްރާންސް ލީގުގައި މޮނާކޯއާ ދެކޮޅަށް ނުކުތް ޓީމާ މުޅިން ތަފާތު ޓީމެއް ކަމަށެވެ. އޭނާ ބުނީ ޕީއެސްޖީގައި އޭނާގެ ކުޅުންތެރިން ބޮޑެތި މެޗުތަކަށް ފަރިތަވާނެ ކަމަށާއި، އިދިކޮޅަށް އޮތީ ވަރުގަދަ ޓީމެއް ކަމަށެވެ. ގަލްޓިއޭ ބުނީ ބަޔާންގައި ތިބި ކުޅުންތެރިންނަަކީ ވަރަށް ވަރުގަދަ ކުޅުންތެރިންތަކެއް ކަމަށާއި، މެޗަށް ނުކުންނަނީ އެކަން ދެނެގަނެ، ކަންތައް ކުރަންވީ ގޮތް އެނގިތިބެ ކަމަށެވެ. މީގެ އިތުރުން އޭނާ ބުނީ، އެކަހަލަ މެޗުތަކުގައި ގޭމު ގެންގުޅެންވީ ގޮތާއި، މޮޅުވާނެ އުކުޅުތައް ވެސް ޕީއެސްޖީގެ ކުޅުންތެރިންނަށް އިނގޭނެ ކަމަށެވެ.

މީގެ އިތުރުން ގަލްޓިއޭ ވަނީ ޕީއެސްޖީ އަށް ކުޅެމުން އަންނަ ކީލިއަން އެމްބޭޕޭގެ ވާހަކަ ވެސް ދައްކައިފަ އެވެ. އޭނާ ބުނީ ޕީއެސްޖީގެ ޑޮކްޓަރުންނާއި ވާހަކަ ދެއްކުމަށްފަހު، އެމްބާޕޭ ފަރިތަކުރުންތަކުގައި ބައިވެރިވި ކަމަށެވެ. އަދި އެމްބާޕޭ ފަރިތަކުރީ އެކަނި ނޫން ކަމަށާއި، ޓީމުގެ އެހެނިހެން ކުޅުންތެރިންނާއެކު އޭނާގެ ފަރިތަކުރުންތައް ކުރިއަށް ގެންދިޔަ ކަމަށެވެ. ހަމައެއާއެކު އެ ފަރިތަކުރުންތައް ކުރިއަށް ގެންދެވުނީ ވަރަށް ރަނގަޅަށްކަން ފާހަގަކޮށް ގަލްޓިއޭ ބުނީ، އެމްބާޕޭ މެޗުގެ ފުރަތަމަ 11 ގައި ހިމެނުމާދު ގޮތެއް ނިންމާނީ އަންގާރަ ދުވަހު ކަމަށެވެ. އަދި އިދިކޮޅު ޓީމު ބިރުގެންނެވުމުގެ ނިޔަތުގައި އެމްބާޕޭ ބެންޗުގައި ނުބައިންދާނެ ކަމަށެވެ. އޭނާ ބުނީ މެޗުގެ ޝީޓުގައި އެމްބާޕޭގެ ނަން އޮވެއްޖެ ނަމަ، މެޗުގައި އެމްބާޕޭ ކުޅޭނެ ކަމަށެވެ. ނަމަވެސް އެއީ ކިހާ ވަގުތަކަށް ކަމެއް އަދި ބުނަން ނޭންގޭ ކަމަށެވެ. ގަލްޓިއޭ ބުނީ އޭނާ އަށް ދެވޭނެ ޔަޤީން ކަމަކީ ބެންޗުގައި އިނދެއްޖެނަމަ، އެމްބާޕޭ މެޗުގައި ނުކުޅެ ނުދާނެ ކަމަށެވެ.

ޕީއެސްޖީގެ ދަނޑުގައި އެ ޓީމުން ބަޔާނާ ދެކޮޅަށް ނުކުންނާނީ އަންގާރަ ދުވަހުގެ ރޭ ރާއްޖެ ގަޑިން ދަންވަރު އެކެއް ޖަހާއިރު އެވެ.