މިހާރު މިސްރާބު ހުރީ އިންޑޯ ވޮލީގައި ރިހި ނުވަތަ ލޯގެ ބަދަލުގައި ރަން މެޑައްޔެއް ހޯދަން: ރަނޭ
13 ފެބުރުއަރީ 2023 | ހޯމަ 02:42ފޯ ނޭޝަންސް ކަޕަކީ މިދިޔަަ އަހަރެއްހާ ދުވަހު ކުރެވުނު މަސައްކަތުގެ ނަތީޖާ ބަލާލަން ލިބޭ ރަނގަޅު ފުރުސަތެއް
ފޯ ނޭޝަންސް ކަޕް ލޯންޗު ކުރުމަށް ބޭއްވި އިވެންޓުގައި ވީއޭއެމްގެ ރައީސް ރަނޭ
މިހާރު މިސްރާބު ޖަހާފައި ހުރީ އިންޑޯ ވޮލީގައި ރިހި މެޑަލް ނުވަތަ ލޯ މެޑަލްގެ ބަދަލުގައި ސީދާ ރަން މެޑައްޔެއް ހޯދުމަށް ކަމަށް ވޮލީބޯޅަ އެސޯސިއޭޝަން އޮފް މޯލްޑިވްސް (ވީއޭއެމް)ގެ ރައީސް މުޙައްމަދު ރަނޭޝް (ރަނޭ) ވިދާޅުވެއްޖެ އެވެ.
ރަނޭ މިހެން ވިދާޅުވީ ފޯ ނޭޝަންސް ކަޕް އިފްތިތާހު ކުރުމަށް ބޭއްވި އިވެންޓުގައި ވާހަކަ ދައްކަވަމުންނެވެ. ރަނޭ ވިދާޅުވީ މިދިޔަ އަހަރުގެ ފަހު ކޮޅުގައި ހުރި ވަރަށް ގިނަ ބައިނަލްއަޤުވާމީ މުބާރާތްތަކެއް އެކިއެކި ސަބަބުތަކާ ހުރެ ނުބޭއްވި ދިޔައީ ކަމަށެވެ. އެހެންކަމުން މިއަަހަރުގެ ބައިނަލްއަޤުވާމީ މުބާރާތްތަކަށް ކުރިމަތިލީއިރު، އިންޑިއަން އޯޝަން އައިލެންޑްސް ގޭމްސް (އައިއޯއައިޖީ) އާއި އޭޝިއަން ގޭމްސް އަދި ސެންޓްރަލް ޒޯން މުބާރާތް އޮތް ކަމަށެވެ. އެހެންކަމުން މި މަހު އޮންނަ ފޯ ނޭޝަންސް ކަޕަކީ މިދިޔަަ އަހަރެއްހާ ދުވަހު ކުރެވުނު މަސައްކަތުގެ ނަތީޖާ ބަލާލަން ލިބޭ ރަނގަޅު ފުރުސަތެއް ކަމަށް އޭނާ ވިދާޅުވިއެވެ. މީގެ އިތުރުން މުބާރާތް ރޭވީ ދިވެހިން ފަޚުރުވެރިވާ ފަދަ ނަތީޖާއެއް ލިބޭނެ ކަމުގެ އުންމީދުގައި ކަމަށް ވެސް އޭނާ ވިދާޅުވިއެވެ.
މީގެ އިތުރުން ރަނޭ ވިދާޅުވީ މި މުބާރާތް ވެގެންދާނީ ކުރިއަށް ހުރި ބައިނަލްއަޤުވާމީ އެހެނިހެން މުބާރާތްތަަކަށް ވެސް އިތުރަށް ތައްޔާރުވުމަށް އެހީވެގެންދާނެ މުބާރާތެއް ކަމަށެވެ. މުބާރާތުގައި ބައިވެރިވާ އަފްޣާނިސްތާނަކީ ރާއްޖެ ހިމެނޭ ސެންޓްރަލް އޭޝިއާގެ ޤައުމެއް ކަމަށާއި، އެ ޤައުމަކީ ވާދަވެރި ގޮތެއްގައި ކުޅެމުން އަންނަ ޤައުމެއް ކަމަށް އަދި، އޭގެ ޕޮސިޓިވް ނަތީޖާ ކުރިއަށް އޮތް އެހެން މުބާރާތްތަކުގައި ފެންނާނެ ކަމަށް އުންމީދު ކުރައްވާ ކަމަަށް ވެސް ރަނޭ ވިދާޅުވިއެވެ. ހަމައެއާއެކު މެއި މަހު ނޭޕާލްގައި އޮންނަ ސެންޓްރަލް އޭޝިއާ މުބާރާތުގެ ކުރިން މިއީ އަންހެން ޤައުމީ ވޮލީ ޓީމަށް ވެސް ލިބިގެންދާނެ ރަނގަޅު ތައްޔާރީއެއް ކަމަށް އޭނާ ފާހަގަކުރެއްވިއެވެ.
ރަނޭ ވިދާޅުވީ އެންމެން އެކުވެގެން ކުރެވުނު މަސައްކަތުގެ ތެރެއިން 2019 ވަނަ އަހަރު އަންހެން ޓީމު ވަނީ ސެންޓްރަލް އޭޝިއާ މުބާރާތުގައި ރިހި މެޑަލް ހާސިލްކޮށްފައި ކަމަށާއި، އޭގެ ފަހުން މިދިޔަ މަހުގެ ތެރޭގައި ޤައުމީ ބީޗު ވޮލީ ޓީމުން ރަން މެޑައްޔެއް ހޯދާފައިވާ ކަމަށެވެ. އެހެންކަމުން މިހާރު ވީއޭއެމްގެ މިސްރާބު ޖަހާފައި ވަނީ އިންޑޯ ވޮލީގެ ކޮންމެ ވެސް އެއް މުބާރާތެއްގައި ރިހި މެޑަލް ނުވަތަ ލޯ މެޑަލްގެ ބަދަލުގައި ރަން މެޑައްޔެއް ހޯދޭނެ މަސައްކަތްތަކެއް ކުރަން ކަމަށެވެ.
މީގެ އިތުރުން ރަނޭ ވަނީ ޔޫތް މިނިސްޓްރީ އާއި ގުޅިގެން ވޮލީ ބޯޅަ ކުރިއެރުވުމަށް ކުރަމުން އަންނަ މަސައްކަތް ވެސް ފާހަގަކުރައްވާފަ އެވެ. އޭނާ ވިދާޅުވީ އެ މިނިސްޓްރީގެ އެހީތެރިކަމާއެކު ރާއްޖޭގެ އެކި ކަންކޮޅުތަކުގައި ވޮލީ ކޯޓުތައް ޤާއިމު ކުރެވެމުން އަންނަ ކަމަށާއި، އެކަމުން ނުކުންނަ ނަތީޖާ ވެސް ރަނގަޅު ކަމަށެވެ. އެހެންކަމުން ރާއްޖޭގެ ވޮލީ ކުރިމަގު ފެންނަނީ ވަރަށް އުޖާލާކޮށް ކަމަށާއި، އެކުއެކީ ކުރެވޭ މަސައްކަތުން ކާމިޔާބު ހާސިލުވާނެ ކަމަށް ވެސް އޭނާ ވިދާޅުވިއެވެ.
