ތުރުކީ-ސީރިޔާ ބިންހެލުން: މަރުވި މީހުންގެ އަދަދު 30،000 އަށް

މި ހިނގާ ފެބްރުއަރީ މަހުގެ 6 ވަނަ ދުވަހުގެ ދަންވަރުގެ ވަގުތެއްގައި ތުރުކީވިލާތާއި ސޫރިޔާއަށް އައި ބާރުގަދަ ބިންހެލުމުގައި މަރުވި މީހުންގެ އަދަދު 30،000 އަށް އަރައިފިއެވެ.

މީޑިއާ ރިޕޯޓްތައް ބުނާގޮތުން އާދިއްތަ ދުވަހުގެ ނިޔަލަށް ސީރިޔާގައި މަރުވި މީހުންގެ އަދަދު 4500 އަށް ވަނީ އަރާފައެވެ. އަދި ތުރުކީގައި މަރުވި މީހުންގެ އަދަދު ވަނީ 24617 އަށް އަރާފައެވެ. ޔޫއެންގެ އޮފިޝަލުން ބުނާގޮތުން މި ހާދިސާގައި ގެދޮރުނެތި ހާލުގައި ޖެހިފައިވާ މީހުންގެ އަދަދު 5.3 މިލިއަނަށް ވަނީ އަރާފައެވެ. އަދި ވަގުތުން ވަގުތަށް އެހީ ބޭނުންވާ މީހުންގެ އަދަދު ވަނީ 900،000 އަށް އަރާފައެވެ. ގިނަ ބަޔަކަށް ކާންބޯން ނުލިބި ދަތި ހާލުގައި ތިބި އިރު އެހީ ފޯރުކޮށްދޭ ޖަމާއަތްތަކުން ދަނީ މީހުންނަށް އެހީވުމުގެ މަސައްކަތް ކެނޑިނޭޅި ކުރަމުންނެވެ.

މީހުން ސަލާމަތްކުރުމުގެ މަސައްކަތް އަދިވެސް ކުރަމުންދާ އިރު މިހާތަނަށް އައި އިރު ދިރިތިއްބާ ނުފެންނަ ގިނަ ބަޔަކު ސަލާމަތް ކުރެވޭނެ ކަމުގެ އުންމީދު ވަނީ ވަރަށް ބޮޑަށް ކުޑަވެފައެވެ. ސީރިއާއަށް ބިންހެލުން އައިސްފައިވަނީ އެ ޤައުމުގެ ސަރުކާރުން ކޮންޓްރޯލް ކުރާ ސަރަހައްދާއި ހަނގުރާމަވެރި ޖަމާއަތްތަކުން ކޮންޓްރޯލް ކުރާ ސަރަހައްދުތަކަށެވެ. އެހެންކަމުން އެ ޤައުމުން މަރުވި މީހުންގެ އަސްލު އަދަދު އަދި އެނގިފައިނުވާ ކަމަށާއި ނަމަވެސް ފަހުގެ ރިޕޯޓުތަކަކީ އެ ސަރަހައްދުގައި ހަރަކާތްތެރިވަމުން އަންނަ ވައިޓް ހެލްމެޓް ސިވލް ޑިފެންސް ގްރޫޕުންނާއި ސީރިއާ ސަރުކާރުން ހިއްސާކޮށްފައިވާ ނަންބަރުތަކެއް ކަމަށް ބޭރުގެ މީޑިއާތަކުން ބުނެއެވެ.

ބިންހެލުމާ ގުޅިގެން ސީރިޔާއަށް އިންސާނީ އެހީ ފޯރުކޮށްދިނުމަށް ދަތިތަކާ ކުރިމަތިވާކަމަށް އެހީދޭ ޖަމިއްޔާ ޖަމާއަތްތަކުން ކަންބޮޑުވުން ފާޅުކޮށްފައިވާއިރު، ސީރިޔާގެ ސަރުކާރުން ވަނީ އެގައުމުގެ ހަނގުރާމަވެރި ޖަމާއަތްތަކުގެ ކޮންޓްރޯލްގެ ދަށުގައިވާ ސަރަހައްދުތަކަށް ވެސް އިންސާނީ އެހީ ފޯރުކޮށްދިނުމަށް އެއްބަސްވެފައެވެ.