ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ އާޖެންޓީނާގެ ކެޕްޓަން ލިއޮނަލް މެސީ އަށް އަނިޔާވެ މޮނާކޯއާ ދެކޮޅަށް ނުކުޅެވޭނެ އެވެ.

ފްރާންސް ލީގުގައި ޕީއެސްޖީން މޮނާކޯއާ ދެކޮޅަށް ނިކުންނާނީ ހޮނިހިރު ދުވަހުގެ ރޭގަ އެވެ. މޮނާކޯ މެޗު މެސީ އަށް ގެއްލެނީ އޭނާގެ ފައިގެ ފަލަ މަސްގަނޑަށް ލިބުނު އަނިޔާއެއްގެ ސަބަބުންނެވެ. ޕީއެސްޖީން އެކަން ޔަގީންކޮށްދީފައިވާއިރު، ޕީއެސްޖީން އެންމެ ފަހުން މާސޭއާ ދެކޮޅަށް ކުޅުނު މެޗުގައި ވެސް މެސީ ވަނީ ކުޅެފަ އެވެ. ޔުއެފާ ޗެމްޕިއަންސް ލީގުގެ ގަދަ 16 ގެ ފުރަތަމަ މެޗަށް މެސީ ފިޓުވާނެ ކަމުގެ އުންމީދު ބޮޑު ކަމަށް ޕީއެސްޖީއާ ހަވާލާދީ މީޑިއާ ތަކުގައި ވަނީ ރިޕޯޓުކޮށްފަ އެވެ. ޔުއެފާ ޗެމްޕިއަންސް ލީގުގެ މެޗުތައް ކުރިއަށް އޮތްއިރު މެސީ އަށް އަނިޔާވުމަކީ ޕީއެސްޖީން ކަންބޮޑުވާނެ ކަމެކެވެ. މެސީގެ އިތުރުން ޕީއެސްޖީ އަށް ކުޅެމުން އަންނަ ފްރާންސްގެ ކީލިއަން އެމްބާޕޭ ވެސް ހުރީ އަނިޔައިގަ އެވެ. އަނިޔާގެ ސަބަބުން އެމްބާޕޭ އަށް ޔުއެފާ ޗެމްޕިއަންސް ލީގުގައި ޕީއެސްޖީން ބަޔާނާ ދެކޮޅަށް ކުޅޭ މެޗު ގެއްލޭނެ އެވެ.

މެސީ އަށް އަނިޔާވީއިރު، ފީފާ ވޯލްޑް ކަޕަށްފަހު އޭނާ ހުރީ ރަނގަޅު ފޯމެއްގަ އެވެ. މި ސީޒަންގައި ޕީއެސްޖީ އަށް ކުޅެދިން 10 މެޗުން 10 ލަނޑު ޖަހައިފަ އެވެ. މިވަގުތު ލީގު ތާވަލްގެ އެއް ވަނައިގައި އޮތީ ވެސް ޕީއެސްޖީ އެވެ. އެއީ ކުޅުނު 22 މެޗުން 54 ޕޮއިންޓާއެކު އެވެ. ދެ ވަނައިގައި އޮތީ ވާދަވެރި މާސޭ އެވެ. މާސޭ އާއި ޕީއެސްޖީއާ ދެމެދު އަށް ޕޮއިންޓުގެ ފަރަގެއް އެބަ އޮތެވެ.