ތުރުކީ-ސޫރިޔާ ބިންހެލުން: ދަރިފުޅު ލޮލަށް ނުފެންނަތާ 12 އަހަރު ފަހުން ލިބުނީ ޢިމާރާތްތަކުގެ ދަށުގައި މަރުވެފައި އޮތް ފޮޓޯ!
11 ފެބުރުއަރީ 2023 | ހޮނިހިރު 05:26ތުރުކީވިލާތަށް ބަދަލުވީ ދިރިއުޅުން ކޮޅަށް ޖަހަން
ޢާއިލާއަށް މެންބަރުން އިތުރުވެ، ޚަރަދުތައް ދެކޮޅު ޖައްސަން ދަތިވާން ފެށުމާއެކު ތުރުކީވިލާތަށް ބަދަލުވީ 2010 ވަނަ އަހަރުގެ ތެރޭގައި
އެއީ މީގެ 12 އަހަރު ކުރިއެވެ. ޢަބްދުލްކަރީ އަބޫ ޖަލްހޫމް، އޭނާގެ ޢާއިލާއާއެކު ތުރުކީވިލާތަށް ދިރިއުޅުން ބަދަލު ކުރީ ފަލަސްޠީނުގައި ފެތުރިފައި ވާ އިންތިހާ ފަޤީރު ކަމާއި ކުރަމުންދާ ސިލްސިލާ ހަނގުރާމައިން ސަލާމަތްވުމަށެވެ.
އެއީ މި ފެށުނު މީލާދީ އައު އަހަރުގެ 2 ވަނަ މަހުން 6 ވަނަ ދުވަހެވެ. ތުރުކީވިލާތާއި ސޫރިޔާ ހިއްސާ ކުރާ ބޯޑަރު ސަރަޙައްދަށް އައި ބާރުގަދަ ބިންހެލުމުގައި އަބޫ ޖަލްހޫމްއާއި އޭނާގެ މުޅި ޢާއިލާ ވަނީ މި ދުނިޔެއަށް ފަހު ނޭވާ ދޫކޮށްލާފައެވެ.
ބިން ހެލުމުގައި މަރުވި މީހުންގެ ތެރެއިން މިހާތަނަށް ފެނުނު ހަށިތަކަށް ބަލާއިރު ފަލަސްޠީނުގެ 70 މީހެއްގެ ހަށިގަނޑު އޭގެ ތެރޭގައި ހިމެނެއެވެ. އޭގެ ތެރޭގައި އަބޫ ޖަލްހޫމްއާއި އޭނާގެ އަންހެނުން، ފާޠިމާއާއި އެ ދެމަފިރިންގެ 4 ދަރިންވެސް ހިމެނޭ ކަމަށް ފަލަސްޠީނުގެ ފޮރިން މިނިސްޓްރީއިން ވަނީ ބުނެފައެވެ.
ފަލަސްޠީނުގެ ބައިތު ލަހިޔާގައި ހުންނަ އަބޫ ޖަލްހޫމްގެ އަމިއްލަ ގޭގައި އިން އޭނާގެ މަންމަ ވިދާދް މިހާރު ކުރަމުންދާ ހަމަ އެކަނި ޢުއްމީދަކީ އޭނާގެ ދަރިންގެ ހަށިތައް ފަލަސްޠީނަށް ގެނެސް، އެ ބިމުގައި ވަޅުލުމެވެ. ގިސްލަގިސްލާ އިން އެ މަންމައަށް އެ ދަރިން ނުފެންނަތާ 12 އަހަރުވެއްޖެއެވެ.
ޣައްޒާގައި ދިރިއުޅުނު އިރު އަބޫ ޖަލްހޫމް މަސައްކަތް ކުރަމުން ދިޔައީ ޓެކްސީ ޑްރައިވަރެއްގެ ގޮތުގައެވެ. ނަމަވެސް ޢާއިލާއަށް މެންބަރުން އިތުރުވެ، ޚަރަދުތައް ދެކޮޅު ޖައްސަން ދަތިވާން ފެށުމާއެކު ތުރުކީވިލާތަށް ބަދަލުވީ 2010 ވަނަ އަހަރުގެ ތެރޭގައެވެ. ތުރުކީވިލާތުގައި އޭނާ މަސައްކަތް ކުރީ ލަކުޑި ކާރުޚާނާއެއްގައެވެ. ތުރުކީވިލާތުގައި ދިރިއުޅުން ހަމައަކަށް އެޅުމުން، ފާޠިމާއާއި ދަރިންވެސް އެކޮޅަށް ބަދަލުވީއެވެ.
ތުރުކީވިލާތުގައި އަބޫ ޖަލްހޫމް ދިރިއުޅެމުން ދިޔަ އަންތަކިޔާއިން، 50 އަހަރުގެ ބައްޕައަށް ޢުއްމީދު އާ ކޮށްދިނެވެ. 33 އަހަރުގެ ފަޠިމާއާއި 16 އަހަރުގެ ނޫރާ، 11 އަހަރުގެ ބާރާ އަދި 9 އަހަރުގެ ކެންޒީއާއި 3 އަހަރުގެ މުޙައްމަދުގެ ދިރިއުޅުން އުޖާލާ ވަމުން ދިޔައެވެ. އާ އެޕަރޓްމަންޓްއަކަށް ބަދަލުވީވެސް މީގެ އެންމެ 6 މަސްދުވަސް ކުރިންނެވެ.
ވަރުގަދަ ބިންހެލުމުގެ ޚަބަރު ފެތުރިގެން ދިއުމާއެކު އަބޫ ޖަލްހޫމުގެ ޢާއިލާއަށް ވީ ގޮތެއް ބެލުމަށް، އެ ޢާއިލާގެ އެހެން މެންބަރުން ގަދައަޅާ މަސައްކަތް ފެށިއެވެ. އަބޫ ޖަލްހޫމްގެ ޢާއިލާ މަރުވެއްޖެކަން ދެނެގަނެވުނީ ވެއްޓިފައިވާ ޢިމާރާތްތަކުގެ ދަށުގައި އަބޫ ޖަލްހޫމްގެ ޢާއިލާ މަރުވެފައިވާ މަންޒަރު ފެންނަ ފޮޓޯއަކުންނެވެ.
އެ ފޮޓޯއިން ފެންނަނީ އަބޫ ޖަލްހޫމް، އޭނާގެ ދަރިންގެ ގައިގައި ބައްދާލައިގެން އޮތް މަންޒަރެވެ. ބެލެވޭ ގޮތުގައި ގޭގެ ބައިތައް ވެއްޓެމުން ދިޔަ ދިއުމުން، އެ ދަރިން ސަލާމަތް ކުރުމުގެ އައްޑަނައަކަށް އޭނާގެ އަމިއްލަ ހަށިގަނޑު ހެދީއެވެ.
ފަލަސްޠީނުގެ ސަރުކާރުންވެސް ވަނީ ބިންހެލުން އައި ސަރަޙައްދަށް ރެސްކިއު ޓީމެއް ފޮނުވާފައެވެ.
