ކުލަބް ވެލެންސިއާ އަށް ކުޅެމުން އައި އިތުބާރު ފޯވާޑް އަލީ ފާސިރު (ސެންޓޭ) ލީގު ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނަށް ބަދަލުވެއްޖެ އެވެ.

އައު ސީޒަނަށް ތައްޔާރުވުމުގެ ގޮތުން ގިނަ ކުޅުންތެރިންތަކެއް ހޯދަމުން އަންނަ މާޒިޔާ އިން ސެންޓޭ އެ ކުލަބާ ގުޅުނުކަން އިއުލާން ކުރީ ހޯމަ ދުވަހުގެ ރޭގަ އެވެ. އުމުރުން 34 އަހަރުގެ ކުޅުންތެރިޔާ މާޒިޔާ އަށް ބަދަލުވީ ތިން އަހަރު ދުވަހުގެ އެއްބަސްވުމެއްގެ ދަށުންނެވެ. މާޒިޔާ އާއި ވާދަވެރި ވެލެންސިއާ އިން މިދިޔަ އަހަރުގެ ޕްރެޒިޑެންޓްސް ކަޕް ކާމިޔާބު ކުރިއިރު ސެންޓޭ ވަނީ މޮޅު ކުޅުމެއް ދައްކައި، އިސް ދައުރެއް އަދާކޮށްފަ އެވެ. ސެންޓޭ ވަނީ ފާއިތުވި އަހަރުތަކުގައި މޮޅު ކުޅުމެއް ވެސް ދައްކައިފަ އެވެ. ސެންޓޭގެ ސޮއި ހޯދުމަށް ފަހު މާޒިޔާ އިން ބުނީ، ޤައުމީ ލެވެލްގަ އާއި ބައިނަލްއަޤުވާމީ ލެވެލްގައި ސެންޓޭ ދައްކާފައި ކުޅުމާއި، އޭނާގެ ތަޖުރިބާއާއެކު މާޒިޔާގެ ފޯވާޑް ލައިން އިތުރަށް ވަރުގަދަވެގެން ދާނެ ކަމަށެވެ.

ކުލަބް އީގަލްސް އިން ސީނިއާ ކެރިއަރު ފެށި ސެންޓޭ ވަނީ ރާއްޖޭގެ ބޮޑެތި ކުލަބުތަކަށް ކުޅެފަ އެވެ. އޭގެ ތެރޭގައި ވެލެންސިއާގެ އިތުރުން ނިއުރޭޑިއަންޓް ސްޕޯޓްސް ކުލަބް އަދި ވިކްޓްރީ ހިމެނެ އެވެ. މިއީ ސެންޓޭ މާޒިޔާ އަށް ކުޅޭ ފުރަތަމަ ފަހަރެވެ. ސެންޓޭ އަންނަނީ 2010 ވަނަ އަހަރުން ފެށިގެން ރާއްޖޭގެ ޤައުމީ ޓީމަށް ވެސް ކުޅެމުންނެވެ. ސެންޓޭ ވަނީ ޤައުމީ ޓީމާއެކު 2018 ވަނަ އަހަރު އޮތް ސާފް ޗެމްޕިއަންޝިޕް ކާމިޔާބުކޮށްފަ އެވެ. އެ މުބާރާތުގެ ފައިނަލްގައި 2-1 އިން އިންޑިއާގެ މައްޗަށް ރާއްޖެ އިން ކުރި ހޯދިއިރު، ރާއްޖޭގެ ދެ ވަނަ ލަނޑު ޖެހީ ވެސް ސެންޓޭ އެވެ. ސެންޓޭ ވަނީ މިހާތަނަށް ޤައުމީ ޓީމަށް ކުޅެދިން 61 މެޗުގައި 14 ލަނޑު ޖަހައިފަ އެވެ.

އައު ސީޒަނަށް މާޒިޔާ އިން ތައްޔާރު ވަމުން އަންނަ އިރު މިހާރު އެ ޓީމުން ވަނީ ބިދޭސީ ކޯޗެއް ވެސް ހަމަޖައްސައިފަ އެވެ. މީގެ އިތުރުން ރާއްޖޭގެ އެެހެން ކުލަބުތަކަށް ކުޅެމުން އައި މަޝްހޫރު ކުޅުންތެރިން މިހާރު ވަނީ މާޒިޔާ އަށް ސޮއި ވެސް ކޮށްފަ އެވެ.