ފާއިތުވި ހަފްތާ ރާއްޖެއިން ކޮވިޑް-19 ޖެހުނީ 6 މީހުންނަށްކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފިއެވެ.

އެޗްޕީއޭއިން އާންމުކޮށްފައިވާ ތަފާސްހިސާބުތަކަށް ބަލާއިރު ޖެނުއަރީ 29ން ފެބްރުއަރީ 4ށް ކޮވިޑަށް ޕޮޒިޓިވްވެފައިވަނީ މާލެ ސަރަހައްދުން 3 މީހުންނާއި އަތޮޅުތަކުން 3 މީހުންނެވެ. 3 މީހުންނަށް ހޮސްޕިޓަލްތަކުގައި އެޑްމިޓްކޮށްގެން ފަރުވާދީފައިވެއެވެ. އޭގެކުރީ ހަފްތާގައި ރާއްޖެއިން ކޮވިޑަށް ޕޮޒިޓިވްވެފައިވަނީ 2 މީހުންނެވެ.

މިއާއެކު ރާއްޖެއިން ކޮވިޑަށް ޕޮޒިޓިވްވީ މީހުންގެ ޖުމްލަ އަދަދު ވަނީ 185،721ށް އަރާފައެވެ. އަދި 311 މީހަކު ވަނީ މިބަލީގައި ނިޔާވެފައެވެ.

ވެކްސިންގެ ތަފާސްހިސާބުތަކަށް ބަލާލާއިރު ފެބްރުއަރީ މަހުގެ 4 ވަނަ ދުވަހުގެ ނިޔަލަށް ކޮވިޑް ވެކްސިންގެ ފުރަތަމަ ޑޯޒް 399،176 މީހުން ޖަހާފައިވާއިރު ދެވަނަ ޑޯޒް 385،093 މީހުން ޖަހާފައިވެއެވެ. ބޫސްޓަރ ފުރަތަމަ ޑޯޒް 167،631 މީހުން ޖަހާފައިވާއިރު ދެވަނަ ބޫސްޓަރ ޑޯޒް 1523 މީހުން ޖަހާފައިވެއެވެ.