އުއްމީދީ ޒުވާން ފޯވަޑް ހަސަން ނަޒީމް (ޗޯޓް) ވެސް މާޒިޔާއަށް ސޮއިކުރިކަން އެކްލަބުން މިއަދު އިއުލާންކޮށްފިއެވެ.
ކުރިންވެސް މާޒިޔާއިން ވަނީ އާ ކުޅުންތެރިންގެ އެއްބަސްވުމުގެ ކަންކަން ނިންމާފައެވެ. އެކަމަކު އެކުޅުންތެރިން ސޮއިކުރިކަން އިއުލާންކުރަން ފެށީ އާދިއްތަ ދުވަހުއެވެ. ގްރީން ސްޓްރީޓްސްއިން ފާހަގަކުރެވުނު ނަޒީމްވެސް މާޒިޔާއާއެކު ސޮއިކުރީ ތިން އަހަރުގެ އެއްބަސްވުމެއްގައެވެ. ނަޒީމްއަކީ ކޯޗު ނިޝްތާރުއާއެކު ކުރިއެރުން ހޯދަމުން އައި ކުޅުންތެރިއެކެވެ. މާޒިޔާއިން ކުޅުންތެރިންނާއެކު ސޮއިކުރަމުން ދަނީ ތިން އަހަރަށެވެ. ނަޒީމްގެ ސޮއި ހޯދުމާއެކު ޤައުމީ ޓީމްގެ ފޯވާޑްލައިންވެސް އެއްކޮށް އޮތީ މާޒިޔާގައެވެ. ހަމްޒާ މުޙައްމަދު (ހަމްޕު)އާއި, ނާއިޒު ހަސަން (ދާދު) ވަނީ އެއްބަސްވުން އާކޮށްފައެވެ. ޗޯޓްގެ ކުރިން ޒުވާން ފޯވާޑް ހަސަން ރާއިފް އަހުމަދު (ހަންނަ) ސޮއިކުރިކަންވެސް ވަނީ އިއުލާންކޮށްފައެވެ. އިއުލާން ނުކުރި ނަމަވެސް އަލީ ފާސިރު (ސެންޓޭ) ވެސް ވަނީ މާޒިޔާއަށް ނިންމާފައެވެ.
ފޯވަޑް ލައިންގެ އިތުރުން ކީޕަރުންނާއި, ޑިފެންސްލައިން އަދި ޤައުމީ ޓީމްގެ ފުރަތަމަ އެގާރައިގަ ކުޅޭ މިޑްފީލްޑް ލައިންވެސް މިހާރު އޮތީ މާޒިޔާގައެވެ. މާޒިޔާއާ ގާތް ކުރެވޭނެ އެއްވެސް ޓީމެއް ކުރިއަށް އޮތް ސީޒަންގައި ނޯންނާނެއެވެ. އެހެން ޓީމްތަކުން ޓީމް އެކަލަވާލާނީ މާޒިޔާއިން ޓީމް އެކުލަވާލާ ނިމުމުންނެވެ. ލިބޭނީ މާޒިޔާއިން ބޭނުންނުވާ ކުޅުންތެރިންނެވެ.
