ރޭވުންތެރިކަމާއެކު އައުސީޒަނަށް ތައްޔާރުވާ ހަމައެކަނި ކްލަބް މާޒިޔާއިން އައު ސީޒަނަށް ސޮއިކުރުވި ބިދޭސީ ފުރަތަމަ ކުޅުންތެރިއަކަށް ރާއްޖޭގައި ކުޅެމުން އައި ހަލިލް ޖަމާލް ވެއްޖެއެވެ.
މިޞްރް މިޑްފީލްޑަރާއެކު މާޒިޔާއިން ސޮއިކޮށް, އެކަން ވަނީ އިއުލާންކޮށްފައެވެ. ރާއްޖޭގައި ކުޅުމުގެ ތަޖުރިބާ ބޮޑު މިޑްފީލްޑަރ އެންމެ ފަހުން ކުޅުނީ ވެލެންސިޔާއަށެވެ. އޭނާއަކީ މަސައްކަތު ރޭޓް ރަނގަޅު މިޑްފީލްޑްގައި މޮޅަށް ކުޅޭ ކުޅުންތެރިއެކެވެ. މާޒިޔާއިން ވަނީ އާސީޒަނަށް ސްކޮޑް ވަރަށް ބޮޑަށް ވަރުގަދަ ކޮށްފައެވެ. ޓީމްގައި ތިބި ކްލަބުން ބޭނުންވާ ކުޅުންތެރިންގެ އެއްބަސްވުންތައް އައުކޮށް, މިދިޔަ ސީޒަންގައި އެހެން ކްލަބްތަކުގައި މޮޅަށް ކުޅުނު ކުޅުންތެރިން ވެސް ވަނީ ކްލަބަށް ގެނެސްފައެވެ.
މާޒިޔާއާ އަލަށް ގުޅުނު ކުޅުންތެރިންގެ ތެރޭގައި ކީޕަރު މުޙައްމަދު ފައިސަލްއާއި ޑިފެންޑަރ ހުސެއިން ސިފާއު ޔޫސުފް (ކްރޯ)އާއި ފޯވާޑް ހަސަން ރާއިފް އަހުމަދު (ހަންނަ) ހިމެނެއެވެ. ކީޕަރު ފައިސަލް ސޮއިކުރުމާއެކު ޤައުމީ ޓީމްގެ ތިން ކީޕަރުން ތިބީ މާޒިޔާގައެވެ. ސިފާއުއަކީ ޤައުމީ ޓީމްގެ ސެންޓްރަލް ޑިފެންޑަރެވެ. މީގެއިތުރުން މާޒިޔާއިން އަދި އިއުލާން ނުކުރި ނަމަވެސް އަލީ ފާސިރު (ސެންޓޭ) ވެސް ވަނީ ސޮއިކޮށްފައެވެ. މައުލޫމާތު ލިބިފައިވާ ގޮތުގައި އަހުމަދު ނޫމާން (ހެލްމެޓް) ވެސް ކުޅޭނީ މާޒިޔާއަށެވެ. މިދިޔަ އަހަރު ދެވަނަ ޑިވިޝަންގައި ނިއުރޭޑިއަންޓަށް ކުޅުނު ޑިފެންޑަރު ޝަމްވީލް މުޙައްމަދު ވެސް ވަނީ ތިން އަހަރުގެ އެއްބަސްވުމެއްގެ ދަށުން މާޒިޔާއަށް ސޮއިކޮށްފައެވެ.
