ޕީޕީއެމް/ޕީއެންސީ ލީޑަރޝިޕުން ޔާމީނަށް ދޭނީ ލަނޑެއް: ސައުދު
އިދިކޮޅުގެ ލީޑަރޝިޕުގައި ތިބި ފަރާތްތަކަކީ ރައީސް ޔާމީން ޖަލަށްދާ ކޮންމެ ފަހަރަކު ޕާޓީގެ ހަރަކާތްތައް ފުޅާ ކުރުމަށްފަހު އެމަނިކުފާނު ގެއަށް ވަޑައިގަތުމުން މާޔޫސްވާ ބައެއް
ވިލިނގިލި ދާއިރާގެ މެންބަރު ސައުދު ހުސައިން
ޕީޕީއެމް އަދި ޕީއެންސީގެ މިހާރުގެ ލީޑަރޝިޕުން، ކުރީގެ ރައީސް އަބްދުﷲ ޔާމީނަށް ދޭނީ ލަނޑެއް ކަމަށް ރައްޔިތުންގެ މަޖިލީހުގެ ވިލިނގިލި ދާއިރާގެ މެންބަރު ސައުދު ހުސައިން ވިދާޅުވެއްޖެއެވެ.
އޭނާ މިފަދައިން ވިދާޅުވީ ހޯމަ ދުވަހުގެ ރޭ ކުރެއްވި ޓްވީޓެއްގައެވެ. އެ ޓްވީޓުގައި އޭނާ ވިދާޅުވީ ޕީޕީއެމް/ޕީއެންސީ ގެ ލީޑަރޝިޕުން ރައީސް ޔާމީނަށް ދޭނީ ޓިކެޓެއް ނޫން ކަމަށާއި ނަމަވެސް ލަނޑެއް ކަމަށެވެ.
އޭނާގެ ޓްވީޓުގައި އިތުރަށް ވިދާޅުވީ އިދިކޮޅުގެ ލީޑަރޝިޕުގައި ތިބި ފަރާތްތަކަކީ ރައީސް ޔާމީން ޖަލަށްދާ ކޮންމެ ފަހަރަކު ޕާޓީގެ ހަރަކާތްތައް ފުޅާކުރުމަށްފަހު އެމަނިކުފާނު ގެއަށް ވަޑައިގަތުމުން މާޔޫސްވާ ބައެއް ކަމަށެވެ. އަދި މިހާތަނަށް ދިވެހި ރައްޔިތުންނަށް އެންމެ ދުއްޕާން ޖެއްސި ވެރިކަމަކީ ރައީސް ޔާމީންގެ އަނިޔާވެރި، ޚިޔާނާތްތެރި އަދި ޤައުމު އަޅުވެތިކުރުވި ވެރިކަން ކަމަށް ވެސް ސައުދު ވިދާޅުވިއެވެ.
އިދިކޮޅު ކޯލިޝަނުން ރައީސް ޔާމީނަށް ޕީޕީއެމްގެ ޓިކެޓް ނުދޭނެ ކަމަށް ސައުދު ވިދާޅުވެފައިވާއިރު އެ ޕާޓީން މިހާރު ވަނީ ބޮޑު ޖަލްސާއެއް ބާއްވައި ރިޔާސީ ޓިކެޓް އެމަނިކުފާނާ ހަވާލުކޮށްފައެވެ. އަދި އެންމެ ފަހުން ބޭއްވި ޖަލްސާގައި އެ ކޯލިޝަންގެ ލީޑަރޝިޕުން ވަނީ ރައީސް ޔާމީން ނޫން ބޭފުޅަކަށް ޕާޓީގެ ރިޔާސީ ޓިކެޓް ނުދޭނެ ކަމަށް ބުނެފައެވެ.
ކުރީގެ ރައީސް ޑރ. ވަހީދަށް އިދިކޮޅުގެ ރިޔާސީ ޓިކެޓް ދިނުމަށްފަހު އެމަނިކުފާނުގެ ރަނިންގމޭޓުކަން ރައީސް ޔާމިންގެ ކުރީގެ ރަނިންގމޭޓް ޑރ. ޝަހީމަށް ދިނުމަށް ޕީޕީއެމްގެ އެތެރޭގައި މަސައްކަތް ކުރެވެމުން ދާކަމަށް ބައެއް ފަރާތްތަކުން ދަނީ އަޑު ފަތުރަމުންނެވެ. ނަމަވެސް އެއީ ހަގީގަތާ ޚިލާފު ވާހަކަތަކެއް ކަމަށް ޕީއެންސީގެ ނާއިބު ރައީސް މުހައްމަދު ސައީދު ވަނީ ވިދާޅުވެފައެވެ.
