ބައިނަލްއަގުވާމީ ޔޯގާ ދުވަހުގެ ހަރަކާތާ ދެކޮޅަށް ގަލޮޅު ދަނޑުގައި ބޭއްވި އެއްވުމުގެ ތެރެއިން, ގަލޮޅު ދަނޑަށް ވަދެ ޓެރަރިޒަމްގެ އަމަލު ހިންގާފައިވާކަމުގެ ތުހުމަތުގައި އުފުލާފައިވާ ދައުވާގެ އިބްތިދާއީ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ހުސައިން ފާއިޒް ރަޝާދެވެ.

އާދިއްތަ ދުވަހުގެ މި އަޑުއެހުމުގައި ކުރިއަށް ގެންގޮސްފައިވަނީ މި މައްސަލައާ ގުޅިގެން ދައުވާ އުފުލާފައިވާ ފަރާތްތަކުގެ ތެރެއިން 7 މީހެއްގެ މައްސަލައެވެ. އެއީ މުހައްމަދު ޒިވްޔާން، އަބްދުﷲ ރިފާއު، އަބޫބަކުރު ފާރިއު، އަހުމަދު އަކްސަމް، އަހުމަދު ނަސޫހު، ހަސަން ޝިފާޒް އަދި ޝަބިމް އާދަމްއެވެ.

މި އަޑުއެހުމުގައި ގާޒީ ވިދާޅުވީ، މި މައްސަލައިގައި ދައުވާލިބޭ ބައެއް ފަރާތަކުން އަދިވެސް ވަކީލަކު ހަމަޖައްސާފައި ނުވާކަމަށެވެ.

އެ އެންމެންވެސް ވަނީ ވަކީލަކު ހަމަޖެހިފައި ނުވާ ސަބަބު ބަޔާންކޮށް، މި މައްސަލައިގައި ކުރިއަށްދާން ބޭނުންވަނީ ވަކީލަކާއެކު ކަމަށް ބުނެފައެވެ.

ވުމާއެކު ގާޒީ ވަނީ ވަކީލަކު އައްޔަނު ކުރުމަށް އެމީހުންނަށް 10 ދުވަހުގެ މުއްދަތެއް ދެއްވާފައެވެ.

މި އަޑުއެހުމުގައި މި މައްސަލައިގެ ދައުވާލިބޭ ބައެއް ފަރާތްތަކުގެ ދިފާއީ ވަކީލުން ވަނީ، މި މައްސަލައާގުޅޭ ލިޔެކިއުންތައް ތަފްސީލީ ގޮތެއްގައި ދިފާއަށް ނުލިބޭކަމަށް ބުނެފައެވެ. އެގޮތުން ދައުލަތުން ލިޔެކިއުންތައް ހުށައަޅާފައިވާ ގޮތާ ގުޅޭގޮތުން ވަކީލުން ވަނީ ކަންބޮޑުވުން ފާޅުކޮށްފައެވެ.

އޭގެ އިތުރުން، ރައްޔިތުންގެ މެދުގައި ހަމަހަމަކަން ގާއިމުކުރެވޭ ގޮތަށް ދައުލަތުން ދައުވާތައް އުުފުލުމަށްވެސް ދިފާއީ ވަކީލު ވަނީ އެދިފައެވެ.

ދެން މި މައްސަލައިގެ އަޑުއެހުމެއް އޮންނާނީ މާރޗު މަހުގެ ތެރޭގައެވެ.