ގަލޮޅު ދަނޑުގައި ކުރިއަށްދިޔަ ޔޯގާ ހަރަކާތަށް ހުރަސް އަޅައި ހަމަނުޖެހުން ހިންގުމާގުޅިގެން މީހުން ހައްޔަރުކުރަނީ ވަކި ޚިޔާލެއް ފާޅުކޮށްގެން ނޫންކަމަށް ފުލުހުން ބުނެފިއެވެ.
ހޯމަ ދުވަހު ފުލުހުން ބޭއްވި ނޫސްވެރިންގެ ބައްދަލުވުމުގައި ކްރިމިނަލް އިންވެސްޓިގޭޝަން ކޮމާންޑުގެ ހެޑް، އެސިސްޓެންޓް ކޮމިޝަނަރ އޮފް ޕޮލިސް މުހައްމަދު ރިޔާޒު ވިދާޅުވީ، މި މައްސަލައާ ގުޅިގެން މީހުން ހައްޔަރުކުރަނީ ޔޯގާއާ ގުޅިގެން ޚިޔާލުފާޅުކުރުމުން ކަމަށް ބުނެ ޚަބަރު ފަތުރަމުންދާ ކަމަށާއި، ނަމަވެސް އެއީ ހަގީގަތާ ޚިލާފު ވާހަކަތަކެއް ކަމަށެވެ. އޭނާ ވިދާޅުވީ މީހުން ހައްޔަރުކުރަނީ ޔޯގާ ހަރަކާތް ކުރިއަށްދިޔައިރު ދައުލަތުން ހިމާޔަތް ދޭންޖެހޭ ބަޔަކު ތިބި ތަނަކަށްވަދެ، ހަމަނުޖެހުން ހިންގައި ބިރުދެއްކުމާއި އަނިޔާކުރުމާއި މުދަލަށް ގެއްލުންދިނުމުގެ މައްސަލައިގައިކަމަށެވެ.
ޔޯގާ ހަރަކާތް ހުއްޓުވުމަށް ބާރުގެ ބޭނުން ކުރުމަށް، އެކަމުގައި އިސްކޮށް އުޅުނު ބައެއް ފަރާތްތަކުން ބާރުއަޅާފައިވާ ކަމަށާއި، މިހާރު ހައްޔަރުގައި ތިބި މީހުންގެ ތެރެއިން 4 މީހުން އޭގެ ތެރޭގައި ހިމެނޭކަމަށްވެސް ރިޔާޒު ވިދާޅުވިއެވެ. އަދި ޔޯގާ ހަރަކާތް އޮތް ދުވަހުގެ ކުރީ ރެއިން ފެށިގެން، އެ ހަރަކާތް ހުއްޓުވުމަށް ތައްޔާރުވިކަމަށާއި، އެއިރުވެސް ހަރަކާތް ހުއްޓުވުމަށް އެކި ކަންކަން ރާވާފައިވާކަމަށް މައުލޫމާތު ލިބިފައިވާކަމަށް އޭނާ ވިދާޅުވިއެވެ.
ޔޯގާއާ ގުޅޭގޮތުން ފިގުހީގޮތުން އުފެދިފައި މިއޮތް ޚިލާފުތަކާ ގުޅުވައިގެން އެކަމާ ގުޅޭގޮތުން ރައުޔު ފާހަގަކުރީތީވެ، ބަޔަކު ހައްޔަރުކޮށްގެން އުޅޭކަމަށް ދޭހަވާގޮތަށް ވާހަކަތައް އެބަ ދެކެވޭ. އެހެންނަމަވެސް އަޅުގަނޑު ޔަގީންކަން އަރުވަން ބޭނުންވަނީ، ފިގުހީ ރައުޔާގުޅޭ މައްސަލައެއް ނޫންކަން އަޅުގަނޑުމެން މި ބަލަނީ. އަޅުގަނޑުމެން މި ބަލަނީ އެތަނުގައި ހިނގައިދިޔަ މާރާމާރީއާ އަނިޔާވެރި އަމަލުތަކާ މުދަލަށް ގެއްލުން ދިނުމާ ބިރުދެއްކުމުގެ އަމަލުތަކެއްކަން.އެސިސްޓެންޓް ކޮމިޝަނަރ އޮފް ޕޮލިސް މުހައްމަދު ރިޔާޒު
މި ހަމަނުޖެހުންތަކާ ގުޅިގެން މިހާތަނަށް 21 މީހުން ފުލުހުން ވަނީ ހައްޔަރުކޮށްފައެވެ. މީގެ ތެރެއިން 2 މީހެއްގެ ބަންދުގެ މުއްދަތު ވަނީ އިތުރުކޮށްފައެވެ.
މި މައްސަލައިގައި އިތުރު މީހުންތައް ހޯދުމުގެ މަސައްކަތް ފުލުހުން ދަނީ މިހާރު ވެސް ކުރަމުންނެވެ. އަދި މިއީ ސީރިއަސް މައްސަލައެއްގެގޮތުގައި ބަލާނެކަމަށްވެސް ފުލުހުން ބުނެއެވެ.
