ޝެއިހް ނިޝާނާއި ފަޒްލޫން އަށް ވަކީލަކު އައްޔަނުކުރަން 10 ދުވަސް ދީފި
ކުށް ސާބިތުވެއްޖެ ނަމަ 20 އަހަރާއި 25 އަހަރާއި ދެމެދުގެ މުއްދަތަކަށް ޖަލަށްލާނެ
ޝެއިހް ނިޝާން (ކ) އަދި ޝެއިހް ފަޒްލޫން (ވ)
ގަލޮޅު ދަނޑުގައި ކުރިއަށްދިޔަ ޔޯގާ ހަރަކާތަށް ހުރަސްއަޅައި ހަމަނުޖެހުން ހިންގި މައްސަލައިގައި ދައުވާ އުފުލާފައިވާ ށ. މިލަންދޫ، ނާޒް، ފަޟްލޫން މުޙައްމަދާއި، ލ. މާމެންދޫ، ސޯސަންވިލާ، އާދަމް ނިޝާން އަށް ވަކީލަކު އައްޔަންކުރަން 10 ދުވަހުގެ މުއްދަތެއް ދީފިއެވެ.
ޝެއިހް ފަޒްލޫން އާއި ޝެއިހް ނިޝާންގެ މައްޗަށް އުފުލާފައިވަނީ ޓެރަރިޒަމްގެ އަމަލެއް ކުރުމަށް ހިތްވަރު ދިނުމުގެ ކުށުގެ ދައުވާއެވެ. މިކުށުގެ އަދަބަކީ 10 އަހަރާއި 15 އަހަރުގެ މުއްދަތަކަށް ޖަލަށްލުމެވެ.
ހޯމަ ދުވަހު ކްރިމިނަލް ކޯޓުގައި ކުރިއަށް ގެންދިޔަ މި އަޑުއެހުމުގައި ޝެއިހު ނިޝާނާއި ފަޒްލޫން ހާޒިރުވީ ވަކީލަކާ ނުލައެވެ. އަދި މައްސަލައިގެ ލިޔެކިޔުންތައް ލިބިފައިވާތީ ކުރިއަށްދާން ބޭނުންވަނީ ވަކީލާ އެކު ކަމަށް ދެ ޝެއިހުން ބުނެ، ވަކީލަކު އައްޔަން ކުރަން 10 ދުވަހުގެ މުއްދަތެއް ދިނުމަށް އެދިފައިވެއެވެ.
ވަކީލަކު އައްޔަން ކުރަން 10 ދުވަހުގެ މުއްދަތެއް ދިނުމަށް އެދިފައިވާތީ، މި މައްސަލަ ބައްލަވާ ގާޒީ ހުސައިން ފާއިޒު ރަޝާދު ވަނީ ވަކީލަކު އައްޔަން ކުރުމަށް 10 ދުވަހުގެ މުއްދަތެއް ދެއްވާފައެވެ.
ގަލޮޅު ދަނޑުގައި ކުރިއަށްދިޔަ ޔޯގާ ހަރަކާތަށް ހުރަސްއަޅައި ހަމަނުޖެހުން ހިންގި މައްސަލައިގައި ޕްރޮސެކިއުޓަރ ޖެނެރަލް (ޕީޖީ) އޮފީހުން 18 މީހެއްގެ މައްޗަށް ދައުވާ އުފުލާފައިވެއެވެ.
ޝެއިހް ނިޝާނާއި ފަޒްލޫންގެ އިތުރުން އިތުރުން، ޓެރަރިޒަމްގެ އަމަލެއް ކުރުމުގެ ކުށުގެ ދައުވާ 7 މީހެއްގެ މައްޗަށް އުފުލާފައިވާއިރު، އެ ކުށް ސާބިތުވެއްޖެ ނަމަ 20 އަހަރާއި 25 އަހަރާއި ދެމެދުގެ މުއްދަތަކަށް ޖަލަށްލާނެއެވެ. އެގޮތުން މި ދައުވާ އުފުލާފައިވަނީ މއ. ކަނުހުރާ، މުޙައްމަދު ޛިލިއަން، ތ. ތިމަރަފުށި، ނަރުގިސްވިލާ، ޢަބްދުالله ރިފާޢު، ނ. މިލަދޫ، ކާރނޭޝަންމާގެ، އަބޫބަކުރު ފާރިޢު، ރ. ކަނދޮޅުދޫ، އަލަމާގެ، އަޙްމަދު އަކްސަމް، ގއ. މާމެންދޫ، އަސްރަފީވިލާ، އަޙްމަދު ނަޞޫޙު، މ. ކުދެހިގެ، ޙަސަން ޝިފާޒު އަދި ފ. ދަނބުރުދޫ، އާބާދީގުލްޝަން، ޝަބިމް އާދަމްގެ މައްޗަށެވެ.
މި މައްސަލައާއި ގުޅިގެން ޓެރަރިޒަމްގެ އަމަލެއް ހިންގުމުގައި ބައިވެރިވުމުގެ ކުށުގެ ދައުވާ ވެސް 7 މީހެއްގެ މައްޗަށް އުފުލާފައިވެއެވެ. އެއީ ހއ. ހޯރަފުށި، ޔާގޫތުގެ، މުޙައްމަދު އިސްމާޢީލް، ގ. ފީނިކްސް، ޢަބްދުالله ނިޔާޒު، ތ. ތިމަރަފުށި، ޢަލީއާބާދު، ޢަލީ މުޙައްމަދު، ނ. ވެލިދޫ، މިލާނޯ، އިބްރާހީމް ޒިހާން، ލ. މުންޑޫ، އަންނާރުމާގެ، މުޙައްމަދު ޝާން، ހދ. ކުޅުދުއްފުށި، ބާބޫގެ، ޙުސައިން ޢަލީ އަދި މ. ފަޅުމަތީގެ، އަޙްމަދު ޢަލީއެވެ.
އޭގެ އިތުރުން، ތ. ތިމަރަފުށި، ނަރުގިސްވިލާ، ޢަބްދުالله ރިފާޢުގެ މައްޗަށް މި މައްސަލައިގައި ވަނީ ޓެރަރިސްޓު ޖަމާއަތަކަށް ތާއީދުކުރާ މީހެއްކަން ދޭހަވާ ފަދަ ލިޔުމެއް ގެންގުޅުމުގެ ކުށުގެ ދައުވާ އުފުލާފައެވެ. މި ދައުވާ ސާބިތުވެއްޖެނަމަ އަންނާނެ އަދަބަކީ 1 އަހަރާއި 3 އަހަރާ ދެމެދުގެ މުއްދަތަކަށް ޖަލަށް ލުމެވެ.
ޔޯގާ ޙަރަކާތުގައި ހަތިޔާރެއް ބޭނުންކޮށްގެން މާރާމާރީ ހިންގިކަމަށް ތުހުމަތުކޮށް އެ ދައުވާ ވެސް މީހެއްގެ މައްޗަށް އުފުލާފައިވެއެވެ. އެއީ ފ. ދަނބުރުދޫ، އާބާދީގުލްޝަން، ޝަބިމް އާދަމްގެ މައްޗަށެވެ. ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ 9 ވަނަ މާއްދާގެ (ހ) ގެ ދަށުން އުފުލާފައިވާ މި ދައުވާ ސާބިތުވެއްޖެނަމަ އަންނާނެ އަދަބަކީ 7 އަހަރާއި 10 އަހަރާ ދެމެދުގެ މުއްދަތަކަށް ޖަލަށް ލުމެވެ.
އޭގެ އިތުރުން، ތ. ތިމަރަފުށި، ނަރުގިސްވިލާ، ޢަބްދުالله ރިފާޢުއާއި، ރ. ކަނދޮޅުދޫ، އަލަމާގެ، އަޙްމަދު އަކްސަމްގެ އިތުރުން، މ. ކުދެހިގެ، ޙަސަން ޝިފާޒުގެ މައްޗަށް ވަނީ އެ ޤާނޫނުގެ 9 ވަނަ މާއްދާގެ (ހ) އާއި (ނ) ގެ ދަށުން ހަތިޔާރެއް ބޭނުންކޮށްގެން މާރާމާރީ ހިންގުމުގެ ދައުވާ އުފުލާފައެވެ. އެ ދައުވާ ސާބިތުވެއްޖެނަމަ އަންނާނީ 3 އަހަރާއި 5 އަހަރާ ދެމެދުގެ މުއްދަތެއްގެ ޖަލު ޙުކުމެކެވެ.
މި މައްސަލައާ ގުޅިގެން ޤާނޫނު ތަންފީޛްކުރާ މުވައްޒަފެއްގެ މަސައްކަތަށް ޤަޞްދުގައި ހުރަސްއެޅުމުގެ ކުށުގެ ދައުވާ ވެސް 15 މީހެއްގެ މައްޗަށް ވަނީ އުފުލާފައެވެ. ހަމައެއާއެކު، ހއ. ހޯރަފުށި، ޔާގޫތުގެ، މުޙައްމަދު އިސްމާޢީލާއި، މއ. ކަނުހުރާ، މުޙައްމަދު ޛިލިއަންގެ މައްޗަށް ވެސް ވަނީ ޢަދުލު އިންޞާފު ޤާއިމުކުރުމަށް ހުރަސްއެޅުމުގެ ކުށުގެ ދައުވާއެއް އުފުލާފައެވެ.
ބައިނަލްއަގުވާމީ ޔޯގާ ދުވަހުގެ ހެނދުނު ގަލޮޅު ދަނޑުގައި ކުރިއަށްދިޔަ ޔޯގާ ހަރަކާތް ހުއްޓުވުމަށް އެތަނަށް ވަދެ ބަޔަކު ވަނީ އެތަނުގައި ހުރި ތަކެއްޗާއި ހަރަކާތުގައި ބައިވެރިވި މީހުންނަށް ހަމަލާ ދީފައެވެ.
