ޔޯގާ ހަމަނުޖެހުން: އިތުރު ދެ މީހަކު ހައްޔަރުކޮށްފި
މިއީ ސީރިއަސް މައްސަލައެއްގެގޮތުގައި ބަލާނެ
އިންޓަރނޭޝަނަލް ޔޯގާ ޑޭ ރާއްޖޭގައި ފާހަގަކުރުމަށް ބޭއްވި ޙަރަކާތުގެ ތެރެއިން ހިންގި ހަމަނުޖެހުން
ގަލޮޅު ދަނޑުގައި ކުރިއަށްދިޔަ ޔޯގާ ހަރަކާތަށް ހުރަސް އަޅައި ހަމަނުޖެހުން ހިންގި މައްސަލައިގައި އިތުރު 2 މީހަކު ހައްޔަރުކޮށްފިއެވެ.
ފުލުހުން ބުނެފައިވާ ގޮތުގައި ހައްޔަރު ކުރީ 29 އަހަރުގެ ފިރިހެނަކާއި 36 އަހަރުގެ ފިރިހެނެކެވެ.
މި ހަމަނުޖެހުންތަކާ ގުޅިގެން ފުލުހުން ވަނީ މިހާތަނަށް 21 މީހުން ހައްޔަރުކޮށް އެމީހުންގެ ވަނަވަރު އާންމުކޮށްފައެވެ.
ފުލުހުން ބޭއްވި ނޫސްވެރިންގެ ބައްދަލުވުމުގައި ކްރިމިނަލް އިންވެސްޓިގޭޝަން ކޮމާންޑުގެ ހެޑް، އެސިސްޓެންޓް ކޮމިޝަނަރ އޮފް ޕޮލިސް މުހައްމަދު ރިޔާޒު ވިދާޅުވީ، މި މައްސަލައާ ގުޅިގެން މީހުން ހައްޔަރުކުރަނީ ޔޯގާއާ ގުޅިގެން ޚިޔާލުފާޅުކުރުމުން ކަމަށް ބުނެ ޚަބަރު ފަތުރަމުންދާ ކަމަށާއި، ނަމަވެސް އެއީ ހަގީގަތާ ޚިލާފު ވާހަކަތަކެއް ކަމަށެވެ. އޭނާ ވިދާޅުވީ މީހުން ހައްޔަރުކުރަނީ ޔޯގާ ހަރަކާތް ކުރިއަށްދިޔައިރު ދައުލަތުން ހިމާޔަތް ދޭންޖެހޭ ބަޔަކު ތިބި ތަނަކަށްވަދެ، ހަމަނުޖެހުން ހިންގައި ބިރުދެއްކުމާއި އަނިޔާކުރުމާއި މުދަލަށް ގެއްލުންދިނުމުގެ މައްސަލައިގައިކަމަށެވެ.
ޔޯގާ ހަރަކާތް ހުއްޓުވުމަށް ބާރުގެ ބޭނުން ކުރުމަށް، އެކަމުގައި އިސްކޮށް އުޅުނު ބައެއް ފަރާތްތަކުން ބާރުއަޅާފައިވާ ކަމަށާއި، ހައްޔަރު ކުރި މީހުންގެ ތެރެއިން ބަޔަކު އޭގެ ތެރޭގައި ހިމެނޭކަމަށްވެސް ރިޔާޒު ވިދާޅުވިއެވެ.
އަދި ޔޯގާ ހަރަކާތް އޮތް ދުވަހުގެ ކުރީ ރެއިން ފެށިގެން، އެ ހަރަކާތް ހުއްޓުވުމަށް ތައްޔާރުވިކަމަށާއި، އެއިރުވެސް ހަރަކާތް ހުއްޓުވުމަށް އެކި ކަންކަން ރާވާފައިވާކަމަށް މައުލޫމާތު ލިބިފައިވާކަމަށް އޭނާ ވިދާޅުވިއެވެ.
މި މައްސަލައިގައި އިތުރު މީހުންތައް ހޯދުމުގެ މަސައްކަތް ފުލުހުން ދަނީ މިހާރު ވެސް ކުރަމުންނެވެ. އަދި މިއީ ސީރިއަސް މައްސަލައެއްގެގޮތުގައި ބަލާނެކަމަށްވެސް ފުލުހުން ބުނެއެވެ.
