ޔޯގާ ހަރަކާތުގައި ހަމަނުޖެހުން ހިނގީ ސެކިއުރުޓީ ފެއިލިޔާއެއްގެ ސަބަބުން: ފުލުހުން
ހަމަނުޖެހުން ހިންގީ ކްރައުޑުގެ ބިހޭވިއާ ރަނގަޅަށް ރީޑް ނުކުރެވުމުން ކަމަށް ބުނޭ
އިންޓަރނޭޝަނަލް ޔޯގާ ޑޭ ރާއްޖޭގައި ފާހަގަކުރުމަށް ބޭއްވި ޙަރަކާތުގެ ތެރެއިން ހިނގި ހަމަނުޖެހުން
މި މަހުގެ 21 ވަނަ ދުވަހު ގަލޮޅު ދަނޑުގައި ޔޯގާ ދުވަސް ފާހަގަ ކުރަން ކުރިއަށްގެންދިޔަ ހަރަކާތް ހުއްޓުވުމުގެ ނަމުގައި ހަމަނުޖެހުންތައް ހިންގުނީ ސެކިއުރިޓީ ފެއިލިޔާއެއްގެ ސަބަބުން ކަމަށް ފުލުހުން ބުނެފިއެވެ.
ހޯމަ ދުވަހު ބޭއްވި ނޫސްވެރިންގެ ބައްދަލުވުމެއްގައި ސެންޓްރަލް ޕޮލިސް ކޮމާންޑުގެ ހެޑް، އެސިސްޓެންޓް ކޮމިޝަނަރ އޮފް ޕޮލިސް އަލީ ޝުޖާއު ވިދާޅުވީ މާލޭގައި ބާއްވާ އެކި އެކި އެއްވުންތަކުގައި ފުލުހުން ވަރަށް ރަނގަޅަށް ކްރައުޑުތައް ކޮންޓްރޯލްކޮށް ބަލަހައްޓާފައިވާއިރު ސެކިއުރިޓީ ބްރީޗަކުން ހަމަނުޖެހުން އުފެދުމަކީ ކަންބޮޑުވާ ކަމެއް ކަމެށެވެ. އަދި އެއީ ސެކިއުރިޓީ ފެއިލިޔާއެއް ކަމަށް ގަބޫލު ކުރައްވާ ކަމަށާއި އެކަން ބަލަމުންގެންދާ ކަމަށް އޭނާ ވިދާޅުވިއެވެ.
ސެކިއުރިޓީ ބްރީޗްވުމުގެ ސަބަބުން އިންކުއަރީއެއް ވެސް ވަނީ ފަށައިފައެވެ. މި އިންކުއަރީ ކުރިއަށްގެންދަނީ ޑެޕިއުޓީ ކޮމިޝަނަރ އޮފް ޕޮލިސް އަލީ ރަޝީދުގެ ބެއްލެވުމުގެ ދަށުންނެވެ. އެ އިންކުއަރީގެ ރިޕޯޓް އަންނަ ހަފްތާގެ އާދީއްތަ ދުވަހު އެގްޒެކެޓިވް ބޯޑަށް ހުށަހަޅާނެ ކަމަށާއި އިތުރު އިންކުއަރީތަކެއް ޕޮލިސް ބޯޑުންނާއި ނޭޝަނަލް އިންޓަގްރެޓީ ކޮމިޝަނުންވެސް ކުރިއަށްގެންދާ ކަމަށް އަލީ ޝުޖާއު ވިދާޅުވިއެވެ.
އޭނާ އިތުރަށް ވިދާޅުވީ އެ ހަރަކާތް ކުރިއަށްދިޔައިރު އެއްވި މީހުންގެ އަދަދަށް ބަލައި ފޮނުވި ޓީމަކީ އެފަދަ ހާލަތެއްގައި އަބަދުވެސް ފޮނުވާނެ ވަރުގެ ޓީމެއް ކަމަށާއި މައްސަލަ ޖެހުނީ ފޯސް ކުޑަވެގެން ނޫން ކަމަށެވެ. އެ މައްސަލަ ދިމާވީ އެއްވެގެން ތިބި މީހުންގެ ބިހޭވިއާ ރަނގަޅަށް ނުބެލުމުން ކަމަށް ވެސް އޭނާ ވިދާޅުވިއެވެ.
މިފަދަ ހަރަކާތެއް އޮންނަނަމަ, ފުލުހުން ވަރަށް ގިނަ މައުލޫމާތު ހޯދާ ކަން ފާހަގަ ކުރައްވައި އަލީ ޝުޖާއު ވިދާޅުވީ ޔޯގާ ހަރަކާތާ ގުޅޭ ބައެއް މުހިންމު މައުލޫމާތު ކުރިން ނުލިބޭ ކަމަށެވެ. އެ މައުލޫމާތު ލިބުނީ އެ ސަރަހައްދުގައި ހަރަކާތްތެރިވަމުން ދަނިކޮށް ކަމަށް ވެސް އޭނާ ވިދާޅުވިއެވެ.
ފުލުހުން މައުލޫމާތު ދޭ ގޮތުގައި ޔޯގާ ހަރަކާތް ކުރިއަށްދިޔައިރު އެ ހަރަކާތުގައި އެކި ޤައުމުތަކުގެ 6 ސަފީރުންނާއި ވަޒީރުންނާއި ސަރުކާރުގެ އިސްފަރާތްތަކާއި ކުޑަކުދިންތަކެއް ބައިވެރިވިއެވެ. ބައެއް ފަރާތްތަކަށް ކުދި އަނިޔާތަކެއް ލިބިފައިވާ ކަމަށާއި މާބޮޑު އަނިއްޔާއެއް އެއްވެސް މީހަކަށް ނުލިބޭ ކަމަށް ވެސް ފުލުހުންގެ ތަހޫގީގުތަކުން ހާމަވާ ކަމަށް ފުލުހުން ބުންޏެވެ.
މި ހަމަނުޖެހުންތަކާ ގުޅިގެން މިހާތަނަށް 21 މީހަކު ވަނީ ހައްޔަރު ކޮށްފައެވެ. މީގެ ތެރޭގައި ހަމަނުޖެހުން ހިންގުމަށް ބާރުއަޅައި އިސްކޮށް ހަރަކާތްތެރިވި 4 މީހަކު ހިމެނޭ ކަމަށާއި އިތުރު މީހުން ހޯދުމުގެ މަސައްކަތް މިހާރުވެސް ކުރަމުން އަންނަ ކަމަށް ފުލުހުން ބުންޏެވެ.
