މާފަރު އެއަރޕޯޓުގެ ޓާމިނަލް ބޮޑުކުރުމުގެ މަސައްކަތް ކޮށްދޭނެ ބަޔަކު ހޯދަނީ

ނ.މާފަރު އިންޓަރނޭޝަނަލް އެއަރޕޯޓުގެ ޓާމިނަލް ބޮޑު ކުރުމުގެ މަސައްކަތް ކޮށްދޭނެ ފަރާތެއް ހޯދުމަށް އިއުލާނުކޮށްފިއެވެ.

ހޮނިހިރު ދުވަހު އައިލެންޑް އޭވިއޭޝަނުން ވަނީ މި މަސައްކަތް ކޮށްދޭނެ ބަޔަކު ހޯދުމަށް އިއުލާނުކޮށްފައެވެ. އެގޮތުން މި މަސައްކަތަށް އެދި ހުށަހެޅުމުގެ ސުންގަޑިއަކީ 12 ފެބްރުއަރީ 2023 ވާ އާދިއްތަ ދުވަހުގެ 23:59 އެކެވެ.

Advertisement

އައިލެންޑް އޭވިއޭޝަނުން ވަނީ މި މަސައްކަތް ކުރުމަށް ބޭނުންވާ ފަރާތްތަކުން "އެކްސްޕްރެޝަން އޮފް އިންޓްރަސްޓް" ހުށަހަޅާނެ ގޮތް ގެޒެޓުގައި އިއުލާނުކޮށްފައެވެ.

މި ބިޑުގައި ބައިވެރިވުމަށްޓަކައި ޓެންޑަރ ޑޮކިއުމަންޓުތައް ގަންނަންޖެހޭއިރު، އޭގެ އަގަކީ 15،000 ރުފިޔާއެވެ. އެއީ ރިފަންޑު ކުރެވޭ އެއްޗެއް ނޫނެވެ.

އައިލެންޑް އޭވިއޭޝަނުން މައުލޫމާތު ދޭ ގޮތުގައި ބިޑާއި ގުޅޭގޮތުން މައުލޫމާތުދޭއިރު މި މަސައްކަތާ ގުޅޭ އިތުރު މައުލޫމާތުތައް ބައިވެރިންނަށް ފޯރުކޮށްދެވޭނެއެވެ.

މާފަރު އިންޓަރނޭޝަނަލް އެއަރޕޯޓުގެ ޓާމިނަލް ބޮޑު ކުރުމުގެ މަސައްކަތް ކޮށްދޭނެ ފަރާތެއް ހޯދުމަށް އިއުލާނުކޮށްފައިވާއިރު، މާފަރު އެއަރޕޯޓު ބޮޑުކުރުމުގެ މަސައްކަތް ނިމިދިޔަ ޑިސެމްބަރު މަހު ވަނީ އެމްޓީސީސީއާ ޙަވާލުކޮށްފައެވެ. އެ މަސައްކަތުގެ އަގަކީ 27.1 މިލިއަން ޑޮލަރެވެ.

އެ މަޝްރޫއުގެ ދަށުން މިހާރު އޮތް 2.2 ކިލޯމީޓަރުގެ ރަންވޭ 2.85 ކިލޯމީޓަރަށް ދިގުކޮށް، ރަންވޭ ރީ ސަރފޭސް ކުރުމަށް ވަނީ ހަމަޖެހިފައެވެ. އެމްޓީސީސީން ވަނީ ކޮންޓްރެކްޓާ އެއްގޮތަށް 1 އަހަރު ދުވަހުގެ ތެރޭގައި މި ޕްރޮޖެކްޓު ނިންމައި، ރަންވޭ ސަރުކާރާ ޙަވާލު ކުރުމަށް މަސައްކަތް ފަށާފައިވާކަން ހާމަކޮށްފައެވެ.