ނ.މާފަރު އިންޓަރނޭޝަނަލް އެއަރޕޯޓް ބޮޑުކުރުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ޙަވާލުކޮށްފިއެވެ.

މި މަސައްކަތް އެމްޓީސީސީއާ ޙަވާލުކޮށްފައިވަނީ ބުރާސްފަތި ދުވަހު ޕްލޭނިންގ މިނިސްޓްރީގައި ބޭއްވި ރަސްމިއްޔާތެއްގައެވެ. އެކަމާ ގުޅޭ އެއްބަސްވުމުގައި މިނިސްޓްރީ އޮފް ނެޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ ގެ ފަރާތުން ސޮއި ކުރެއްވީ ޑިރެކްޓަރ ޖެނެރަލް ފާތިމަތު ޝާނާ ފާރޫޤުއެވެ. އެމްޓީސީސީގެ ފަރާތުން ސޮއި ކުރެއްވީ އެ ކުންފުނީގެ ސީއީއޯ އާދަމް އާޒިމްއެވެ.

މި މަސައްކަތުގެ އަގަކީ 27،180،835.29 ( ހަތާވީސް މިލިއަން އެއްލައްކަ އައްޑިހަ ހާސް އައްސަތޭކަ ތިރީސް ފަހެއް ޕޮއިންޓް ނަވާވީސް ) ޑޮލަރެވެ. އެގޮތުން މިއީ އަބޫދާބީ ފަންޑުން ޚަރަދުކޮށްގެން ހިންގާ ޕްރޮޖެކްޓެކެވެ.

އޭގެ އިތުރުން، މި މަސައްކަތުގެ ޖީއެސްޓީގެ ގޮތުގައި ހިމެނޭ 25،147،708.81 (ފަންސަވިސް މިލިއަން އެއްލައްކަ ސާޅީސް ހަތްހާސް، ހަތްސަތޭކަ އަށް ރުފިޔާ އައްޑިހަ އެއް ލާރި) ދައްކަނީ ދިވެހި ދައުލަތުގެ ބަޖެޓުންނެވެ.

މި ކޮންޓްރެކްޓު ނިންމަން ދީފައިވާ މުއްދަތަކީ 365 ދުވަހެވެ.

މި މަޝްރޫއު ގެ ދަށުން ކުރަން ހަމަޖެހިފައިވާ މައިގަނޑު މަސައްކަތްތަކަށް ބަލާއިރު، ބޮއިންގ (777-ER300) މަރުކާގެ ބޯޓު އޮޕަރޭޓް ކުރެވޭ ވަރަށް ރަންވޭ ބޮޑު ކުރުމާއި، ރަންވޭ އިތުރު 650 މީޓަރު ދިގު ކުރުމާއި، ސްޓްރިޕް ފުޅާ ކުރުމަށްޓަކައި ބިން ހިއްކުމުގެ އިތުރުން ގޮނޑުދޮއް ހިމާޔަތް ކުރުން ހިމެނެއެވެ.

އޭގެ އިތުރުން، މިހާރު ބޭނުން ކުރެވޭ ރަންވޭ ޕޭވްމަންޓު އަޕްގްރޭޑު ކުރުމާއި، ޓެކްސީވޭ ފުޅާ ކުރުމުގެ އިތުރުން، އޭޖީއެލް އަޕްގްރޭޑިންގ އާއި، ޕަވަރ ސިސްޓަމް އަޕްގްރޭޑް ކުރުންވެސް މި މަޝްރޫއުގެ ދަށުން ޙަވާލު ކޮށްފައިވާ ކަންކަމުގެ ތެރޭގައި ހިމެނެއެވެ.

އެއަރޕޯޓުގެ ޖާގަ އިތުރުކޮށް ބޮޑުކުރުމަކީ މި ސަރުކާރުގެ މުހިންމު ސިޔާސަތެއްކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިޙު ވަނީ ވިދާޅުވެފައެވެ. ރައީސް ވިދާޅުވީ، މާފަރު އެއަރޕޯޓާއެކު، މާފަރާއި، ނ.އަތޮޅުގެ ރައްޔިތުންނަށް ބޮޑެތި ފަސޭހަތަކެއް ލިބިގެންގޮސްފައިވާ ކަމަށެވެ. އެހެންނަމަވެސް އަދިވެސް އެއަރޕޯޓުގެ ޚިދުމަތް އިތުރަށް ފުޅާ ކުރަންޖެހޭކަން ފާހަގަކުރައްވައި ރައީސް ވަނީ އެއަރޕޯޓުން ފްލައިޓްތަކަށް ތެޔޮއެޅޭނެ އިންތިޒާމް ހަމަޖެއްސުމާއި، އައިލެންޑް އޭވިއޭޝަންގެ ފަރާތުން އެއަރޕޯޓުގައި ހޮޓަލެއް ތަރައްގީކުރައްވާނެކަންވެސް ފާހަގަ ކުރައްވާފައެވެ.