ހޯމަ ދުވަހުން ނ. މާފަރު އިންޓަރނޭޝަނަލް އެއަރޕޯޓުގެ ރަންވޭ ކައިރިން ދަނިކޮށް ފެނުނީ ގެއްލުންދެނިވި ޖަނަވާރެއް ނޫންކަމަށް ނިންމައިފިއެވެ.
ހޯމަ ދުވަހު ސޯޝަލް މީޑިއާގައި އާންމުވި ވީޑިއޯއެއްގައި ގޮތްނޭނގޭ ޖަނަވާރެއް މާފަރު އެއަރޕޯޓު ރަންވޭ ސަރަހައްދުގައި އުޅޭތަން ފެނެއެވެ. ވީޑިއޯއިން ފެންނަނީ މިނިކާވަގަކާ ވައްތަރު ޖަނަވާރެކެވެ.
މިކަމުގެ ރިޕޯޓު ލިބުމާއެކު އެމްއެންޑީއެފުން ވަނީ އެ ސަަރަހައްދުގައި ހަރަކާތްތެރިވާން ފަށާފައެވެ.
މާފަރު ކައުންސިލުން އަންގާރަ ދުވަހު ނެރުނު ބަޔާނެއްގައި ބުނީ އެމްއެންޑީއެފުން މިހާތަނަށް ބެލި ބެލުމުން އެއަރޕޯޓު ސަރަހައްދުން މިނިކާވަގެއް ފަދަ ޖަނަވާރެއް ފެނިފައިނުވާކަމަށެވެ. ދައުރުވަމުންދާ ވީޑިއޯ އެނަލައިޒްކުރުމުން ވީޑިއޯއިން ފެންނަނީ ގެއްލުންދެނިވި ޖަނަވާރެއް ކަމަށް ނުބެލެވޭކަމަށް އެމްއެންޑީއެފުން ބުނެފައިވާކަމަށްވެސް މާފަރު ކައުންސިލުން ބުނެފައިވެއެވެ.
މިކަމާއި ގުޅިގެން އެމްއެންޑީއެފުން ބުނީ ހޯމަ ދުވަހާއި، އަންގާރަ ދުވަހު ކުރި މަސައްކަތުން އެއްވެސް އެއްޗެއް ފެނިފައިނުވާތީ، ވީޑިއޯ ކްލިޕުން ފެނުނީ ކޮންއެއްޗެއްކަން ކަށަވަރު ކުރުމަށްޓަކައި އަންގާރަ ދުވަހު އިތުރު ސިފައިން މާފަރަށްގޮސް މާފަރު އެެއަރޕޯރޓްގެ ސަރަހަައްދު އެއްކޮށް ބަލާފައިވާކަމަށެވެ. ނަމަވެސް ބުޅަލެއް ފިޔަވައި އިތުރު ޖަނަވާރެއް ފެނިފައިނުވާކަމަށް އެމްއެންޑީއެފުން ބުނެފައިވެއެވެ.
އެމްއެންޑީއެފުން ބުނީ ބުޅަލެއް ހިނގާފައި ދަނިކޮށް ވީޑިއޯ ކުރެވިފައިއިން ދުރުމިނާއި އެންގަލްގެ ގޮތުން އަސްލު ސައިޒަށްވުރެ ބޮޑުކޮށް ފެންނާތީ ހީވާ ހީވުމެއްކަމަށް ވެދާނެ ކަމަށެވެ.
