ނ.މާފަރު އިންޓަރނޭޝަނަލް އެއަރޕޯޓް ބޮޑު ކުރުމަކީ އެމްޓީސީސީއަށްވެސް އަދި މުޅި ދިވެހިރާއްޖެއަށްވެސް މުހިއްމު ޕްރޮޖެކްޓެއްކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) ގެ ސީއީއޯ އާދަމް އާޒިމް ވިދާޅުވެއްޖެއެވެ.

ބުރާސްފަތި ދުވަހު ޕްލޭނިންގ މިނިސްޓްރީގައި އޮތް ރަސްމިއްޔާތެއްގައި މި ޕްރޮޖެކްޓު އެމްޓީސީސީއާ ޙަވާލު ކޮށްފައިވާއިރު، އެ ރަސްމިއްޔާތަށްފަހު ނޫސްވެރިންނާ ވާހަކަ ދައްކަވަމުން އާޒިމް ވިދާޅުވީ، މި ޕްރޮޖެކްޓަކީ އެމްޓީސީސީގެ ތާރީޚުގައިވެސް ފޮރިން ފަންޑެޑް ޕްރޮޖެކްޓެއްގެ ގޮތުގައި ސޮއި ކުރެވިގެންދިޔަ އެންމެ ބޮޑު އެއް ޕްރޮޖެކްޓު ކަމަށެވެ. އެގޮތުން މި ޕްރޮޖެކްޓު ހޯދުމަށްޓަކައި ގިނަ ބޭރުގެ ކުންފުނިތަކާވެސް ވާދަކުރަން ޖެހުނުކަން އާޒިމް ފާހަގަ ކުރެއްވިއެވެ.

އާޒިމް ވިދާޅުވީ، އެމްޓީސީސީއަކީ ބޭރުގެ ކުންފުނިތަކާ ވާދަކޮށް ކާމިޔާބު ހޯދޭނެ ކުންފުންޏެއްކަން ބޭރުގެ ފަންޑުތަކުން ބަލައިގަންނަކަމަށެވެ.  

އޭގެ އިތުރުން، މިއީ އެމްޓީސީސީއަށްވެސް އަދި މުޅި ދިވެހިރާއްޖެއަށްވެސް މުހިއްމު ޕްރޮޖެކްޓެއްކަން އާޒިމް ފާހަގަ ކުރެއްވިއެވެ. އެގޮތުން މިހާރު އޮތް 2.2 ކިލޯމީޓަރުގެ ރަންވޭ 2.85 ކިލޯމީޓަރަށް ދިގުކޮށް، ރަންވޭ ރީ ސަރފޭސް ކުރެވިގެންދާނެކަމަށް އާޒިމް ވިދާޅުވިއެވެ.

އޭގެ އިތުރުން، ޕްރޮޖެކްޓުގައި ސޮއި ކުރެވިގެން ގޮސްފައިވާއިރު، ކޮންޓްރެކްޓުގެ ދަށުން ކުރަންޖެހޭ މަސައްކަތް މިހިސާބުން ފެއްޓެވީކަމަށްވެސް އާޒިމް ވިދާޅުވިއެވެ.  

އާޒިމް ވިދާޅުވީ، ކުންފުނީގެ އަމާޒަކީ ކޮންޓްރެކްޓާ އެއްގޮތަށް 1 އަހަރު ދުވަހުގެ ތެރޭގައި މި ޕްރޮޖެކްޓު ނިންމައި، ރަންވޭ ސަރުކާރާ ޙަވާލު ކުރުން ކަމަށެވެ.

އާޒިމް ވިދާޅުވީ، މިދިޔަ 3 އަހަރުގެ ތެރޭގައި އެމްޓީސީސީން 1 އެއާޕޯޓުގެ މަސައްކަތް ނިންމައި، އިތުރު 4 އެއާޕޯޓުގެ މަސައްކަތް ކުރަމުން ގެންދާ ކަމަށެވެ. އަދި އޭގެ އިތުރުންވެސް އިތުރު ޕްރޮޖެކްޓުތައް ބާރު ސްޕީޑުގައި ކުރިއަށްދާކަން އާޒިމް ފާހަގަ ކުރެއްވިއެވެ.

މި މަސައްކަތް އެމްޓީސީސީއާ ޙަވާލުކޮށްފައިވަނީ ބުރާސްފަތި ދުވަހު ޕްލޭނިންގ މިނިސްޓްރީގައި ބޭއްވި ރަސްމިއްޔާތެއްގައެވެ. މި މަސައްކަތުގެ އަގަކީ 27.1 މިލިއަން ޑޮލަރެވެ.