ގޮތްނޭނގޭ ޖަނަވާރެއް މާފަރުން ފެނިއްޖެ
ވީޑިއޯއިން ފެންނަނީ މިނިކާވަގަކާ ވައްތަރު ޖަނަވާރެއް
މާފަރުން ފެނުނު ގޮތްނޭނގޭ ޖަނަވާރު
ނ. މާފަރުން, ގޮތްނޭނގޭ ޖަނަވާރެއް ފެނިއްޖެއެވެ.
ހޯމަ ދުވަހު ސޯޝަލް މީޑިއާގައި އާންމުވި ވީޑިއޯއެއްގައި ގޮތްނޭނގޭ ޖަނަވާރެއް މާފަރު އެއަރޕޯޓު ރަންވޭ ސަރަހައްދުގައި އުޅޭތަން ފެނެއެވެ. ވީޑިއޯއިން ފެންނަނީ މިނިކާވަގަކާ ވައްތަރު ޖަނަވާރެކެވެ.
މިކަމާ ގުޅިގެން ރާއްޖެއެމްވީއަށް މައުލޫމާތުދެއްވަމުން މާފަރު ކައުންސިލްގެ ރައީސް މުހައްމަދު އަދުނާން ވިދާޅުވީ މިކަން ކަމާބެހޭ އިދާރާތަކަށް ރިޕޯޓުކޮށްފައިވާކަމަށެވެ. މިފަދަ ޖަނަވާރެއް އުޅޭކަން އެނގިފައިވަނީ ސޯޝަލް މީޑިއާގައި އާންމުވި ވީޑިއޯއަކުން ކަމަށާއި، ވީޑިއޯއިން ނޫން ގޮތަކަށް އަދި މި ޖަނަވާރު ފެނިފައިނުވާކަމަށެވެ.
އެހެންކަމުން ރަށުތެރޭގައި ނޫޅޭކަން ކަށަވަރުކޮށްދިނުމަށް ކަމާބެހޭ އިދާރާތަކުގައި އެދިވަޑައިގެންފައި ވާފައިވާކަމަށް އޭނާ ވިދާޅުވިއެވެ.
މިކަމާ ގުޅިގެން އެމްއެންޑީއެފުން ބުނީ މިފަދަ ރިޕޯޓެއް ލިބިގެން އެ ސަރަހައްދުގައި ހަރަކާތްތެރިވަމުން ދާކަމަށެވެ. އެހެންނަމަވެސް އަދި މިހާތަނަށް މިފަދަ ޖަނަވާރެއް ފެނިފައި ނުވާކަމަށް އެމްއެންޑީއެފުން ބުނެފައިވެއެވެ.
