ނ. މާފަރުގައި ކަސްޓަމްސްގެ އޮފީސް ޢިމާރާތެއް އެޅުމަށް ބަޔަކާ ޙަވާލުކޮށްފިއެވެ.
އަންގާރަ ދުވަހު ބޭއްވި ރަސްމިއްޔާތެއްގައި މާފަރުގައި ކަސްޓްމަސްގެ އޮފީސް ޢިމާރާތް އެޅުމުގެ މަސައްކަތް ޙަވާލުކުރުމުގެ އެއްބަސްވުމުގައި ކަސްޓަމްސްގެ ފަރާތުން ސޮއިކުރެއްވީ ކޮމިޝަނަރ ޖެނެރަލް އޮފް ކަސްޓަމްސް ޢަބްދުﷲ ޝަރީފްއެވެ. އަދި ފިއުޗާރ ހޯމްގެ ފަރާތުން ސޮއިކުރެއްވީ އެކުންފުނީގެ އޮޕަރޭޝަން މެނޭޖަރު ޢަލީ ޢަބްދުﷲ އެވެ.
ރަސްމިއްޔާތުގައި ވާހަކަ ދައްކަވަމުން ކޮމިޝަނަރ ޖެނެރަލް އޮފް ކަސްޓަމްސް ޢަބްދުﷲ ޝަރީފް ވިދާޅުވީ ރީޖަނަލް ކަސްޓަމްސްތަކުގައި އަންނަ ބަދަލުތަކާއި ގުޅިގެން ކަސްޓަމްސްގެ ދައުރު ފުޅާވެގެން ދާއިރު ކަސްޓަމްސްގެ އޮފިސަރުންވެސް އިތުރަށް ތަމްރީނުކޮށް މި ދާއިރާއިން ކުރިއެރުވުމަށް މަސައްކަތްތަކެއް ކުރަން ޖެހޭ ކަމަށެވެ. އަދި ކުރިއަތް އޮތާނގައި އޮފިސަރުންނަށް އެ ފުރުސަތު ހޯދައިދެވޭނެ ކަމަށް ވެސް ވިދާޅުވިއެވެ.
އެ ކުންފުންޏާއި މި މަސައްކަތް ޙަވާލުކޮށްފައިވަނީ 540 ދުވަހުގެ ތެރޭގައި މަސައްކަތް ނިންމާ ގޮތަށެވެ. މި މަޝްރޫއަށް 6.7 މިލިއަން ރުފިޔާ ޚަރަދުވާނެއެވެ. އަދި މި މަސައްކަތުގެ ދަށުން އޮފީސް ހިންގުމަށް ބޭނުންވާ ޖާގައިގެ އިތުރުން އެކޮމަންޑޭޝަން ބްލޮކެއްގެ މަސައްކަތް ކުރެވިގެންދާނެއެވެ.
