މާޒިޔާގެ މުހިއްމު ކުޅުންތެރިން އެއްބަސްވުން އައުކޮށްފި

ލީގު ޗެމްޕިއަން މާޒިޔާގެ މުހިއްމު ކުޅުންތެރިން ކްލަބްގައި މަޑުކުރުމަށް ނިންމާ އެއްބަސްވުން އައުކޮށްފިއެވެ.

އެއްބަސްވުން އައުކުރި ކުޅުންތެރިންގެ ތެރޭގައި މިޑްފީލްޑަށް ކުޅެމުން އަންނަ އިބްރާހީމް އައިސަމްއާއި މުޙައްމަދު އިރުފާންއާއި ހުސެއިން ނިހާން ހިމެނެއެވެ. މިއީ ޤައުމީ ޓީމުގެ ވެސް ދެ މިޑްފީލްޑަރުންނެވެ. މީގެތެރެއިން އިރުފާނަކީ 2014 ން ފެށިގެން މާޒިޔާއަށް ކުޅެމުން އަންނަ ކުޅުންތެރިއެކެވެ. އައިސަމްއާއި ނިހާން މާޒިޔާއާ ގުޅުނީ 2019 ވަނަ އަހަރުއެވެ. ޑިފެންޑަރު ސަމޫހު އަލީއާއި, ބަދަލު ކީޕަރު އިޔާން އަބުދުލް އަލީމް ވެސް ވަނީ އެއްބަސްވުން އައުކޮށްފައެވެ. ޤައުމީ ޓީމުގެ ވެސް ސެންޓްރަލް ޑިފެންޑަރު ސަމޫހު މާޒިޔާއާ ގުޅުނީ 2016 ވަނަ އަހަރުއެވެ. ޒުވާން ކީޕަރު އިޔާންއަކީ 2013 އިން ފެށިގެން މާޒިޔާގެ ސްކޮޑްގައި ހިމެނެމުން އައި ކުޅުންތެރިއެކެވެ. ޤައުމީ ޓީމްގެ ކީޕަރު ހުސެއިން ޝަރީފްއާއި, ޑިފެންޑަރު ހަސަން ޝިފާޒް (ޑުންގާ) ވެސް ވަނީ މާޒިޔާގެ އެއްބަސްވުން އައުކޮށްފައެވެ. ޝިފާޒަކީ މާޒިޔާގެ ޔޫތު ޓީމުން ތަޢާރަފްވެ ސީނިއަރ ޓީމާ ހަމައަށް ދަތުރުކުރި ކުޅުންތެރިއަކެވެ. ކުރިއަށް އޮތީ އޭނާ މާޒިޔާއާއެކު ހޭދަކުރާ 12 ވަނަ ސީޒަނެެވެ.

މާޒިޔާއިން އިއުލާނު ނުކުރިނަމަވެސް ޓީމު އިތުރަށް ވަރުގަދަ ކުރުމަށް ޤައުމީ ޓީމުގެ ކުޅުންތެރިންތަކެއްގެ ސޮއި ވެސް ވަނީ ހޯދާފައެވެ. އޭގެތެރޭގައި އަލީ ފާސިރު (ސެންޓޭ) އާއި ކީޕަރު މުޙައްމަދު ފައިސަލްއާއި ޑިފެންޑަރ ހުސެއިން ޝިފާއު ޔޫސުފްއާއި އަހުމަދު ނޫމާންއާއި ފޯވަޑް ހަންނަ ހިމެނެއެވެ. ކުރިއަށް އޮތް ސީޒަންގައި މާޒިޔާއިން ނުފެންނާނެ ކުޅުންތެރިންގެ ތެރޭގައި މިޑްފީލްޑަރު އިބްރާހީމް ވަހީދު ހިމެނެއެވެ. ކެޕްޓަން އަސަދުالله އަބުދުالله ކްލަބްގައި މަޑުކުރާކަން ކަށަވަރެއް ނޫނެވެ.