އެތެރޭގެ އިންތިޚާބެއް ފޯރި އާއި އެކު ނިންމާލުމަށް ފަހު ރައީސް އިބްރާހިމް މުހައްމަދު ޞާލިހު އާއްމުންނާއި ބައްދަލުކުރެއްވީ އެމްޑީޕީގެ ރަސްމީ ޖަގަހަ، އެމްޑީޕީ ހަރުގެ ސަރަހައްދުންނެވެ. އެމްޑީޕީ ކުރިއަށް ޝިއާރުގެ ދަށުން ނުމުގެ ވަޑައިގެން ޕާޓީގެ ލީޑަރު އަދި ކުރީގެ ރައީސް މުހައްމަދު ނަޝީދާއި ވާދަކުރައްވާ ރައީސް ޞާލިހު ހޯއްދެވި ކާމިޔާބީ އަށްފަހު ދެއްވި މެސެޖު ވަރަށް ސާފެވެ.
އެއީ މިއީ އެމްޑީޕީގެ އެންމެން އެކުގައި ކުރިއަށް ދާންވީ ވަގުތުކަމުގެ ވާހަކައެވެ. ރައީސް ވިދާޅުވީ މިއީ ކުޑަކޮށް "ރެސްޓް"ކޮށްލުމަށް ފަހު އަނެއްކާވެސް މަސައްކަތް ފަށަންވީ ވަގުތު ކަަމަށެވެ. އެ ވިދާޅުވި ވާހަކައިގައި އިޝާރާތްކުރެއްވީ އެމްޑީޕީ އިން ކުރިއަށް އޮތް ރިޔާސީ އިންތިޚާބު ކާމިޔާބުކުރުމުގެ ވާހަކައެވެ. އެމްޑީޕީގެ ރިޔާސީ ޕްރައިމަރީ އާއި އެކު ސާބިތުކޮށްދިން ކަމަކީ އެމްޑީޕީގެ ފިކުރަކީ ޑިމޮކްރަސީ އާއި އެކު ކުރިއަރާ ބަދަލަށް ތައްޔާރު ޕާޓީއެއް ކަމެވެ. ވާދަވެރިކަމާއި އެކު ކެމްޕެއިންކޮށް ދެ ކެނޑިޑޭޓަކު ވާދަވެރި މާހައުލެއްގައި އިންތިޚާބެއްގައި އަޖުމަ ބަލާލަން ލިބުނު އެ ފުރުސަތުގައި ނަތީޖާ ވަރަށް ސާފެވެ. ރައީސް ޞާލިހު ސާފު ނަތީޖާ އަކުން އިންތިޚާބު ކާމިޔާބުކުރެއްވި އިރު ރައީސްގެ އުންމީދު ވަރަށް ސާފެވެ.
އެއީ ދެ ވަނަ ދައުރަކަށް އެމްޑީޕީ ހޮވުމުގެ ތަސައްވުރެވެ. ރާއްޖޭގެ ވެރިކަމުގެ ދެވަނަ ދައުރެއް އަދި އެއްވެސް ވެރިޔަަކަށް ޔަގީންކުރެއްވިފައި ނެތް އިރު މިއީ އެމްޑީޕީގެ ވެރިކަމެއްގައި ދައުރެއް ފުރިހަމަކުރަން ލިބޭ ފުރަތަމަ ފުރުސަތުވެސްމެއެވެ. އިންތިޚާބަށް ފަހު ރައީސް ދެއްކެވި ވާހަކައިގައި ވަރަށް ސާފުކޮށް ވިދާޅުވި ވާހަކަ އަކީ އިންތިޚާބުގައި ކީ ފާޑުކިޔުމާއި ވާދަވެރިކަމުގައި ދެއްކި ވާހަކަތަކާއި ގުޅިގެން އެއްވެސް ބޭފުޅަކާއި މެދު އެއްވެސް ކަމެއް ހިތްޕުޅުގައި ނެތްކަމުގެ ވާހަކައެވެ.
އަދި ގުޅިގެން ރިޔާސީ އިންތިޚާބު ކާމިޔާބުކުރުމަށް މަސައްކަތްކުރަން ވާދަވެރިންނަށް ގޮވާލައްވާކަމަށް ރައީސް އިބްރާހީމް މުހައްމަދު ޞާލިހު ވިދާޅުވިއެވެ. އަދި މަގްސަދަކަށް ވާންވީ އެމްޑީޕީ އާއި އެކު ކުރިއަށް ދިއުންކަމަށް ތަކުރާރުކޮށް ވިދާޅުވިއެވެ. ރިޔާސީ ޕްރައިމަރީ އިން ދެއްކީ ޑިމޮކްރަސީގެ ފުރިހަމަ ކުލަކަމަށް ފާހަގަކުރައްވާ ރައީސް އެދިލެއްވީ އެ ރީނދޫ ޖޯޝުގައި ރިޔާސީ އިންތިޚާބަށް އަތުކުރި އޮޅާލުމަށެވެ.
ރައީސް ވިދާޅުވި ފަދައިން އެމްޑީޕީ އަށް އަދި ކިރިޔާ މަސައްކަތް ފެށުނީއެވެ. މިހާރު ވާދަވެރިކަން ނިމުނީކަމަށް ހީކޮށް ފަހަތަށް ޖެހިއްޖެ ނަމަ އެ ކަމުގެ ފައިދާ ލިބޭނީ އެމްޑީޕީގެ ވާދަވެރިންނަށެވެ. އެކުގައި މަސައްކަތްކުރުމަށް އެކުވެރިކަމުގެ އަތްދިއްކޮށްލައްވާ އެކުގައި މަސައްކަތް ކުރުމަށް ރައީސް ވަނީ ވާދަވެރި ކެންޑިޑޭޓާއި އެބޭފުޅާގެ ޓީމަށް ގޮވާލައްވާފައެވެ. ދެން އޮތީ އެ ގޮވާލުމަށް ރައީސް މުހައްމަދު ނަޝީދާއި ޓީމުން އިޖާބަދޭ ގޮތެއް ބެލުމެވެ. ކޮންމެ ގޮތެއް ނިންމެވިއަސް އެމްޑީޕީގެ ކުރިމަގަށް މި ނިންމުމަކީ މުހިންމު ހަރުފަތަކަށް ވެގެން ދާނެއެވެ.
