އަހަރު ނިމުނުއިރު އެސްޓީއޯގެ ހިންގުމުގެ ފައިދާ ބިލިއަނަކަށް

2022 ވަނަ އަހަރު ނިމުނުއިރު ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) ގެ ހިންގުމުގެ ފައިދާ އެއް ބިލިއަން ރުފިޔާއަށް އަރާފައިވާ ކަމަށް އެ ކުންފުނީގެ ރިޕޯޓުތަކުން ދައްކައިފިއެވެ.

އެ ކުންފުނިން އާއްމުކޮށްފައިވާ މިދިޔަ އަހަރުގެ ހަތަރުވަނަ ކުއަރޓަރުގެ ރިޕޯޓުން ދައްކާ ގޮތުގައި އެ ކުންފުނީގެ 2022 ވަނަ އަހަރުގެ ހިންގުމުގެ ފައިދާ ވަނީ 2021 ވަނަ އަހަރާ އަޅާ ބަލާއިރު 400 މިލިއަން ރުފިޔާ އިތުރުވެފައެވެ. އެގޮތުން 2021 ވަނަ އަހަރު ނިމުނުއިރު ހިންގުމުގެ ފައިދާ ހުރީ 600 މިލިއަން ރުފިޔާގައެވެ.

މިދިޔަ އަހަރު ނިމުނުއިރު އެސްޓީއޯއަށް އާމްދަނީގެ ގޮތުގައި 18.2 ބިލިއަން ރުފިޔާ ލިބުނެއެވެ. މިއީ 2021 ވަނަ އަހަރާ އަޅާ ބަލާއިރު އަށް ބިލިއަން ރުފިޔާގެ އިތުރުވުމެކެވެ. 2021 ވަނަ އަހަރު އެ ކުންފުންޏަށް އާމްދަނީގެ ގޮތުގައި ލިބުނީ 10.2 ބިލިއަން ރުފިޔާއެވެ.

މިދިޔަ އަހަރު ނިމުނުއިރު އެ ކުންފުނީގެ އާމްދަނީއާއި ހިންގުމުގެ ފައިދާގެ އިތުރުން ސާފު ފައިސާ ވެސް ވަނީ ވަރަށް ބޮޑަށް އިތުރުވެފައެވެ. އެގޮތުން 2021 ވަނަ އަހަރު އެ ކުންފުންޏަށް 486 މިލިއަން ރުފިޔާގެ ސާފު ފައިދާ ލިބިފައިވާއިރު 2022 ވަނަ އަހަރު ސާފު ފައިދާގެ ގޮތުގައި ލިބޫ 742 މިލިއަން ރުފިޔާއެވެ.

2022 ވަނަ އަހަރުގެ 4 ވަނަ ކުއާޓަރަށް ބަލާއިރު އެސްޓީއޯއަށް ޖުމްލަ އާމްދަނީގެ ގޮތުގައި 4.59 ބިލިއަން ރުފިޔާ ލިބިފައިވާއިރު އެހެން ކުއާަރޓަރުތަކާ އަޅާބަލާއިރު ހަތަރުވަނަ ކުއަރޓަރުގައި ލިބުނު ސާފު ފައިދާ ވެސް ވަނީ އިތުރުވެފައެވެ. އެގޮތުން، މިދިޔަ އަހަރުގެ ހަތަރު ވަނަ ކުއާޓަރުގައި އެސްޓީއޯއަށް ސާފު ފައިދާގެ ގޮތުގައި 269 މިލިއަން ރުފިޔާ ލިބިފައިވެއެވެ.

މިދިޔަ އަހަރު އެސްޓީއޯގެ ހިންގުމުގެ ފައިދާ އެއް ބިލިއަން ރުފިޔާއަށް އަރާފައިވާއިރު މިއީ އެ ކުންފުނީގެ ތާރީހުގައި ވެސް ހިންގުމުގެ ފައިދާ ބިލިއަނަކަށް އެރި ފުރަތަމަ ފަހަރެވެ.