78 ވަނަ މިނެޓާ ހަމައަށްވެސް ފަހަތުގައި އޮތް ރެއާލް މެޑްރިޑުން ސްޕެނިޝް ކަޕް (ކޮޕަ ޑެލްރޭ) ގެ ސެމީފައިނަލުން ޖާގަ ހޯދައިފިއެވެ.

ރެއާލް މެޑްރިޑް ސްޕެނިޝް ކަޕްގެ ސެމީފައިނަލުން ޖާގަ ހޯދީ 3-1 ން ވާދަވެރި އެތްލެޓިކޯ މެޑްރިޑް ބަލިކޮށްގެންނެވެ. މެޗުގެ 78 ވަނަ މިނެޓާ ހަމައަށްވެސް 1-0 ން ކުރީގައި އޮތީ އެތްލެޓިކޯ މެޑްރިޑެވެ. އެއީ މޮރާޓާ 19 ވަނަ މިނެޓާގައި ޖެހި ގޯލުން ކުރި ހޯދައިގެންނެވެ. ރެއާލްއިން ނަތީޖާ ހަމަހަމަކުރީ 79 ވަނަ މިނެޓުގައި ރޮޑްރީގޯ ޖެހި ގޯލުންނެވެ. ރޮޑްރީގޯ ގޯލް ޖެހީ އެތްލެޓިކޯގެ ތިން ކުޅުންތެރިން ކައިރިން ނައްޓާފައެވެ. މެޗުގެ ފުރިހަމަ ވަގުތުގައި ނަތީޖާއަށް އިތުރު ބަދަލެއް ނައިސް އެއްވަރުވުމުން ކުޅުނު 15 މިނެޓްގެ ދެހާފްގައި އިތުރު ދެ ގޯލް ޖަހާ ރެއާލްއިން ސެމީފައިނަލަށް ދަތުރުކުރީއެވެ.

ނަތީޖާ ނެރުމަށް ކުޅުނު އިތުރު ވަގުތުގައި ރެއާލްގެ ދެ ލަނޑު ޖެހީ ބެންޒެމާއާއި ވިނީޝިއުސް ޖޫނިއަރއެވެ. އެކަމަކު އޭރު އެތްލެޓެކޯއިން ކުޅެމުން ދިޔައީ ދިހަ ކުޅުންތެރިންނާއެކުއެވެ. އެއީ 99 ވަނަ މިނެޓްގައި އެތްލެޓިކޯގެ ސެޓެފަން ސަވިކްއަށް ދެވަނަ ރީނދޫކާޑާއެކު ރަތްކާޑް ދެއްކުމުންނެވެ.

ރެއާލް މެޑްރިޑްގެ އިތުރުން ސެމީފައިނަލުން ޖާގަހޯދީ ބާސެލޯނާއާއި, ސޮސަސޫނާއާއި, އެތްލެޓިކް ބިލްބާއޯއެވެ. ސެމީފައިނަލްގެ ގުރުއަތުލުން އޮންނާނީ ހޯމަ ދުވަހުއެވެ.