ޖޫނިއަރ ޗެމްޕިއަންޝިޕްގައި އަތޮޅުތެރެއިން ދެޓީމް ވާދަކުރޭ

ޖޫނިއަރ ޗެމްޕިއަންޝިޕް ބާސްކެޓްބޯޅަ ފެސްޓިވަލް އަންނަ ފެބްރުއަރީ މަހުގެ ފުރަތަމަ ދުވަހު ފަށަން ބާސްކެޓްބޯޅަ އެސޯސިއޭޝަނުން ނިންމައިފިއެވެ.

މުބާރާތުގެ އަތޮޅު ތެރެއިން ދެޓީމް ވާދަކުރެއެވެ. އެއީ ހދ.ކުޅުދުއްފުށްޓާއި, ފުވައްމުލަކުންނެވެ. މާލެ ސަރަހައްދުން 18 ޓީމް ވާދަކުރެއެވެ. މިއީ ޖޫނިއަރ ޗެމްޕިއަންޝިޕްގެ މިވަރުގެ މުބާރާތެއްގައި އަތޮޅުތެރެއިން ބާސްކެޓް ބޯޅައިގެ ވާދަކުރާ ފުރަތަމަ ފަހަރުކަން އެމްބީއޭއިން ފާހަގަކުރެއެވެ. އެމްބީއޭއިން އެންމެ ބޮޑަށް ފާހަގަކުރާ ކަމަކީ ކޯވިޑްގެ ހުއްޓުމަށްފަހު އަނެއްކާވެސް ޖޫނިއަރ ޗެމްޕިއަންޝިޕްގައި ވާދަކުރާ ކުދިންނާއި, ޓީމްތަކުގެ އަދަދު ވަރަށްބޮޑު ތަނުން އިތުރުވަމުން އަންނަ އައުމެވެ.

ޖޫނިއަރ ޗެމްޕިއަންޝިޕް ރާވާފައިވަނީ ކުޅުންތެރިން ކުޅެން ލިބޭ މެޗުގެ އަދަދު އިތުރުކުރަން ވަރަށް ބޮޑަށް ވިސްނައިގެން ކަމަށާއި, އެންމެ އަވަހަށް ކަޓާ ޓީމެއްގެ ކުއްޖަކަށްވެސް ހަތް މެޗު, އަށް މެޗު ލިބޭނެކަމަށް އެސޯސިއޭޝަންގެ ރައީސް އަހުމަދު އާދަމް (އެޑަމް) ވިދާޅުވިއެވެ.

ޖޫނިއަރ ޗެމްޕިއަންޝިޕްގެ ސީނިއަރ ކެޓަގަރީ އޮންނާނީ ފެބްރުއަރީ 1-17 އަށެވެ. އަދި ދިހަ ދުވަހުގެ ބްރޭކަކަށްފަހު ޖޫނިއަރ ބައި ކުރިއަށްގެންދާނީ 1-18 މާރޗަށެވެ.