ނޫމަޑި މައްސަލާގައި ރައީސް މުއިއްޒަށް ގިނަ ތުހުމަތުތަކެއް ކުރައްވައި، ހޫނު ރައްދެއް

ނޫމަޑި މައްސަލާގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒަށް ގިނަ ތުހުމަތުތަކެއް ކުރައްވައި، ހޫނު ރައްދެއް ކުރީގެ ރައީސް އަބްދުﷲ ޔާމީން ދެއްވައިފިއެވެ.

އާދިއްތަ ދުވަހުގެ ރޭ ޕީއެންއެފްއިން ކުރިއަށް ގެންދިޔަ ޖަލްސާގެ އޯޑިއަންސްގައި އިންނަވައި ޔާމީން ވިދާޅުވީ ނޫމަޑީގެ އެއްބަސްވުން ބާތިލްކުރީ ރައީސް މުއިއްޒު ހައުސިން މިނިސްޓަރަކަށް ހުންނަވައިގެން ކަމަށާއި، އެކަމުގައި އިސްކޮށް އުޅުއްވީ ރައީސް މުއިއްޒު ކަމަށެވެ.

ޔާމީން ވިދާޅުވީ ނޫމަޑި މައްސަލަ އާބިޓްރޭޝަނަށް ދިޔައީ ރައީސް މުއިއްޒުގެ ދައުރެއް އޮވެގެން ކަމަށާއި، އޭރު ހައުސިން މިނިސްޓަރަކަށް ހުންނަވައި، ސަރުކާރަށް ގެއްލުންވާ ގޮތަށް އާބިޓްރޭޝަންގައި ބަޔާން ދެއްވާފައިވާ ކަމަށެވެ. އެކަން މިއަދު ސާބިތުވާ ކަމަށް ޔާމީން ވިދާޅުވިއެވެ.

ޔާމީން ވިދާޅުވީ އެމަނިކުފާނުގެ ވެރިކަމުގައި ނޫމަޑި އެގްރިމެންޓް ބަދަލުކުރިއިރު، ދިވެހިރާއްޖޭގެ ކޯޓަށް، އަދި އާބިޓްރޭޝަނަށް ނުދާ ކަމަށެވެ. އަދި ކޭސްއެއް ވެސް ނެތް ކަމަށެވެ.

އެމްޑީޕީގެ ސަރުކާރުގައި 55 މިލިއަން އެމެރިކާ ޑޮލަރު ބަދަލެއް ދޭން ޖެހިފައިވާތީ އެކަމަށް އިޝާރާތް ކުރައްވައި ޔާމީން ވިދާޅުވީ އެމައްސަލައިން ރައީސް މުއިއްޒު ރެކިވަޑައިގަތުމަށް ބަޔާން ނުދެއްވާ ކަމަށް އިތުރުފުޅު ހައްދަވާފައިވާ ކަމަށެވެ. މިއީ ރައީސް މުއިއްޒަށް ޖިނާއީ ހުކުމެއް އަންނަ މައްސަލައެއް ކަމަށް ޔާމީން ވިދާޅުވިއެވެ.

އޭރު އޮތީ އެމްޑީޕީ ވެރިކަމެއް ކަމަށާއި، ރައީސް މުއިއްޒާއި، އެމްޑީޕީން ވެސް ޑީލެއް ހެއްދެވީތޯ ޔާމީން ވަނީ ސުވާލު އުފައްދަވާފައެވެ.

ޔާމީން ވިދާޅުވީ ރައީސް މުއިއްޒު އިސްކޮށް ހުންނަވައިގެން ނޫމަޑި މައްސަލާގައި ދިވެހި ރައްޔިތުންނަށް ބޮޑު ގެއްލުމެއް ދީފައިވާ ކަމަށާއި، ބިލިއަނެއްހާ ފައިސާ ގެއްލިފައިވާ ކަމަށެވެ.

ނޫމަޑި މައްސަލާގައި ރައީސް މުއިއްޒުގެ މައްޗަށް ދައުވާ ސާބިތުނުވާކަމަށް ކްރިމިނަލް ކޯޓުން ވަނީ ނިންމާފައެވެ. އަދި އެ ނިންމުން އިސްތިއުނާފު ނުކުރުމަށް ވެސް ޕީޖީ އޮފީހުން ވަނީ ނިންމާފައެވެ.

ޕީޖީ އޮފީހުން ބުނީ މިމައްސަލަ އިސްތިއުނާފު ނުކުރުމަށް ނިންމި ނިންމީ ރައީސް މުއިއްޒު އާބިޓްރޭޝަނަށް ދިން ބަޔާނަށް އޭނާ އިންކާރުކުރާއިރު، އެ ބަޔާން ތަޙުލީކުކުރެވި، ޑޮކިއުމަންޓް އެގްޒެމިނޭޝަނެއް ހެދިފައިނުވުމާއި، އެ ޑޮކިއުމަންޓް ތަޙުލީލުކުރެވިފައިނުވަނީ އެ ޑޮކިއުމަންޓްގެ އަސްލު ތަހުގީގަށް ލިބިފައިނުވާތީއެވެ. ޑޮކިއުމަންޓް އެގްޒެމިނޭޝަން ހެދެނީ އަސްލު ލިޔުންތަކުގެއެވެ. ރައީސް މުއިއްޒު އެ ބަޔާނަށް އިންކާރުކުރާ ހާލަތުގައި، އެ ބަޔާނުގެ ސައްހަކަން ސާބިތުކުރުމަށް އިތުރު ހެކި ބޭނުންވާކަމަށް މައްސަލަ ބެއްލެވި ފަނޑިޔާރު ކަނޑައެޅުއްވި ކަނޑައެޅުއްވުމުގައި ގޯހެއް އޮތްކަމަށް ނުފެންނަ ކަމަށް ޕީޖީން ބުނެއެވެ.

މީގެ އިތުރުން ޕީޖީ އޮފީހުން ބުނީ ދައުލަތުން ހުށަހެޅި ހެކިންގެ ހެކިބަސް ޝަރީއަތުގެ މަރުހަލާގައި ރަނގަޅަށް ލިބިފައި ނުވުމާއި، ދައުވާއަކީ ކުޑަ ދައުވާއެއްކަމަށްވެފައި، ސާބިތުނުވާކަމަށް ނިންމެވި ގާނޫނީ އަދި ވާޤިއީ ސަބަބުތަކަށް ބަލާއިރު، ކޮށްފައިވާ ދައުވާ އިސްތިއުނާފުކޮށްގެން ވަކި ތަފާތު ނަތީޖާއެއް ނެރެވިދާނެ ފުރުސަތެއް އޮތްކަމަށް ނުފެންނަ ކަމަށެވެ.