ލުބްނާންގެ ހިޒްބުﷲ ގެ މަރުކަޒް ތަކަކަށް އިޒްރޭލުން ބޮން އަޅައިފި

ހޯމަ ދުވަހުގެ ރޭ އިޒްރޭލުން ލުބުނާނުގެ އިރުމަތީ ބެކާ ވެލީގައި ހުރި ހިޒްބުﷲ ގެ ހަތިޔާރު ގުދަނަކަށް ބޮން އަޅައިފި ކަމަށް ރޮއިޓާސް އިން ބުނެފިއެވެ.

އަލް އަރަބިއްޔާ އިން ބުނެފައިވަނީ ހިޒްބުﷲ އަށް ނިސްބަތްވާކަމަށް ބެލެވޭ ގިނަ ހަތިޔާރު ގުދަންތަކަކަށް ހަމަލާދީފައިވާ ކަމަށާއި، އެ ހަމަލާތައް ދެކުނު ލުބްނާންގެ ހަތަރު އަވަށަކަށް އަމާޒުވެފައިވާ ކަމަށެވެ.

ހަމަލާގައި މަރުވި މީހުންގެ އަދަދު ސާފު ނުވާކަމަށް ރިޕޯޓްތައް ބުނެއެވެ.

ހޮނިހިރު ދުވަހު ވެސް އިޒްރޭލު ސިފައިން ހިޒްބުﷲ ގެ މަރުކަޒްތަކަކަށް ހަމަލާ ދިން ކަމަށް ބުނެފައިވެއެވެ. މިގޮތުން އިޒްރޭލުން ބުނެފައިވަނީ ހިޒްބުﷲ ގެ ހަނގުރާމަވެރިން ބޭނުންކުރާ ހަތިޔާރު ގުދަނަކަށް ވައިގެ ހަމަލާއެއް ދީފައިވާ ކަމަށާއި، އެ ހަމަލާގައި މަދުވެގެން 10 މީހުން މަރުވެފައިވާ ކަމަށެވެ. އޭގެ ތެރޭގައި ދެ ކުޑަކުދިން ހިމެނެއެވެ.

އިޒްރޭލުން ހޯމަ ދުވަހު މި ދިން ހަމަލާ އާ ބެހޭ ގޮތުން ހިޒްބުﷲ އިން އަދި ވަކި އެއްޗެއް ބުނެފައެއް ނުވެއެވެ.