ކެލިފޯނިޔާގައި އަނެއްކާވެސް ބަޑީގެ ހަމަލާއެއްގައި 7 މީހުން މަރުވެއްޖެ
24 ޖެނުއަރީ 2023 | އަންގާރަ 10:20މިއީ ކެލިފޯނިޔާގައި ހަފުތާއެެއްގެތެރޭގައި ދެވުނު މިފަދަ ދެވަނަ ހަމަލާ
އެމެރިކާގެ ކެލިފޯނިޔާގައި ފުލުހުން، ބަޑިޖެހި މީހާ ހައްޔަރުކުރަނީ | ރޮއިޓާސް
އެމެރިކާގެ ކެލިފޯނިޔާގައި އަނެއްކާވެސް މީހަކު ދިން ބަޑީގެ ހަމަލާއެއްގައި ބަޔަކު މަރުވެއްޖެއެވެ. ހާފްމޫން ބޭ ސިޓީގައި މިއަދު ދިން ހަމަލާގައި ދެފަރމަކުން ހަތް މީހުން މަރުވެފައި ވެއެވެ. ހަމަލާ ދީފައިވަނީ އޭޝިޔާ ދަރިކޮޅުގެ، އުމުރުން 67 އަހަރުގެ ފިރިހެނަކަށް ވާއިރު، ހަމަލާގައި މަރުވެފައިވަނީ އޭނާއާއެކު ފަރމެއްގައި މަސައްކަތްކުރާ ޗައިނާ ނަސްލުގެ މީހުން ކަމަށް ޚަބަރުލިބެއެވެ. ހަމަލާދިން މީހާ ވަނީ އަމިއްލައަށް ޕޮލިސް ސްޓޭޝަނަށް ގޮސްފައެވެ. އެއާއެކު ފުލުހުން ވަނީ އޭނާ ހައްޔަރުކޮށްފައެވެ.
އަންގާރަ ދުވަހުގެ ހަމަލާގައި ސީރިއަސް ޒަޚަމްވި އެކަކަށް ހޮސްޕިޓަލުގައި ފަރުވާދެމުން ދާކަމަށް ޚަބަރުލިބެއެވެ.
މިއީ ކެލިފޯނިޔާގައި ހަފުތާއެއްގެތެރޭގައި ދެވުނު މިފަދަ ދެވަނަ ހަމަލާއެވެ.
މިދިޔަ ހޮނިހިރު ދުވަހުވެސް ކެލިފޯނިޔާގެ މަނިޓަރީ ޕާކް ކިޔާ ސިޓީގައި، އޭޝިޔާގެ ގައުމަކުން ހިޖުރަކޮށްފައިވާ އުމުރުން ދުވަސްވީ މީހަކު ބަޑިން ހަމަލާ ދިނުމުގެ ސަބަބުން 11 މީހުން މަރުވެފައި ވެއެވެ. ހަމަލާއާ ގުޅިގެން ފުލުހުން އޭނާގެ ގާތަށް ދާންފެށުމުން އޭނާ ވަނީ އަމިއްލައަށް މަރުވެފައެވެ.
މިގޮތަށް ބަޑިޖަހައި އެއްފަހަރާ ގިނަ ބަޔަކު މަރާލުމުގެ ފަހަތުގައިވަނީ ކޮން ސަބަބެއްތޯ އަދިވެސް ހޯދަމުން ދާކަމަށް ކެލިފޯނިޔާ ފުލުހުން ބުނެފައިވެއެވެ.
