ޅ.ހިންނަވަރުގައި އިމާރާތްކުރާ 100 ހައުސިން ޔުނިޓްގެ ބިންގާ އަޅައިފި

ޑިޒައިން އެންޑް ބިލްޑް އުސޫލުން ޅ. ހިންނަވަރުގައި އިމާރަތްކުރާ 100 ހައުސިންގ ޔުނިޓުގެ މަޝްރޫއުގެ ބިންގާ އަޅައިފިއެވެ.

ޅ. ހިންނަވަރުގައި އިމާރާތްކުރާ 50 ރޯހައުސް އާއި 50 ހައުސިންގ ޔުނިޓުގެ ބިންގާ އަޅާފައިވަނީ އާދިއްތަ ދުވަހު އެކަމަށްޓަކައި ބޭއްވި ޚާއްސަ ރަސްމިއްޔާތެއްގައެވެ. އެ ރަސްމިއްޔާތުގައި ހިންނަވަރުގައި އިމާރާތްކުރާ 50 ރޯހައުސް އާއި 50 ހައުސިންގ ޔުނިޓުގެ ބިންގާ އަޅުއްވައިދެއްވީ މި މިނިސްޓްރީގެ ސްޓޭޓް މިނިސްޓަރ އަކްރަމް ކަމާލުއްދީން އާއި، ހިންނަވަރު ދާއިރާގެ މެމްބަރު ޖީހާން މަހްމޫދު އަދިި ރަށު ކައުންސިލް މެމްބަރުންނެވެ.

ހިންނަވަރުގައި ޑިޒައިން އެންޑް ބިލްޑް އުސޫލުން އިމާރާތް ކުރުމުގެ މަސައްކަތް ދޮންބޭޒް ޕްރައިވެޓް ލިމިޓެޑް އާ ހަވާލުކޮށްފައިވަނީ މިދިޔަ އަހަރު ޖުލައިމަހުއެވެ.

މިއީ ދިވެހި ސަރުކާރުން 2022 ވަނަ އަހަރުގެ ޕީއެސްއައިޕީ ބަޖެޓުގައި ހިމަނައިގެން ކުރިއަށްގެންދާ މަޝްރޫއެކެވެ. މި އެއްބަސްވުމުގައި ސޮއިކޮށްފައިވަނީ 6 ޖުލައި 2022 ގައެވެ.

މި މަސައްކަތުގެ އަގަކީ -/83،807،840 (އައްޑިހަ ތިން މިލިއަން އަށްލައްކަ ހަތްހާސް އަށްސަތޭކަ ސާޅީސް ރުފިޔާ) އެވެ. މި މަސައްކަތް ނިންމުމުގެ މުއްދަތަކީ 365 ދުވަހެވެ.

މިނިސްޓްރީން މައުލޫމާތު ދޭ ގޮތުގައި މި މަޝްރޫއުގައި ހިމެނެނީ 700 އަކަފޫޓުގެ ދެ ބުރީގެ 50 ރޯ ހައުސްއާއި، 1000 އަކަފޫޓުގެ އެއް ބުރީގެ 50 ހައުސިންގ ޔުނިޓެވެ. ޔުނިޓެއްގައި ހިމެނެނީ 3 ކޮޓަރި، 3 ފާޚާނާ، ސިޓިންގ ރޫމް، ބަދިގެ، ކާގެ، ލޯންޑަރީ އަދި ސްޓޯރ ރޫމެވެ.

އޭގެ އިތުރުން، އިމާރާތުގެ ވަށާ ފާރާއި، ހައުސިންގ ޔުނިޓުތަކުގައި ދިރިއުޅޭ ފަރާތްތައް ހިތްފަސޭހަ މާހައުލެއް ޤާއިމު ކުރުމަށްޓަކައި ވެހިކަލް ޕާކް ކުރާ ސަރަޙައްދެއްވެސް ޤާއިމު ކުރެވިގެންދެއެވެ.