އިޓާލިއަން ލީގުގައި އެޓަލަންޓާއާ ދެކޮޅަށް ކުޅުނު މެޗުން ޔުވެންޓަސް އެއްވަރުވެއްޖެ އެވެ.

އާދިއްތަ ދުވަހުގެ ރޭ ޔުވެންޓަސްގެ އަމިއްލަ ދަނޑުގައި ކުޅުނު މެޗު ނިމުނީ 3-3 އިން އެއްވަރުވެގެންނެވެ. މިއީ އިޓަލީގެ ފުޓުބޯޅަ ފެޑެރޭޝަނުން ޔުވެންޓަސްގެ 15 ޕޮއިންޓު އުނި ކުރި ފަހުން ލީގުގައި އެ ޓީމު ކުޅުނު ފުރަތަމަ މެޗެވެ. ޔުވެންޓަސް އަށް ފިޔަވަޅު އަޅާފައި ވަނީ ޓްރާންސްފާގެ ކަންކަމުގައި މަކަރު ހެދުމާއި، ކުލަބުގެ މާލީ ލިޔެކިޔުންތައް އޮޅުވާލާފައިވާ ކަމަށް ބުނެ އެވެ.

މެޗު ފަށައިގެން ފަސް ވަނަ މިނެޓުގައި އެޓަލަންޓާ އިން ވަނީ ލަނޑު ޖަހައި ލީޑު ނަގައިފަ އެވެ. ޖެރެމިން ބޯގާ ތަނަވަސްކޮށްދިން ފުރުސަތެއްގައި އެޓަލަންޓާ އަށް ލީޑު ނަގައިދިނީ އަޑެމޮލާ ލުކްމަން އެވެ. ނަމަވެސް މެޗުގެ 25 ވަނަ މިނެޓުގައި ލިބުނު ޕެނަލްޓީއެއްގައި އެންހެލް ޑި މާރިއާ ވަނީ ޔުވެންޓަސް އަށް މެޗުގެ ނަތީޖާ ހަމަހަމަކޮށްދީފަ އެވެ. މެޗުގައި ފުރަތަމަ ފަހަރަށް ޔުވެންޓަސް އަށް ލީޑު ނަގައިދިނީ އަކަންޑިއުޒް މިލިކް އެވެ. އެެއީ ޔުވެންޓަސްގެ ނިކޯލޯ ފަޖިއޯލީ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. ދެ ވަނަ ހާފު ފަށައިގެން މިނެޓެއްގެ ތެރޭގައި އެޓަލަންޓާ އިން ވަނީ މެޗުގެ ނަޓީޖާ ހަމަހަމަކޮށްފަ އެވެ. ފުރަތަމަ ލަނޑު ޖަހައިދިން ލުކްމަންގެ އެހީތެރިކަމާއެކު އެ ޓީމުގެ ދެ ވަނަ ލަނޑު ޖެހީ ޔަކީމް މޭލާ އެވެ. އޭގެ ފަހުން 53 ވަނަ މިނެޓުގައި އެޓަލަންޓާގެ ލުކްމަން ވަނީ އޭނާގެ ދެ ވަނަ ލަނޑު ޖަހައި ޓީމަށް ލީޑު ނަގައިދީފަ އެވެ. މެޗުން ޔުވެންޓަސް ސަލާމަތްކޮށްދިނީ ޑަނީލޯ އެވެ. އެއީ ޑި މާރިއާގެ އެހީތެރިކަމާއެކު މެޗުގެ 65 ވަނަ މިނެޓުގައި އޭނާ ޖެހި ލަނޑުންނެވެ.

މެޗު އެއްވަރުވެ ޔުވެންޓަސް އޮތީ ލީގު ތާވަލްގެ ނުވަ ވަނައިގަ އެވެ. އެއީ ކުޅުނު 19 މެޗުން ލިބިފައިވާ 23 ޕޮއިންޓާއެކު އެވެ. އެޓަލަންޓާ އޮތީ 35 ޕޮއިންޓާއެކު ފަސް ވަނައިގަ އެވެ.