ލީގު ތައްޓާ އެކު ޔުވެންޓަސް އަށް ރެކޯޑެއް

އިޓާލިއަން ސެރީއާގައި ކްރޮޓޯނޭ އަތުން މޮޅުވެ ލީގުގެ ޗެމްޕިއަންކަން ހޯދާ ޔުވެންޓަސް އިން ރެކޯޑެއް ހަދައިފިއެވެ.

އާދިއްތަ ދުވަހުގެ ރޭ ކްރޮޓޯނޭ އަތުން 0-3 އިން މޮޅުވެ ޔުވެންޓަސް އިން ރެކޯޑެއް ހަދާފައި ވަނީ ޖެހިޖެހިގެން 6 ވަނަ ފަހަރަށް ލީގު އުފުލާލައިގެންނެވެ.

މީގެ ކުރިން ވިދިވިދިގެން އެންމެ ގިނައިން ލީގު ނަގާފައިވަނީ ފަސް ފަހަރުއެވެ. އެގޮތުން އިންޓަ މިލާނާއި ޓޮރިނޯއާ ޔުވެންޓަސް ވެސް ވަނީ ވިދިވިދިގެން ފަސް ފަހަރު ލީގު ނަގާފައެވެ.

ޔުވެންޓަސް އިން ވިދިވިދިގެން ފަސް ފަހަރު ލީގު ޗެމްޕިއަންކަން ހޯދާފައިވަނީ ހެދީ 1931-1935އާ ދެމެދު އެވެ. އޭގެ ފަހުން ޓޮރިނޯ އިން 1940ގެ އަހަރުތަކުގައި ވިދިވިދިގެން ފަސް ފަހަރު ހޯދިއެވެ.

އިންޓަމިލާނުން ވިދިވިދިގެން ފަސް ފަހަރު ލީގު ހޯދާފައިވަނީ 2006 އިން 2010 ދެ މެދުގައެވެ.

ތިން ކުލަބަކުން ހިއްސާ ކުރަމުން އައި ރެކޯޑް ޔުވެންޓަސް ފަހަތަށް ޖައްސާލުމަށް ފަހު 2012 އިން ފެށިގެން 2017 ވަނަ އަހަރު ސީޒަނާއި ހަމައަށް ވިދިވިދިގެން ވަނީ ހަ ލީގު ހޯދާ ރިކޯޑް އާކޮށްފައެވެ.

މި ސީޒަނުގައި މިހާތަނަށް ދެ ތައްޓެއް ހޯދާފައިވާ ޔުވެންޓަސް އަށް ތިން ތައްޓާއެކު ސީޒަން ނިންމާލުމުގެ ފުރުސަތު އެބައޮތެވެ. އެގޮތުން އިޓާލިއަން ކަޕާއި އިޓާލިއަން ލީގު ކާމިޔާބުކޮށްފައިވާ ޔުވެންޓަސް ޗެމްޕިއަންސް ލީގު ކާމިޔާބުކުރުމުގެ ފުރުސަތު ވެސް އެބައޮތެވެ.

އެއް ސީޒަނެއްގައި ތިން މުބާރާތުގެ ޗެމްޕިއަންކަން ހޯދުމުގެ ގޮތުން ޔުވެންޓަސް އެންމެފަހު ފައިނަލަށް ނުކުންނާނީ އަންނަ މަހުގެ 3 ވަނަ ދުވަހުގެރޭ ރެއާލް މެޑްރިޑާ ދެކޮޅަށެވެ.

އާދިއްތަ ދުވަހުގެ ރޭގެ މެޗުގައި ޔުވެންޓަސްއަށް ލަނޑުތައް ޖަހައިދިނީ މާރިއޯ މަންޒުކިޗާއި ޕައޮލޯ ޑީބަލާ އަދި އެލެކްސް ސަންޑްރޯ އެވެ.

މި މޮޅާއިއެކު ޔުވެންޓަސް 88 ޕޮއިންޓް ހަމަކޮށްފައިވާއިރު ދެ ވަނައިގައި 84 ޕޮއިންޓާ އެކު އޮތް ރޯމާ އަށް ފަހު މެޗުން މޮޅުވިޔަސް ހަމަކުރެވޭނީ 87 ޕޮއިންޓެވެ.