ސްވިޑެންގައި ޤުރުއާން އަންދައި އަޑުއުފުލުމަށް ރާވާފައިވާ ރޭވުން ހުއްޓުވުމަށް ތުރުކީން ސްވިޑެންްގެ ސަރުކާރަށް ގޮވާލައިފިއެވެ.
ހޮނިހިރު ދުވަހު، ތުރުކީގެ ފޮރިން މިނިސްޓަރު މެވްލުޓް ކަވުސޮގްލޫ ވަނީ ސްވިޑެންގައި ޤުރުއާން އެންދުން ހިމަނައިގެން ކުރިއަށްގެންދަން ރާވާފައިވާ ރޭވުން، އެގައުމުގެ ސަރުކާރުން ހުއްޓުވާނެ ކަމަށް އުންމީދު ކުރައްވާކަމަށް ވިދާޅުވެފައެވެ.
މިކަމުގެ ކަންބޮޑުވުން ފާޅުކޮށްފައިވަނިކޮށް ވެސް އެގައުމުގައި ކުރިއަށްގެންދަން ރާވާފައިވާ އަޑުއުފުލުމުގެ ތެރޭގައި ޤުރުއާން އެންދުމުގެ ފުރުސަތި ދީފައިވާތީ ތުރުކީގެ ފޮރިން މިނިސްޓަރު ވަނީ ކަންބޮޑުވުން ފާޅުކުރައްވާފައެވެ. އަދި މިކަން މިގޮތަށް ވިޔަ ނުދިނުމަށް އަޅަންޖެހޭ ހުރިހާ ފިޔަވަޅެއް ސްވިޑެންގެ ސަރުކާރުން އަޅާނެކަމަށް އުންމީދުކުރާކަމަށް ތުރުކީގެ މިނިސްޓަރު ވިދާޅުވިއެވެ.
ތުރުކީގެ މިނިސްޓަރު ވަނީ ސްވިޑެންގައި ރާވާފައިމިވާ އަޑުއުފުލުމަކީ ޚިޔާލުފާޅުކުރުމުގެ މިނިވަންކަމުގެ ތެރޭގައި ގުނޭނެކަމެއް ނޫންކަމަށް ވެސް ވިދާޅުވެފައެވެ.
ސްޓޮކްހޮމްގައި މިގޮތަށް މުޒާހަރާކުރުމުގެ ފުރުސަތު ސްވިޑެންގެ ސަރުކާރުން ދިނުމާއެކު، އެގައުމުގެ ޑިފެންސް މިނިސްޓަރު ތުރުކީއަށް ކުރައްވަން ރާވާފައިވާ ރަސްމީ ދަތުރުފުޅު ވެސް ކެންސަލްކޮށްލާފައިވާކަމަށް ހޮނިހިރު ދުވަހު، ތުރުކީގެ ޑިފެންސް މިނިސްޓަރު ހުލުސީ އަކަރް ވަނީ އިއުލާނުކުރައްވާފައެވެ.
