އެމްޑީޕީގެ ބައެއް މެމްބަރުން، އިދިކޮޅުން ނުދޭހާ ގެއްލުން މި ސަރުކާރަށް ދީފި: މަހުލޫފު
މައްސަލައަކީ ވަކި ބޭފުޅަކު ވިދާޅުވާގޮތަކަށް ކެބިނަޓަށާއި ސިޔާސީ މަގާމުތަކަށް މީހުން އައްޔަން ނުކުރެއްވުން
މަހުލޫފު
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ބައެއް މަޖިލިސް މެމްބަރުން ފާއިތުވި ހަތަރު އަހަރު ދުވަހުގެ ތެރޭގައި އިދިކޮޅުގެ މެމްބަރުން ނުދޭވަރަށް ސަރުކާރަށް ގެއްލުން ދީފައިވާކަމަށް، ޔޫތު މިނިސްޓަރު އަހުމަދު މަހުލޫފު ވިދާޅުވެއްޖެއެވެ.
މަހުލޫފު މިފަދައިން ވިދާޅުވީ "އެމްޑީޕީ ކުރިއަށް"ގެ ނަމުގައި ހުކުރު ދުވަހުގެ ރޭ އާޓިފިޝަލް ބީޗުގައި ބޭއްވި، ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ޕްރައިމަރީ ކެމްޕޭން ޖަލްސާގައި ވާހަކަފުޅުދައްކަވަމުންނެވެ. އެގޮތުން، އެމްޑީޕީގެ ބައެއް މެމްބަރުން ސަރުކާރާމެދު ހިތްހަމަނުޖެހެނީ އެ ބަޔަކު ބޭނުންވާ ބޭފުޅަކު ވެރިކަމުގައި ނެތުމުގެ ސަބަބުން ކަމަށާއި، ބޭނުންގޮތަށް ވެރިކަން ކުރައްވަމުން ނުގެންދަވާތީކަން މަހުލޫފު ފާހަގަ ކުރެއްވިއެވެ.
އޭނާ ވިދާޅުވީ، އެމްޑީޕީގެ މެމްބަރުން އިދިކޮޅުގެ މެމްބަރުންނަށްވުރެ ބޮޑަށް އަދުގެ ސަރުކާރުގެ އިތުބާރު ގެއްލުވާލަން މަސައްކަތްކޮށްފައި ވާކަމަށެވެ. އެގޮތުން، މި ސަރުކާރުން ކުރިއަށްގެންދާ މަޝްރޫއުތަކަކީ ބިލާހެއްކަމަށް ހެދުމަށް މަސައްކަތްކުރަމުން އަންނަކަމަށާއި، އެ ހަދާ ދޮގުތައް ތެދުކަމަށް ރައްޔިތުން ގަބޫލުކުރާވަރު ކުރިކަމަށްވެސް އޭނާ ވިދާޅުވިއެވެ.
ވެރިކަމަށް ވާދަކުރުމާއި ޝައުގުވެރިކަން ފާޅުކުރުމަކީ ކޮންމެ މީހަކަށްވެސް ލިބިގެންވާ ހައްގެއްކަން ފާހަގަކުރައްވައި މަހުލޫފު ވިދާޅުވީ، އެހެންނަމަވެސް އެމްޑީޕީން ވެރިކަމަށް އައުމަށް އޮޅުވާލުމާއި މަކަރާއި ދޮގު ހަދައިގެން އެކަން ކުރާން މަސައްކަތް ކުރާނަމަ، އެކަމާ ހިތާމަކުރައްވާ ކަމަށެވެ. އަދި އަމިއްލަ ޕާޓީ ތަމްސީލުކުރައްވާ ވެރިޔަކު ހުންނެވިއިރު، އެ ވެރިޔާއަށާއި ސަރުކާރަށް ވައްކަމުގެ ތުހުމަތާއި ބޮޑެތި ޖަރީމާތަކުގެ ތުހުމަތު އެޅުވުންވެސް ގަބޫލުނު ނުކުރެއްވޭނެ ކަމަށް އޭނާ ވިދާޅުވިއެވެ.
މަހުލޫފު މިފަދައިން ވިދާޅުވީ ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އެމްޑީޕީ ޕްރައިމަރީގައި ވާދަކުރައްވައި، ރައީސް ސާލިހުއާއި ސަރުކާރަށް ފާޑުކިޔުއްވަމުން ގެންދަވާތީއެވެ. އެގޮތުން، ރައީސް ނަޝީދު ވަނީ ޕްރައިމަރީ ކާމިޔާބު ނުކުރެއްވިއްޖެނަމަ ރައީސް ސާލިހާއެކު މަސައްކަތްޕުޅު ނުކުރައްވާނެ ކަމަށާއި، އޭރުން ހުންނަވާނީ ގޭގައި ކަމަށް ވިދާޅުވެފައެވެ.
ރައީސް ނަޝީދުގެ އިތުރުން އެމަނިކުފާނަށް ތާއީދު ކުރައްވާ އެމްޑީޕީގެ އިސް ބައެއް ފަރާތްތަކުންނާއި ރައްޔިތުންގެ މަޖިލީހުގައި ތިއްބަވާ އެ ޕާޓީގެ ބައެއް މެމްބަރުންވެސް ގެންދަވަނީ ސަރުކާރަށާއި ރައީސަށް ވަރަށް ބޮޑަށް ފާޑުކިޔަމުންނެވެ.
