ފަހި ދިރިއުޅުން ކޯޕަރޭޝަނުން އަޅާ ހައުސިންގ ޔުނިޓްތަކުގެ މަސައްކަތް ކުރިއަށްދާ ގޮތް ރައީސް ބައްލަވާލައްވައިފި
ޕްރޮޖެކްޓްގެ ދަށުން އަޅަން ހަމަޖެހިފައި ވަނީ 650 އަކަފޫޓުގެ، ދެ ކޮޓަރީގެ އެޕާޓްމެންޓާއި 900 އަކަފޫޓުގެ 3 ކޮޓަރީގެ އެޕާޓްމެންޓް
ފަހި ދިރިއުޅުން ކޯޕަރޭޝަނުން އަޅާ ހައުސިންގ ޔުނިޓްގެ މަސައްކަތް ކުރިއަށްދާ ގޮތް ރައީސް ބައްލަވާލެއްވުން
ފަހި ދިރިއުޅުން ކޯޕަރޭޝަނުން އަޅާ 4،000 ހައުސިން ޔުނިޓްގެ މަސައްކަތް ކުރިއަށްދާ ގޮތް ރައީސް އިބްރާޙިމް މުހައްމަދު ޞާލިހު ބައްލަވާލައްވައިފިއެވެ.
ހުކުރު ދުވަހު ރައީސް ވަނީ ފަހި ދިރިއުޅުން ކޯޕަރޭޝަންގެ ހައުސިން އެކްސްޕީރިއެންސް ޔުނިޓް ލޯންޗްކޮށްދެއްވާފައެވެ. ފަހިދިރިއުޅުން ކޯޕަރޭޝަނުން ބުނިގޮތުގައި މިހާރު ހައުސިން ޔުނިޓުގެ އެކްސްޕީރިއެންސް 2 ޔުނިޓް ވަނީ ހަދާފައެވެ. އަދި އާއްމުންނަށް އެ އެކްސްޕީރިއަސްންސް ސެންޓަރ ހުޅުވާލަނީ ހޮނިހިރު ދުވަހުއެވެ. އެކްސްޕީރިއަންސް ސެންޓަރ ތަޖުރިބާކޮށްލެވޭނީ މެންދުރު 2 އިން ފެށިގެން 4 ގަޑި އިރަށެވެ.
ރައީސް ވަނީ ހުކުރު ދުވަހު އެ މަސައްކަތް ކުރިއަށްދާ ގޮތުގެ މައުލޫމާތު އޮޅުންފިލުއްވާ އެތަނުގެ އަމަލީ މަސައްކަތް ކުރިއަށް ދާ ގޮތް ބައްލަވާލައްވާފައެވެ. އެ ޕްރޮޖެކްޓްގެ ދަށުން އަޅަން ހަމަޖެހިފައި ވަނީ 650 އަކަފޫޓުގެ، ދެ ކޮޓަރީގެ އެޕާޓްމެންޓާއި 900 އަކަފޫޓުގެ 3 ކޮޓަރީގެ އެޕާޓްމެންޓެވެ. ޕްރޮޖެކްޓްގެ މަސައްކަތްކުރިއަށް ދަނީ 2 ފޭސް އަކަށް ބަހާލައިގެންނެވެ. މި އަހަރު ތެރޭގައި 13 ޓަވަރުގެ މަސައްކަތް ނިންމާ މީހުން އާބާދުކުރެވޭނެ ކަަމަށް ލަފާކުރެވެއެވެ.
ހުޅުމާލެ ދެ ވަނަ ފިޔަވަހީގައި 4،000 ހައުސިން ޔުނިޓް އަޅަނީ އިންޑިއާގެ އެގްޒިމް ބޭންކާ ދެމެދު ވެވުނު ލޯނު އެއްބަސްވުމެއްގެ ދަށުންންނެވެ. އެގްޒިމް ބޭންކާ ފަހި ދިރިއުޅުން ކޯޕަރޭޝަނާ ދެމެދު ސޮއިކޮށްފައި ވަނީ 267 މިލިއަން ޑޮލަރުގެ ބަޔާސް ކްރެޑިޓް ފެސިލިޓީއެއްގަ އެވެ. މި ފެސިލިޓީއަކީ ފަހި ދިރިއުޅުން ކޯޕަރޭޝަނުން އިންޑިއާގެ ދެ ކުންފުންޏަކާ އެކު ހުޅުމާލެ ދެ ވަނަ ފިޔަވަހީގައި އިމާރާތް ކުރުމަށް ހަމަޖެހިފައިވާ 4000 ސޯޝަލް ހައުސިން ޔުނިޓު ތަރައްގީކުރުމަށް ސަރުކާރުގެ ސަވަރިން ގެރެންޓީގެ ދަށުން ހަމަޖެހިފައިވާ ދެ ލޯނެވެ. މިއީ 130 މިލިއަން ޑޮލަރުގެ ލޯނަކާއި 137 މިލިއަން ޑޮލަރުގެ ލޯނެކެވެ.
