މި ދުނިޔޭގެ އާބަދީ، 8 ބިލިއަންގެ ފާހަގަ ހުރަސް ކުރިތާ އަދި އަހަރެއްހާ ދުވަސް ނުވެއެވެ. މީގެ ތެރެއިން އެންމެ ގިނަ މީހުން ނިސްބަތް ވަނީ ކޮން ޤައުމަކަށްތޯ، ނުވަތަ، ދުނިޔޭގެ ނިސްބަތުން ބަލާއިރު، އާބާދީ އެންމެ ބޮޑު ޤައުމަކީ ކޮބައިތޯ ސުވާލު ކޮށްފި ނަމަ، ކޮންމެ މީހެއްގެ ދުލު ކުރިއަށްވެސް އެންމެ ފުރަތަމަ އަންނާނެ ނަމަކީ ޗައިނާކަމާ މެދު އޮތް ޔަޤީންކަން ފިސާރި ބޮޑެވެ. ކަން އޮތީވެސް އެހެނެވެ. އެންމެ ފަހުގެ ތަފާސް ހިސާބުތަކަށް ބަލާއިރު ޗައިނާގެ އާބާދީ އުޅެނީ 1.453 ބިލިއަނަށްވުރެ މަތީގައެވެ.
ނަމަވެސް، އެކަން ބަދަލުވުން އޮތީ ދާދި ގާތުގައެވެ. އާބާދީގެ ނިސްބަތުން ޗައިނާއާ އެންމެ ކައިރިން ވާދަ ކުރާ އިންޑިއާގެ އާބާދީ މިހާރު އުޅެނީ 1.415 ބިލިއަންގައެވެ. އިންތިހާ ގާތް މުސްތަޤުބަލެއްގައި، ޗައިނާ ކަޑަތުކޮށް، އިންޑިއާގެ އާބާދީ އިތުރުވެދާނެ ކަމަށް އަންދާޒާތަކުން ދައްކައެވެ. ކަން މިހެން އޮތް އިރު، ޗައިނާއިން އަޅަމުން ދާ ރަނގަބީލުންވެސް އިވެނީ ހަމަ އެފަދަ އަޑެކެވެ. ނިމިދުޔަ 2022 ވަނަ އަހަރަކީ، ޗައިނާގެ އާބާދީ އިތުރުވި މިންވަރު ދަށަށް ދިޔަ އަހަރެކެވެ. މިއީ ފާއިތުވީ 60 އަހަރު ދުވަހުގެ ތެރޭގައިވެސް އެކަން އެގޮތަށް ދިމާވި ފުރަތަމަ އަހަރެވެ. މިއީ ޗައިނާ މީހުންގެ އާބާދީ މަދުވުމުގެ ތާރީޚީ ފެށުމެއް ކަމަށްވެސް ބުނެވެއެވެ. އެކަމެއްގެ ސަބަބުން ޗައިނާއާއި މުޅި ދުނިޔެއަށްވެސް އަސަރު ފޯރާނެ ކަމެކެވެ.
ޗައިނާގެ ނޭޝަނަލް ބިއުރޯ އޮފް ސްޓެޓިކްސް ނުވަތަ ތަފާސް ހިސާބުތަކާ ބެހޭ އިދާރާއިން އާންމު ކޮށްފައި ވާ ތަފާސް ހިސާބުތަކަށް ބަލާއިރު، 2022 ވަނަ އަހަރު އެ ޤައުމުގެ އާބާދީ ވަނީ 1.41175 ބިލިއަނަށް އަރާފައެވެ. ނަމަވެސް އެ އަހަރު އަލަށް އުފަންވީ ކުދީންނަށް ބަލާއިރު، އެ ޢަދަދު އުޅެނީ 850000 އަށް ވުރެ މަދު ނިސްބަތެއްގައެވެ.
މިކަން މިހެން އޮތް ކަމުގައި ވީ ނަމަވެސް، ޗައިނާގެ ރައްޔިތުން މިހާރު ތިބީ އާބާދީ އިތުރު ކުރާ ފަދަ ފިކުރެއްގައެވެ. ޖެނުއަރީ 17 ވަނަ ދުވަހު މީޑިއާއާއި ވާހަކަދެއްކި، ޗައިނާގެ ބައެއް ރައްޔިތުންގެ ފަރާތުން ލިބުނު ޖަވާބަކީވެސް އެއީއެވެ.
ފުރަތަމަ ކަމަކަށް، އާބާދީގައި ދޮށީ އުމުރުގެ މީހުން ގިނަ ވާތީ އަހަރެން ވަރަށް ކަންބޮޑުވޭ. އާބާދީ އިތުރުވާ ނިސްބަތް މިއުޅެނީ ނެގެޓިވްކޮށް. ހާއްސަކޮށް، އަހަރަމެންގެ ޖީލުގަ. 1990ގެ ފަހުން ވިހޭ ކުދިންގެ މެދުގަ... އަހަރަމެންގެ ތެރޭގަ ގިނައީ ދެމަފިރިއެއްގެ ހުރި ހަމައެކަނި ދަރީގެ ގޮތުގަ ތިބި ކުދިން. އަހަރަމެން ކައިވެނި ނުކުރާހާ ހިނދަކު، މައިންބަފައިން ބަލަން ޖެހެނީ އަންހެން ކުއްޖާއަށް. މާމަ/ކާފަމެން ދުނިޔޭގެ ތިބިއްޔާ އެމީހުންވެސް ބަލަން ޖެހެނީ އެކުއްޖާއަށް. އެހެންވެ، ކޮންމެ މީހެއްގެ ކޮނޑުގަ އެޅިފަ އޮތް ޒިންމާވެސް ވަރަށް ބޮޑު. މާލީ ތަކުލީފުތައް އެއްފަރާތްކޮށްފަ ބެލިއަސް، ވަގުތާއި ހަކަތައަށް ބަލާއިރު، އަހަރަމެންގެ ޖީލަށް އުފުލަންޖެހިފަ އޮތް ބުރަ ވަރަށް ބޮޑު.ވޭންގް؛ ބީޖިންގްގައި މަސައްކަތް ކުރާ 26 އަހަރުގެ ޒުވާނެއް
ވެރިކަން ކުރާ ބީޖީންގްގައި ވަޒަންވެރިވެގެން އުޅޭ، ޢުމުރުން 44 އަހަރުގެ ރައްޔިތެއް ކަމަށް ވާ ލީ ބުނި ގޮތުގައި، ދެވަނަ ދަރިއަކު ނުވަތަ 3 ވަނަ ދަރިއަކު ހޯދުމަކުން، އަސާސީ މައްސަލަ ހައްލު ވާނެ ކަމަކަށް ނުބެލެވެއެވެ. އޭގެ ސަބަބުތައްވެސް އޭނާ ކިޔައިދިނެވެ.
ދެ ދަރިން ނޫނީ 3 ދަރިން ހޯދަން ހުއްދަ ދީގެންވެސް މަށަކަށް ހިއެއް ނުވޭ އަސާސީ މައްސަލައަށް ހައްލެއް ލިބޭނެހެނެއް. ފުރަތަމަ ކަމަކީ، ދަރިއަކު ބަލާ ބޮޑު ކުރުމުގެ ޚަރަދު އިންތިހާއަށް ބޮޑުވުން. އެންމެ ޅަފަތުގެ ދުވަސްވަރުން ފެށިގެން ސްކޫލް ދައުރު ނިންމާ، ވަޒީފާއަކަށް ގޮސް، މީހުންނާ އިނދެ، ދަރިން ހޯދުމާ ހިސާބަށްވެސް ދިރިއުޅުމުގެ ޚަރަދުތައް ވަރަށް ބޮޑު. އަހަރަމެންގެ ނެތް 2 ވަނަ ދަރިއަކު ހޯދުމުގެ ވިސްނުމެއް.ލީ، ބީޖިންގްގެ ރަށްވެއްސެއް
ޗައިނާއަކީ ދުނިޔޭގެ އުފެއްދުންތެރިކަމާއި ސިނާޢީ މަސައްކަތްތެރިކަމުގެ އިންޖީނެވެ. އިޤްތިޞާދީ ރޭހުގެ މުގޫ ކޮންޓްރޯލް ކުރުމުގެ މުހިންމު ދައުރު، ޗައިނާއިން އަދާ ކުރާ ފަހަރުތައްވެސް މަދެއް ނޫނެނެވެ. ޗައިނާގެ އާބާދީ ދަށްވުމުގެ ސަބަބުން، ދުނިޔެއަށްވެސް އަސަރުތަކެއް ފޯރާނެ ކަމަށް ބައެއް ފަރާތަކުން ބުނަމުން ދިޔަ ނަމަވެސް، ޗައިނާގެ ތަފާސް ހިސާބުތަކާ ބެހޭ އިދާރާގެ އިސްވެރިޔާ، ކާންގް ޔީގެ ވާހަކަ ތަފާތެވެ.
އދގެ ތަޖުރިބާކާރުންގެ ޓީމުން އަންދާޒާ ކުރާ ގޮތުގައި 2050 ވަނަ އަހަރު އަންނައިރު ޗައިނާގެ އާބާދީ، ނިސްބަތުން 109 މިލިއަން ދަށަށް ދާނެއެވެ. މިއީ މީގެ ކުރިން، 2019 ވަނަ އަހަރު އެކުލަވާލި އަންދާޒާތަކާ އަޅާ ބަލާއިރު 3 ގުނަ ހީނަރު ޢަދަދެކެވެ.
އަހަރަމެން އުފަންވީ 1980ގެ އަހަރުތަކުގެ ތެރޭގަ. ކޮންމެ ދެމަފިރިއެއްގެވެސް ހަމައެކަނި ދަރި ހުރި ދުވަސްވަރު. އަހަރަމެން 2 މީހުންނަށް ބަލާނަމަ، މައިންބަފައިންގެ ޢަދަދު 4 އަށް އަރާ. އަހަރަމެންގެ މާމަ/ކާފަމެންވެސް އެބަތިބި. ދޮށީ ޢުމުރުގެ 4 މީހުން ބަލަން އެބަޖެހޭ އަހަރަމެންނަށް. މިހާރު ސަރުކާރުން އެދަނީ، އަހަރަމެން 3 ދަރިން ހޯދަން ބާރު އަޅަމުން. އަހަރަމެންނަކަށް ނެތް އެ ޚަރަދުތައް ދެކޮޅުޖެއްސޭކަށް. އަހަރަމެން 3 ވަނަ ދަރިއަކު ހޯދައިފިއްޔާ، ކާކު އެ ތުއްތު ދަރިފުޅު ބަލާނީ؟ މިއީ ވަރަށް ސީރިއަސް މައްސަލައެއް. 3 ދަރިން ލިބުމުގެ މާނައަކީ، އެއިން ކޮންމެ ކުއްޖަކަށް ގޯއްޗެއްގެ ނިސްބަތުން، އަހަރަމެން އެބަޖެހެއޭ 3 ގެވެސް ގަންނަން. 3 ދަރިންނަށް ވަޒީފާވެސް ހޯދާދޭން އެބަޖެހޭ. ދެން އެ 3 ދަރިން، އަނެއްކާ އެއިން ކޮންމެ ކުއްޖަކު 3 ދަރިން ހޯދައިފިއްޔާ، އަހަރަމެންނަކަށް ނުވާނެ ހަމަ އެކަމެއް.ސޯންގް؛ ބީޖިންގްގެ ރަށްވެއްސެއް
ދުނިޔޭގެ އެންމެ އާބާދީ ބޮޑު ޤައުމުގެ މަޤާމުން ޗައިނާ ވައްޓާލުމަށް ފަހު، އެ މަޤާމަށް އިންޑިއާ އަރަން މާ ގިނަ ދުވަހެއް ނެތް ކަމަށް އދގެ ތަފާސް ހިސާބުތަކުން ދެއްކީ ނިމިދިޔަ 2022 ވަނަ އަހަރުގެ ޖުލައި މަހުގެ ތެރޭގައެވެ. މުޅި ދުނިޔެ އިނދަޖައްސާލީ ކޮރޯނާވައިރަސް ޑިޒީޒް (ކޮވިޑް-19)ގެ ފުރަބަދަންދާ ގުޅިގެން، އަލަށް އުފަންވާ ކުދިންގެ ޢަދަދު އިތުރުވާހެން ހީވި ކަމުގައި ވީ ނަމަވެސް، ދުނިޔޭގެ އާބާދީ އިތުރު ވާ ރޭޓް މިހާރު ހުރީ 1950 ވަނަ އަހަރަށް ފަހު އެ ރޭޓް ހުރި އެންމެ ލަސް ދުވެލީގައި ކަމަށް އދއިން އޭރު ވަނީ ބުނެފައެވެ. ނަމަވެސް ދުނިޔޭގެ އާބާދީ އިތުރު ވަމުން ދަނީ އެކި ސަރަހައްދުތައް އެކި މިންވަރަށް ކަން ފާހަގަ ކުރަން ޖެހެއެވެ.
ދުނިޔޭގެ ނިސްބަތުން ބަލާއިރު ދަރިމައިވާ ރޭޓް އެންމެ ދަށުގައި އޮތީ ޗައިނާގައެވެ. ޗައިނާގައި ދަރިމައިވާ ރޭޓް އުޅެނީ ކޮންމެ 1 އަންހެނަކަށް 1.28 ކުދިންގެ ރޭޓްގައެވެ.
މުސްތަޤުބަލުގަ، ކޮންމެވެސް ދުވަހަކުން އަހަރެންވެސް ދަރިއަކު ހޯދާނަން. ވަގުތު ޖެހުނީމަ އެނގޭނީ. މި ބުނީ... މާލީ ގޮތުން އަތްމަތި ތަނަވަސްވެލާ، ދަރިއަކު ބެލޭ ވަރު ވެލީމައޭ އެކަން ވާނީ. ދަރިއަކު ހޯދާށޭ ކިއާފަ، ނަމަކަށް އެވަރުގެ ކަމެއް ނުކުރާނަން މަށެއް.ލީ؛ ބީޖިންގްގެ 21 އަހަރުގެ ޒުވާނެއް
ދުނިޔޭގެ އާބާދީ 1 ބިލިއަނަށް އެރުމަށް އެތައް ސަތޭކަ ހާސް އަހަރެއް ނެގިއިރު، ދެން ޖެހިގެން އައި 200 އެއްހާ އަހަރު ދުވަހުގެ ތެރޭގައި، އާބާދީ 7 ގުނަ އިތުރުވިއެވެ. ދުނިޔޭގެ އާބާދީ، 7 ބިލިއަނަށް އެރީ 2011 ވަނަ އަހަރުއެވެ. ދުނިޔޭގެ އަދުގެ އަބާދީ 8 ބިލިއަނަށް އަރާފައި ވާ އިރު، 2030 ވަނަ އަހަރު އަންނަ އިރު ދުނިޔޭގެ އާބާދީ، 8.5 ބިލިއަނަށް އަދި 2050 ވަނަ އަހަރު އަންނަ އިރު 9.7 ބިލިއަނަށް އަރާނެ ކަމަށްވެސް ވަނީ ލަފާ ކޮށްފައެވެ. 2100 ވަނަ އަހަރު ދުނިޔޭގެ އާބާދީ އުޅޭނެ ކަމަށް ލަފާ ކޮށްފައި ވަނީ 10.9 ބިލިއަނުގައެވެ.
