ކ. މާލެ
|
17 ޖެނުއަރީ 2023 | އަންގާރަ 12:07
އއ. ރަސްދޫގެ ދަނޑެއް
އއ. ރަސްދޫގެ ދަނޑެއް
ސޯޝަލް މީޑިއާ
ދަނޑުވެރިކަން
އެގްރޯނެޓާއެކު ދަނޑުވެރިކަން އިތުރު ހަރުފަތަކަށް
 
ޒަމާނީ ދަނޑުވެރިކަމާ ދިމާލަށް އެގްރޯނެޓުން ވަނީ މިސްރާބު ޖަހާފައި
 
މި ސިނާއަަތަށް ނުކުންނަ ޒުވާނުން އަދިވެސް މަދު
 
އެގްރޯނެޓުން ދަނޑުވެރިންނަށް އިތުރު ފުރުސަތުތައް ހޯދައިދޭ

ދަނޑުވެރިކަމަކީ ދިވެހިންގެ ލޭނާރާ ގުޅިލާމެހިފައިވާ ސިނާއަތެކޭ ބުނާ އަޑު އަބަދުވެސް އިވެއެވެ. މި ސިނާއަތަކީ ކާބަފައިންގެ ޒަމާނުން ފެށިގެން ދިވެހިން އާމްދަނީ ހޯދުމަށް ކޮށް އުޅުނު މަސައްކަތެކެވެ. ދަނޑުވެރިކަން ނުވަތަ މަސްވެރިކަން ކޮށް ނޫޅޭ އާއިލާއެއް އޭރު މަދުވާނެއެވެ. ވަކި އުމުރެއް ވަކި ޖިންސެއް ނެތް ގޮތަށް ދިވެހިން ދިޔައީ މިކަންކަމުގައި ޝާމިލްވަމުންނެވެ.

ބަދަލުވަމުންދިޔަ ޒަމާނާއެކު އެހެނިހެން ސިނާއަތްތައް އަހަރުމެންގެ ތެރެއަށް ތައާރަފުވަމުންދިޔައެވެ. މީގެ ތެރެއިން މިހާރު ރާއްޖޭގެ އިގްތިސާދުގެ އެންމެ ބޮޑު ބައެއް ހިއްސާކުރާ ފަތުރުވެރިކަމުގެ ސިނާއަތް ފާހަގަކޮށްލެވެއެވެ. މިއާއެކު ދަނޑުވެރިކަން ފަދަ ސިނާއަތްތަކުގައި ހަރަކާތްތެރިވާ މީހުން ކޮންމެވެސް ވަރަކަށް މަދުވިއެވެ. ވަކިން ޚާއްސަކޮށް ޒުވާނުން މިކަންކަމުގައި ހަރަކާތްތެރިވާ މިންވަރު މަދުވިއެވެ.

އެތައް އަހަރެއް ފަހުން މިހާރު ރާއްޖޭގެ ދަނޑުވެރިކަމުގެ ސިނާއަތް އޮތް ހާލަތަށް ބަލާއިރު، މި މަސައްކަތްތަކުގައި ހަރަކާތްތެރިވާ ގިނަ މީހުންނަކީ އުމުރުން ދުވަސްވީ މީހުން ނުވަތަ މެދު އުމުރުގެ މީހުންކަން ފާހަގަކޮށްލެވެއެވެ. މިއީ ބަދަލުވާންޖެހޭ ކަމެކެވެ. މިފަދަ މަސައްކަތްތަކަކީ އަހަރުމެންގެ ތެރެއިން ނެތިދާ ކަންކަމަށް ވެގެންނުވާނެއެވެ. ދަނޑުވެރިކަމަކީ ފުޅާ ދާއިރާއެއްގައި މިކަން ކުރެވިއްޖެނަމަ މިކަމުން ރަނގަޅު އާމްދަނީއެއްވެސް ލިބޭ މަސައްކަތަކަށް ވުމާއެކު މި ސިނާއަތުގައި ހަރަކާތްތެރިވާ މީހުންގެ އަދަދު އިތުރުކުރުމަށް، ވަކިން ޚާއްސަކޮށް ޒުވާނުން މިކަމަށް ނެރުމަށް ސަރުކާރުން އުފައްދާފައިވާ އެގްރޯ ނޭޝަނަލް ކޯޕަރޭޝަނުން ގިނަ މަސައްކަތްތަކެއް ވަނީ ކޮށްފައެވެ. އަދި މިހާރުވެސް ގިނަ މަސައްކަތްތަކެއް ދަނީ ކުރަމުންނެވެ.

އެކުންފުނީގެ މަސައްކަތްތަކީ ދަނޑުުވެރިކަން ކުރަން ބޭނުންވާ ފަރާތްތަކަށް އިތުރު ހިތްވަރެއް ދިނުމެވެ. މިގޮތުން އެގްރޯނެޓާ ގުޅިގެން ދަނޑުވެރިކަން ކުރުމުގެ ޝައުވެރިކަން ފާޅުކޮށްފައިވާ އެތައް ދަނޑުވެރިންނަކާއެކު ވަނީ ކޮންޓްރެކްޓް ހަދާފައެވެ. އެކުންފުންޏާއެކު ދަނޑުވެރިކަން ކުރަން ބޭނުންވާ ފަރާތްތަކަށް ފަންނީ އެހީއާއި، މުޑުވައް ދިނުމާއި، ސްޓާޓަރ ޕެކްތައް ފޯރުކޮސްދެއެވެ. މިގޮތުން މިހާރުވެސް ގިނަ ބަޔަކު އެގްރޯނެޓާ ގުޅިގެން ދަނީ ދަނޑުވެރިކަން ކުރަމުންނެވެ.  

ހަމަ މިއާއެކު އެގްރޯނެޓުން ގެންދަނީ ދަނޑުވެރިންގެ އުފެއްދުންތަކަށް ރަނގަޅު މާކެޓެއް ހޯދައިދިނުމަށްވެސް މަސައްކަތްކުރަމުންނެވެ. އަދި ދަނޑުވެރިންގެ އުފެއްދުންތައް ރައްކާތެރިކަމާ ތާޒާކަންމަތީ ބާޒާރުތަކަށް ފޯރުކޮށްދިނުމަށްޓަކައި ޑިސްޓްރިބިއުޝަން ސެންޓަރުތަކެއްވެސް ދަނީ ގާއިމްކުރަމުންނެވެ. މިތަކެތި އެއް ތަނުން އަނެއް ތަނަށް އުފުލުމަށް އެކުންފުނީގެ އަމިއްލަ އުޅަނދުތަކެއް ގެނައުމުގެ މަސައްކަތްވެސް ކުރަމުންދާއިރު މިއީ ކުޑަ ޚަރަދެއްގައި ދަނޑުވެރިންގެ އުފެއްދުންތައް އެއް ތަނުން އަނެއް ތަނަށް އުފުލުމަށް މަގުފަހިވެގެންދާނެ ކަމެކެވެ.

މީގެ އިތުރުން ދުނިޔޭގެ ގިނަ ގައުމުތަކެއްްގައި މިހާރު ދަނޑުވެރިކަމުގައި ޓެކްނޮލޮޖީ ބޭނުންކުރާފަދައިން ރާއްޖެއަށްވެސް މި މޮޑެލް ތައާރަފުކުރުމަށް ދަނީ މަސައްކަތްކުރަމުންނެވެ. މިއީ ޒަމާނީ ގޮތެއްގައި ދަނޑުވެރިކަން ކުރިއެރުވުމަށް މަގުފަހިވާނެ ކަމެއް ކަމަށް އެގްރޯނެޓުން ބުނެއެވެ.

އެގްރޯނެޓާއި، މިކަމަށް ކަނޑައަޅާފައިވާ ސަރުކާރުގެ ވުޒާރާތައް ގުޅިގެން އެ ދަނީ ގިނަ ފުރުސަތުތަކެއް ހޯދައިދެމުންނެވެ. އަދި ދަނޑުވެރިންގެ އުފެއްދުންތައް ބާޒާރާ ހަމައަށް ގެންގޮސްދީ އެމީހުންނަށް ރަނގަޅު އާމްދަނީއެއް ލިބޭނެ މަގުވެސް ފަހިކޮށްދެމުންނެވެ. ދެން އޮތީ މިކަމަށް ނުކުންނަ މީހުންގެ އަދަދު އަދިވެސް އިތުރުކުރުމުގެ މަސައްކަތެވެ. މިކަމަކީ ދިވެހިންގެ ތެރެއިން ނެތިނުދާ އެއްޗަކަށް ހެދުން މުހިންމެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: މަރްޔަމް ދާނިޝް ނަޝީދު
0%
0%
0%
0%
0%
100%
ކޮމެންޓް