ރަންތާޖު ޤުރުއާން މުބާރާތުގެ އައްޑޫ ސިޓީގެ އޮޑިޝަން ނިމިއްޖެ
ދެން އޮޑިޝަން ބާއްވާނީ ގދ. ތިނަދޫގައި
ރަންތާޖު ގުރުއާން މުބާރާތުގެ އައްޑޫ ސިޓީގެ އޮޑިޝަންގެ ތެރެއިން
ރަންތާޖު ޤުރުއާން މުބާރާތުގެ އައްޑޫ ސިޓީގެ އޮޑިޝަން ނިންމާލައިފިއެވެ.
އާދިއްތަ ދުވަހު އައްޑޫ ސިޓީގައި މުބާރާތުގެ އޮޑިޝަން ބާއްވާފައިވާއިރު ދެން އޮޑިޝަން ބާއްވާނީ ގދ. ތިނަދޫގައެވެ.
އައްޑޫ ސިޓީ އޮޑިޝަންގެ ޖަޖުންގެ ގޮތުގައި ބައިވެރިވެފައިވަނީ އަލްޤާރީ މުހައްމަދު ތައުފީޤް ޢަލީ، އަލްޤާރީ މުޙައްމަދު ޝިފާޢު އަދި އަލްޤާރީ މުޙައްމަދު ވާޙިދުއެވެ.
އައްޑޫ ސިޓީގައި ބޭއްވި އޮޑިޝަންގައި 11 ފަރާތެއް ބައިވެރިވެފައިވެއެވެ.
މި މުބާރާތަކީ މިނިސްޓްރީ އޮފް ޔޫތް، ސްޕޯޓްސް އެންޑް ކޮމިއުނިޓީ އެމްޕަވަރމަންޓާއި، އިސްލާމިކް މިނިސްޓްރީ އަދި ރާއްޖެ ޓީވީ ގުޅިގެން ކުރިއަށްގެންދާ މުބާރާތެކެވެ. 10 ސަރަަޙައްދެއްގައި އޮޑިޝަންތައް ބާއްވާއިރު 20 ބައިވެރިން އޮޑިޝަންގެ ތެރެއިން ހޮވާނެއެވެ. މުބާރާތުގެ ޖަޖުންގެ ގޮތުގައި ރާއްޖޭގެ ފުންނާބު އުސް ގާރީ ބޭފުޅުންގެ 10 ބޭފުޅުން ހިމެނޭނެއެވެ. .
މުބާރާތުގައި ބައިވެރިވުމަށް ބޭނުންވާ ފަރާތްތަކުން (އާރްޓީ ސްޕޭސް، ފުރިހަމަ ނަން، އުމުރު، އައިޑީ ނަންބަރު، އޮޑިޝަން ހަދަން ބޭނުންވާ ސަރަޙައްދު) ޖެހުމަށްފަހު، 450 އެސްއެމްއެސް ކުރުމަށް ވަނީ ހުޅުވާލާފައެވެ. މިއީ 16 އަހަރާއި 45 އަހަރާ ދެމެދުގެ އުމުރުފުރާގެ ފަރާތްތަކަށް ހުޅުވާލެވިފައިވާ މުބާރާތެކެވެ.
އޮޑިޝަން ކުރިއަށްދާ ސަރަޙައްދުތަކަކީ، އައްޑޫސިޓީ ހިތަދޫ، ގދ ތިނަދޫ، ދ ކުޑަހުވަދޫ، ބ އޭދަފުށި، ހދ ކުޅުދުއްފުށި، އަދި މާލެ ސިޓީއެވެ. އޮޑިޝަންތައް ކުރިއަށް ގެންދާނީ 15 ޖެނުއަރީއާއި 16 ފެބްރުއަރީއާ ދެމެދު ގައެވެ.
