"އޮޅުމަކުން" ދޮރުވައްޓާލާ ގެޔަށް ވަނުމަށްފަހު ފުލުހުންބުނީ ސޮރީއޭ
މިކަމުގެ ސަބަބުން ގޭގެވެރިފަރާތް ހުރީ ބޮޑު ބިރުވެރިކަމެއްގެ ތެރޭގަ
ނ. ވެލިދޫ ގެޔަކަށް ފުލުހުންނަށް އޮޅުމަކުން ވަދެވުމުން ދޮރަށް ލިބުނު ގެއްލުން
އަންގާރަދުވަހުގެ ފަތިހުގެ ވަގުތެއްގައި ނ. ވެލިދޫ ގެޔެއްގެ ދޮރު ހަލާކުކޮށްލައިގެން ފުލުހުންނަށް އޮޅުމަކުން ގެއަކަށް ވަދެވިއްޖެެވެ. މަސްތުވާތަކެތީގެ އޮޕަރޭޝަނެއްގައި ބަލާފާސްކުރަން ކަމަށްބުނެ ގަދަކަމުން އެގެޔަށް ވަނުމަށްފަހު ފުލުހުންވަނީ އެއީ އޮޅުމަކުން ދިމާވި ކަމެއް ކަމަށްބުނެ އެވަގުތު އެގޭގައި ނިދާފައޮތް އަހުމަދު ހާރޫންގެ ފާރާތުން މާފަަށްއެދިފައެވެ.
އަހުމަދު ހާރޫން ރާއްޖެ ޓިވީ އަށް މައުލޫމާތު ދިން ގޮތުގައި ދޮރުހަލާކުކޮށްލި އަޑަށް ސިއްސައިގެން ގޮސް ހޭލެވުނު އިރު އަށެއްކަ މީހުން ގޭތެރޭގައި ތިބިކަމަށެވެ. އަދި ތިމަންނާ މެން މިއީ ފުލުހުންނޭ، މި އައީ ކޯޓުއަމުރެއްގެ ދަށުން މި ގޭގައި ހުރި މަސްތުވާތަކެތި ހޯދަން ކަމުގައި ފުލުހުން ބުނިކަމުގައި ހާރޫން މައުލޫމާތު ދީފައިވެއެެވެ. ނަމަަވެސް ކޯޓު އަމުރު ބަލާ، ހާރޫންގެ މައުލޫމާތު ބެލުމަށްފަހު އެގެޔަށް ވަދެވުނީ އޮޅުމަކުން ކަމަށް ބުނެ "ބޭބޭ ސޮރީ" އޭ ބުނުމަށްފަހު ފުލުހުން އެގެއިން ނިކުމެގެން ދިޔެކަމަށް ހާރޫން ބުންޔެވެ.
ހާރުން މައުލޫމާތު ދިން ގޮތުގައި ފުލުހުން އަސްލު ވަންނަން އުޅުނީ އެގެޔާ ޖެހިގެން ހުރި ގެޔަކަށެވެ. އެގެޔަށް ކަމަށް ހީކޮށް މީގެ ކުރިން ވެސް ހާރޫން ދިރިއުޅޭ ގެޔަށް ވަދެފައިވާކަމަށް ހާރޫން ފާހަގަކޮށްފައިވެއެވެ. އަދި ފުލުހުން އެވަންނަން އުޅުނު ގެޔަކީ ދޭތެރެދޭތެރެއިން މަސްތުވާތަކެތީގެ މައްސަލަތަކުގައި ބަލާފާސްކުރާ ގެއެއްކަން ހާރޫން ބުނެފައިވެއެވެ.
އަމިއްލަ ގޭގައި ނިދާފަ އޮއްވަ ފުލުހުން އެހާ އަނިޔާވެރިގޮތަކަށް ގެޔަށް ވަނުމުން ވަރަށް ބޮޑު ޝޮކެއްލިބިފައިވާ ކަމަށް ހާރޫން ފާހަގަކުރިއެވެ. ފުލުހުން އެގެޔަށް ވަނުމުގެ ތެރެއިން ދޮރު ހަލާކުވުމުގެ އިތުރުން، ދޮރު ވެއްޓުނު ބާރުމިނުގަ ތަޅުގެ އަތްގަނޑު ބިންމަށްޗަށް ޖެހި ތަށިމުށިތައްވެސް ތަޅައިގެންގޮސްފައިވާކަމަށް ހާރޫން ބުންޏެވެެ. މިކަމުގެ ސަބަބުން ލިބުނު ގެއްލުމުގެ ބަދަލު ދޭނޭ ކަމަށް ފުލުހުން ބުނެފައިވާކަމަށްވެސް ހާރޫން ފާހަގަކޮށްފައިވެއެވެ.
ހޯމަދުވަހުގެރޭ ނ. ވެލިދޫގައި މަސްތުވާތަކެތީގެ އޮޕާރޭޝަނެއްގެ ދަށުން އެރަށު ބައެއް ގޭގޭ ފުލުހުން ބަލާ ފާސްކޮށްފައިވެއެވެ. އަދި ބައެއް ތަންތަނުން މަސްތުވާތަކެތި ފެނިފައިވާކަމަށްވެސް މައުލޫމާތު ލިބިފައިވެއެވެ.
މިކަމާ ގުޅިގެން ރާއްޖެޓީވީގެ ފަރާތުން ފުލުހުންގެ މީޑިޔާ އަށް ގުޅާލުމުން މައުލޫމާތެއް ލިބޭ ގޮތެއްވަނީ ނުވެފައެވެ.
