ޗެލްސީގެ ވެރިންގެ ފުރިހަަމަ އިތުބާރު އޭނާ އަށް އޮންނަ ކަމަށް އެ ޓީމުގެ ކޯޗު ގްރަހަމް ޕޮޓާ ބުނެފި އެވެ.
މި ސީޒަންގައި ޗެލްސީން ދައްކަމުން އަންނަ ދަށް ކުޅުމުގެ ސަބަބުން ޕޮޓާ އަށް ވަރަށް ބޮޑު ޕްރެޝަރަކާ ވަނީ ކުރިމަތިވެފަ އެވެ. އޭގެ ފަހުން ޗެލްސީން މި ވަނީ ލީގުގައި ކްރިސްޓަލް ޕެލެސް ބަލިކޮށް މޮޅެއް ހޯދައިފަ އެވެ. އެ މެޗަށްފަހު ވާހަކަ ދައްކަމުން ޕޮޓާ ބުނީ އަބަދު ވެސް ކަންތައް އޮންނަ ގޮތަކީ އެންމެ ބޭނުންވާ ނަތީޖާ ނުނެރެވޭ ނަަމަ، ޕްރެޝަރު ކުރިމަތިވުން ކަމަށެވެ. ޚާއްސަކޮށް ޗެލްސީ ކަހަލަ، ޓާގެޓުތައް ގިނަ ބޮޑު ކުލަބެއް ގައި އެކަން އޮންނާނެ ކަމަށް ޕޮޓާ ބުންޏެވެ. އަދި ޗެލްސީ އަށް މޮޅެއް ނުލިބިދާތީ އޭނާ އަށް ބޮޑު ޕްރެޝަރެއް ކުރިމަތިވާ ކަމަށާއި، ނަމަވެސް ބޮޑަށް އެކަން އަންނަނީ މީޑިއާ އިން ކަމަށެވެ. މީގެ އިތުރުން ޕޮޓާ ބުނީ، ޓީމުގެ ބޯޑުގެ ލެވެލް އިން ބަލާނަމަ އެމީހުންގެ ފުރިހަމަ އިތުބާރު އޭނާ އަށް އޮންނަ ކަމަށެވެ. ނަމަވެސް އެކަމާ މާ ބޮޑަށް ހަމަޖެހިގެން ނުހުންނަ ކަމަށެވެ.
އެކަމަކު ޓީމުގެ ބޯޑުގެ ލެވެލް އިން ބަލާނަމަ، އެމީހުންގެ އިތުބާރު އަހަރެންނަށް އޮވޭ، ނަމަވެސް އެކަމާ ހަމަހިގެނެއް ނޫން މިހުންނަނީ.ގްރަހަމް ޕޮޓާ / ޗެލްސީގެ ކޯޗު
އިތުރަށް ވާހަކަ ދައްކަމުން ޕޮޓާ ބުނީ އޭނާ ކުރަމުން އަންނަ މަސައްކަތަށް އެއްޗެއް ބުނަން ބޭނުންވާ ނަމަ އެކަން އޭނާއާ ހިއްސާކުރުމަށެވެ. އަދި އެކަމާ ހިތްނުތަނަވަސްކަމެއް ނޯންނާނެ ކަމަށާއި، އެއީ އޭނާ ޝުކުުރުވެރިވާނެ ކަމެއް ކަމަށެވެ. ޕޮޓާ ބުނީ ޗެލްސީގެ ކުޅުންތެރިންގެ ފަރާތުން އޭނާ އަށް ފެންނަނީ މަސައްކަތް ކުރާ މަންޒަރު ކަމަށާއި، ޕްރޮފެޝަނަލް މަސައްކަތެއް ކުރާ ކަމަށެވެ. އެގޮތުން ހެދޭ ގޯސްތަަކަށް ކުޅުންތެރިން ވެސް އަދި އޭނާ ވެސް ޒިންމާވާނެ ކަމަށާއި، ކުރިއަށް ދެވޭނީ އެކަންކަމާއެކު ކަމަށެވެ. ހަމައެއާއެކު އޭނާ ބުނީ އަދިވެސް ޗެލްސީ އޮތީ ގޮސް ހާލަތެއްގައި ކަމަށާއި، އެކަމުން އަރައި ގަތުމަށް ކުރިމަތީގައި އޮތީ ވެސް ބޮޑު ޗެލެންޖެއް ކަމަށެވެ. އަދި އޭނާގެ ސަޕޯޓު ކުޅުންތެރިންނަށް އޮންނާނެ ކަމަށާއި، ކުޅުންތެރިންގެ ސަޕޯޓު އޭނާ އަށް އޮތް ކަމަށެވެ.
މީގެ އިތުރުން އޭނާ ބުނީ ކުރިއަށް އޮތީ ވަރުގަދަ މެޗެއް ކަމަށާއި، މަސައްކަތް ކުރާނީ ޓީމުގެ މޮޅު ކުޅުމާއެކު އެ މެޗު ކާމިޔާބު ކުރަން ކަމަށެވެ.
