ކުލުނާއި ގުޅުމުން ރާއްޖެ އެއްކުރެއްވުމުގައި ރައީސް ސާލިޙުގެ ދައުރު

އެމްޑީޕީގެ ފުރަތަމަ ވެރިކަމުގެ ފުރަތަމަ ތިން ހަތްދުވަހުގެ ތެރޭގައި އެވެރިކަން އުފެދިގެންއައި ކޯލިޝަންގައި ރެންދުއެޅިއެވެ. އެ ކޯލިޝަންގައި އެމްޑީޕީ ފިޔަވައި އެންމެ ބޮޑު ހިއްސާއެއް އޮތް ޖުމްހޫރީ ޕާޓީ ކޯލިޝަނުން ވަކިވިއެވެ. ވެރިކަމަށް އެމްޑީޕީ އައުމުގައި ބޮޑު ރޯލެއް ކުޅުނު ޤާސިމް އިބްރާހީމް ސަރުކާރުން އިސްތިއުފާ ދެއްވައި ކޯލިޝަނާ ފެއަށް ޖެހުނީއެވެ.

މާގިނަ ދުވަސްތަކެއްނުވެ ކޯލިޝަންގައި އޮތް އަދާލަތު ޕާޓީވެސް ކޯލިޝަނާ ވަކިވެ އިދިކޮޅު އިސްލާހީ ހަރަކާތާ ޢަމަލީގޮތުން ބައިވެރިވިއެވެ. ސަބަބުތައް އިތުރަށް ދެއްކުމުގެ ބޭނުމެއްނެތެވެ. ނަމަވެސް ކޯލިޝަނުން އެދެބައިމީހުން ވެސް ވަކިވީ ސަރުކާރާމެދު ހުރި ކަންބޮޑުވުންތަކެއްގެ ސަބަބުންނެވެ. ކޯލިޝަން ހިންގުމުގައި އޭރުގެ ސަރުކާރަށް ނުކުޅެދިގެންނެވެ.

އެއާއެކު ފެނިގެން ދިޔައީ ވަރަށް ތަފާތު މަންޒަރެކެވެ. ސަރުކާރަށްވުރެ އިދިކޮޅު އެކްޓިވް ވިއެވެ. ސަރުކާރުން ހަދަމުންދާ ގޯސްތަކުގެ ވާހަކަ މާބޮޑަށް ގަދަވިއެވެ. އަދި އިދިކޮޅުން ހިންގި ހަރަކާތްތަކަށް ދޭންފެށި ރައްދާއި އަޅާންފެށި ފިޔަވަޅުތަކުގެ ނަތީޖާއެއްގެ ގޮތުން އިތުރަށް ހޫނުވެ ޤާނޫނީގޮތުން އުފެދިފައިވާ ސަރުކާރު މުޅިން އެހެންގޮތަކަށް ބަދަލުވެގެން ދިޔައީއެވެ. ނަވަތަ އިދިކޮޅުން ނުކުމެ ބަދަލު ކުރީއެވެ.

އެކަންކަމާއެކު އުފެދިގެންއައި އޮއިވަރުގައި ފެނިގެން ދިޔައީ ޤައުމުގައި ހަލަބޮލިކަން އުފެދިގެން އައިތަނެވެ. ސަރުކާރުގައި އޮތް އެމްޑީޕީ އިދިކޮޅު ޕާޓީއަށްވެ އަނެއްކާ ވެސް ވެރިކަމަށް އަންނަން ކުރި މަސައްކަތާއި ވެރިކަން ވައްޓާލިގޮތުން ކުރަމުންދިޔަ އިހުތިޖާޖްތަކަށް އޭރުގެ ސަރުކާރުން ވެސް ދެމުންދިޔަ ރައްދާއި ޢަމަލުކުރަމުންދިޔަ ގޮތުން ޤައުމު އޮތީ މުޅިން ހަމަނުޖެހުމެއްގެ ތެރޭގައެވެ. މުއައްސަސާތަކާމެދު މީހުން ހިތްހަމަނުޖެހުމާއި ދޭދޭ މީހުންގެ މެދުގައި އޮންނަ ގުޅުންތައް މުޅިން ހީނަރުވެގެން ގޮސް މުޅިން ވެސް ފެންނަމުން ދިޔައީ އަދި ކުރިމަތިވަމުން ދިޔައީ ނުތަނަވަސްކަމެވެ.

އެގޮތުގައި އެ ވެރިކަމުގެ ބާކީއޮތް ދުވަސްތައް ހޭދަވެ ނިމުމަށްފަހު ދެން އައީ ރައީސް ޔާމީންގެ ސަރުކާރެވެ. ކަންކަންވީ އަދި އެއަށްވުރެ ވެސް ގޯހެވެ. ހަމަ ރަނގަޅަށް ސަރުކާރުގެ ބާރާއި ނުފޫޒު ފޯރުވައިގެން ކުރަމުންދިޔަ ވެރިކަމުގައި ރައްޔިތުންތިބީ ގޮތްހުސްވެފައެވެ. ރައްޔިތުންގެ މަޖިލީހުގައި ތަޅުއަޅުވައި އެމަޖިލީސް ހުއްޓުވިއެވެ. މަޖިލީހުގެ މެޖޯރިޓީއާއެކު ޖުޑިޝަރީއަށް ދިޔައީ ފާޅުގައި އަތްބާނަމުންނެވެ. މަޝްހޫރު 12 މެންބަރުން މަޖިލީހުން ވަކިކުރި ގޮތާމެދު ސުޕްރީމް ކޯޓުން ނެރެމުންދިޔަ ވާނުވާ ނޭނގޭ އަމުރުތަކާއެކު އިންސާފާމެދު ރައްޔިތުން ތިބީ އުއްމީދު ގެއްލިފައެވެ. އިސްލާހަށް ބަސްބުނެ ވަކާލާތު ކުރަމުންދިޔަ ޤާނޫނީ ވަކީލުން ކޯޓުތަކަށް ނުވަދެވޭގޮތައް ދިޔައީ ސަސްޕެންޑު ކުރަމުންނެވެ. ބަސްބުނެ އެއްވެ އުޅުން ހަނިކޮށް ވަކިގޮތަކަށް ވަކިތާކު ނޫނީ އެކަން ނުކުރެވޭނޭ ގޮތައް ޤާނޫނަށް ބަދަލު ގެނައެވެ. މީޑިއާތައް ބޮޑެތި އަދަދުތަކުން ޖޫރިމަނާކޮށް ނޫސްވެރިން ހިފާ ހައްޔަރުކުރިއެވެ.

މިކަންކަމާމެދު ނުތަނަވަސްކަމާއި ހާސްކަމާއި ކަންކުރަމުންދާގޮތުން ނުރުހިފައިތިބެން ޖެހުމުގެ ނަތީޖާއަކަށް ވެގެންދިޔައީ އިހުނަށްވުރެ ބޮޑަށް އިޖުތިމާއީ ފޭރާންވީދި، ގުޅުންތައް ހީނަރުވެ ހިތްހަމަޖެހުމާއި ސުލްހަމަސަލަސްކަން ގެއްލިގެންދިއުމެވެ.

މި ސަބަބާހުރެ އޭރުގެ ސަރުކާރު ބޮޑުތަނުން ބަދަލުކޮށް ރައީސް ޔާމީންގެ މައްޗަށް ރައީސް އިބްރާހީމް މުހައްމަދު ސާލިޙު ކުރި ހޯއްދެވިއެވެ. ގުޅިފައިވާ ޕާޓީތަކުން ގުޅިގެން ކުރި ބުރަ މަސައްކަތައް ރައްޔިތުން ކުރި ތާއީދާއެކުގައެވެ. އެއާއެކު އަނެއްކާ ވެސް މުޅި ޤައުމު އެއްވާން ފެށިއެވެ. މިނިވަންކަމުގެ ނޭވާއެއް ރައްޔިތުންނަށް ލެވޭނޭ މަގުފަހިވެގެން ދިޔައެވެ. ސިޔާސީ ޕާޓީތަކާއެކު ގުޅުން ބަދަހިކުރެވި ސަރުކާރުގެ މުއައްސަސާތަކާއެކު މަސައްކަތް ކުރެވޭން ފެށިއެވެ. އެކިއެކި ވިސްނުމުގެ ގިނަ މީހުންނާ ވާހަކަ ދެކެވި ގެއްލިފައިވާ ގުޅުންތައް ބަދަހިވާން ފެށިއެވެ. އިދިކޮޅަށް ވެސް ފުރިހަމައަށް ޖާގަލިބި ސަރުކާރާމެދު ތައްމިނަށް ފާޑުކިޔޭނޭ ދޮރުވަނީ ހުޅުވާލެވިފައެވެ.

ކޮންމެއަކަސް އަނެއްކާ ވެސް ހަލަބޮލިކަން ނެތިގޮސް ޤައުމުގައި މިވަނީ ސުލްހަ މަސަލަސްކަން ޤާއިމްވެފައެވެ. ރައީސް އިބްރާހީމް މުހައްމަދު ސާލިޙު ގެންގުޅުއްވާ ސިޔާސަތުގެ ދަށުން ގިނަ ވިސްނުމަށް ޖާގަދެއްވާތީ އެންމެނަށް ވެސް ގުޅިގެން މަސައްކަތްކުރެވޭނެ މާހައުލެއް ވަނީ އުފެދިފައެވެ. ގުޅިފައިވާ ޕާޓީތަކުގެ ބަދަހި ކޯލިޝަން އެގޮތުގައި ހިފެހެއްޓުމަށް ރައީސް ސާލިޙު ކުރައްވާ މަސައްކަތުގެ ނަތީޖާ މުޅި ރާއްޖެއިން ދަނީ ފެންނަމުންނެވެ.