ދިވެހިންގެ ތެރޭގައި މަޝްހޫރު ފިލްމީ ތަރި ޔޫސުފް ރަފީޢު، ނުވަތަ އާންމު ނަމުން ނަމަ "ޔޫސޭ" ކުޅެފައިވާ ދިރިއުޅުމަކީ މިއީބާ އަކީ އަޅުގަނޑުމެންނަށް އައު ޑްރާމާއެއް ނޫނެވެ. ދިރިއުޅުމަކީ މިއީބާގެ ނަމުން މަޝްހޫރުވެފައިވާ އެ ޑްރާމާ އިން އެކި ފަހަރު ފެންނަނީ އެކި ހާދިސާ ތަކުގެ މައްޗަށް ކުޅެފައިވާ ހެއްވާ، މަޖާ ޑްރާމާ ތަކެވެ. އެއީ ދިވެހިންގެ ތެރެއިން ގިނަ ބަޔަކު މިއަދު ވެސް ޝައުޤުވެރިކަމާ އެކު ބަލަމުން އަންނަ ޑްރާމާ އެކެވެ.

ދިރިއުޅުމަކީ މިއީބާގެ އެއް އެޕިސޯޑުގައި ކަންތައްވާ ގޮތް ހަނދާން އެބަ ހުއްޓެވެ. ބޮޑު މީހާ ރަށަަށް ވަޑައިގަންނަވާތީ، ރަށުގެ ޒުވާނުންނާއި، ހަރު މީހުންނާއި، ކުދި ބޮޑު އެންމެން ބަނދަރު ދޮަށަށް އެއްވެ އެވެ. ބޮއްކުރަލެއްގައި ބޮޑު މީހާ ރަށަށް ބޭލުމުގެ ތެރޭގައި އެ ބޮއްކުރާ މޫދަށް ބަންޑުން ވެސް ޖަހާލަ އެވެ. ބޮޑު މީހާ ވެސް ރަށަށް އެރީ ތެމި ފޯވެގެންނެވެ.

ބޮޑު މީހާގެ އިސްތިޤުބާލުގައި ސަލާމް ކުރަން އަތުރާލާފައި އޮތް ސަފުގައި ތިބި މީހުންނާ ބޮޑު މީހާ ސަލާމް ކުރައްވަމުން ގެންދަވަ އެވެ. ޒުވާނުންގެ ކޮމެޓީގެ ރައީސްއާ ވެސް ބޮޑު މީހާ ސަލާމް ކުރައްވަ އެވެ. ޒުވާނުންގެ ކޮމެޓީގެ ރައީސްގެ އުމުރު 80 އިން މައްޗަށް ގޮސްފައިވެ އެވެ. ބޮޑު މީހާ އަށް ވެސް ލިބުނީ ހައިރާން ކަމެކެވެ.

ބަނދަރު މަތީގައި ތިބި މީހުންނާ ސަލާމް ކުރުމަށް ރަށު ތެރޭގައި ވެސް ހަދާފައި އޮތް ސަފުގައި ތިބި މީހުންނާ ބޮޑު މީހާ ސަލާމް ކުރައްވަން ޖެހިވަޑައިގެންފި އެވެ. ބޮޑު މިހާގެ އިސްތިޤުބާލުގައި ތިބި ރައްޔިތުން ގިނަ ކަމުން، ބޮޑު މީހާ އަށް ވެސް ލިބުނީ ހައިރާން ކަމެކެވެ. އެކަމަކު، އެއަށް ވުރެ ބޮޑު ހައިރާން ކަމެއް ބޮޑު މީހާ އަށް ލިބިވަޑައިގެންނެވީ، ބަނދަރު މަތީގައި އޮތް ސަފުގައި ތިބި މީހުންނާ ހަމަ އެއް ވައްތަރުގެ ބަޔަކު، ރަށު ތެރޭގައި އޮތް ސަފުގައި ވެސް ތިބީމަ އެވެ.

އެއީ އެ ވާހަކަ އެވެ. ފާހަގަ ކުރަން މިއުޅެނީ އެ ޑްރާމާގައި ކަން ހިނގާ ގޮތް ތަފްސީލު ކުރާކަށް ނޫނެވެ. މިއަދު، އަޅުގަނޑުމެންގެ ރާއްޖެ އިން ހަގީގަތުގައި ވެސް ފެންނަމުން އަންނަ ކަމަކަށްވާތީ، ހިއްސާކޮށްލުމަށް މިސާލެއް ޖެހީ އެވެ. ގަންނަންވީ ލަދު ކަމެއް، މަޖާވެގެން ގޮސް ހޭންވީ ކަމެއް ނޭނގުނެވެ. އެކަމަކު، އިނގޭހާ ވެސް ކަމަކީ ޔޫސޭގެ ދިރިއުޅުމަކީ މިއީބާ، ރާއްޖޭގެ މިހާރުގެ ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުއާ ލައްވާލައިފި ކަމެވެ. މިހާރު މިއީ، ރައީސް މުޢިއްޒުގެ ދިރިއުޅުމަކީ މިއީބާ އެވެ.

އިހަކަށް ދުވަހުގެ ރޭ ރައީސް މުޢިއްޒު ވިލިނގިއްޔަށް ވަޑައިގެން، ވިލިނގިލީގައި ދިރިއުޅުއްވާ ރައްޔިިތުންނާ ބައްދަލު ކުރައްވައިފަ އެވެ. އެ ރައްޔިތުންނާ ސަލާމް ކުރައްވައި، ބައްދަލުވުމުގައި ރައްޔިތުންގެ ޝުއޫރުތައް ވެސް އަޑު އައްސަވައިފަ އެވެ. އޭގެ ފަހުން، އަންގާރަ ދުވަހުގެ ރޭ މާލޭގެ މައްޗަންގޮޅި އަށް ވަޑައިގެން، އެ ސަރަހައްދުގައި ދިރިއުޅުއްވާ ރައްޔިތުންނާ ވެސް ބައްދަލު ކުރައްވައި، ސަލާމް ކުރައްވައި އަދި ޝުއޫރުތައް ވެސް އަޑު އައްސަވައިފި އެވެ.

އެކަމަކު، ވިލިނގިލީގެ ބައްދަލުވުމުގައި ތިބި މޫނުތައް، މައްޗަންގޮޅީގެ ބައްދަލުވުމުން ވެސް ފެނިއްޖެ އެވެ. ސަލާމް ކުރެއްވި ސަފުން ވެސް ފެނިއްޖެ އެެވެ. ޝުއޫރު ފާޅު ކުރި ރައްޔިތުންގެ ތެރެއިން ވެސް ފެނިއްޖެ އެވެ. ލޮލުގައި ވެސް އަޅައި ގަނެއްޖެ އެވެ. ވިލިނގިލީގެ ޖަލްސާގައި ޝުއޫރު ފާޅު ކުރި މީހަކާ ވައްތަރު މީހަކު، މައްޗަންގޮޅީ ޖަލްސާގައި ވެސް ޝުއޫރު ފާޅު ކޮށްފި އެވެ.

މަންޒަރުން ސިފަވާ ކަހަލަ އެވެ. ރައީސް މުޢިއްޒުގެ އަރިހުގައި ތިއްބެވި އެމަނިކުފާނުގެ ވަފާތެރިން، ރައީސް މުޢިއްޒުގެ ކަންފަތް ދޮށުގައި މަޑު މަޑުން ބުނާ ކަހަލަ އެވެ. "ބޮޑު މީހާ އެވެ. މީހުން އެއްވައްތަރީ ދޯ އެވެ. އެއީ މި ޤައުމަށް އަންނަ ފަތުރުވެރިން ވެސް ބުނާ ވާހަކަ އެކެވެ. މިއީ އެއް ޤައުމެއް ނޫންތޯ؟ އެހެންވީމާ އެއްވައްތަރު ކުދިން ވެސް އަދި މީހުން ވެސް ގިނަ ވާނެ އެވެ. ވަރަށް ވައްތަރު ވާނެ އެވެ."

ރައީސް ވެސް ވިދާޅުވާ ކަހަލަ އެވެ. އެކަމަކު ހާދަ ވައްތަރެވެ. އެހެން ނަމަވެސް، ކުރިއަށް ގެންދަވާށެވެ. ދިރިއުޅުމަކީ މިއީބާ އެވެ!