ރައީސް އޮޅުވާލަން މި އުޅެނީ ކާކަށް؟

މި ފަހުން ރައީސް ޑޮކްޓަރު މުޙައްމަދު މުޢިއްޒު ދެއްކެވި ވާހަކައެއް އަޑު އިވިއްޖެ އެވެ. ވަރަށް ރުންކުރުވެ ހުންނަވައި، ނޫސްވެރިންނާ ދިމާލަށް ބަސް އެއްލެވީ އެވެ. އެއީ އިހަކަށް ދުވަހު އެމަނިކުފާނު ތަސްދީޤު ކުރެއްވި، މިނިވަން މީޑިއާތައް ނައްތާލާ ބިލާ ގުޅޭ ގޮތުންނެވެ.

އަޑަށް ބާރު ލައްވައި، އަތް އުއްކަވާފައި ރައީސް ވިދާޅުވީ، އެ ޤާނޫނު ކީ އެއްވެސް ނޫސްވެރިޔަކާ އަދި ދިމާ ނުވާ ކަމަށެވެ. ރައީސް ވިދާޅުވީ ނޫސްވެރިން އުޅެނީ ހަމަ އަނެކަކު ބުނި ވާހަކަ ޤަބޫލު ކޮށްގެން ކަމަށާއި، ކުރިއަށް ދަނީ އެ ގޮތަށް ކަމަށެވެ. އަދި އެއީ ޒިންމާދާރު ގޮތެއް ނޫން ކަމަށް ވެސް ވިދާޅުވި އެވެ.

މިހާ ހިސާބުން އަޅުގަނޑު ހިތަށް އެރި އެވެ. ރައީސް މި އުޅުއްވަނީ ކީކޭ ވިދާޅުވާންބާ އެވެ؟ ވާހަކައެއް ދެއްކެވުމުގެ ކުރިން އެމަނިކުފާނު ރަނގަޅަށް ބައްލަވާ ނުލައްވަނީ ހެއްޔެވެ؟ އެއްވެސް ތަރުތީބެއް ނެތި ވާހަކަ ދައްކަވަނީ ހެއްޔެވެ؟ ޕޯޑިއަމެއް، ނުވަތަ މައިކެއް އަތު ޖެހޭ އިރަށް، ތަނެއް ދޮރެއް ބަލާލުމެއް ނެތި ވާހަކަ ދައްކަވަނީ ހެއްޔެވެ؟ ނޫނީ، ރައީސް މި އުޅުއްވަނީ ރައްޔިތުންނަށް އޮޅުވާލަން ހެއްޔެވެ؟

އެ ޤާނޫނު ކީ ނޫސްވެރިޔަކާ އަދި ދިމާ ނުވާ ކަމަށް ރައީސް ވިދާޅުވިއިރު، ނޫސްވެރިންގެ ކަންބޮޑުވުންތައް ފެށުނީ ވެސް އޭގައި ލިޔެފައި އޮތް އެއްޗެއް ކިޔައިގެންނެވެ. އޭގައި އޮތް އެއްޗެއް ނޫސްވެރިންނަށް ފަހުމު ވާތީ އެވެ. އެކަމުގެ ބިރުވެރިކަމާއި، ނުރައްކާތެރިކަން ނޫސްވެރިންނަށް އިނގޭތީ އެވެ. އޭގައި އޮތް އެއްޗެއް ނޭނގި ތިބެ، ނޫސްވެރިން އިހުތިޖާޖު ކުރީއެއް ނޫނެވެ. ފަހަރުގައި ރައީސް އަށް އެހެން ވުމަކީ އެކަށީގެންވާ ކަމަކަށް ވެދާނެ އެވެ.

ރައީސް އެވެ. ނޫސްވެރިންގެ ކަންބޮޑުވުންތައް އަޑު އައްސަވަން، މަނިކުފާނު އޮފީހުގައި ނޫސްވެރިންނާ ބައްދަލު ކުރެއްވިމު ނޫންތޯ އެވެ؟ އެތަކެއް އަހަރު ނޫސްވެރި ކަމުގައި ޚިދުމަތް ކުރެއްވި ބޭފުޅުންނާ ރައީސް ބައްދަލު ކުރެއްވުމުން، ތިޔަ ޤާނޫނުގައި ހުރި ކަންބޮޑުވާ ކަންކަން އެ ބޭފުޅުން ރައީސްއާ ހިއްސާ ކުރެއްވި ނޫންތޯ އެވެ؟ ގައިމު އެ ކަންބޮޑުވުންތައް ހިއްސާ ކުރާނީ އެ ކިޔާފައި އޮތީމަ ނޫން ހެއްޔެވެ؟

ރައީސް އެވެ. އެ ދުވަހު މަނިކުފާނު އޮފީހުން ގެޔަށް ވަޑައިގެންނެވި މަގު މަތީގައި، އެތަކެއް ނޫސްވެރިންނެއް މަނިކުފާނުގެ ފަހަތްޕުޅުން ސުވާލު ކުރަމުން ދިޔަ ހަނދާން ނެތުނީ ހެއްޔެވެ؟ އެ ދުވަހު އެ ނޫސްވެރިން ވެސް ފާހަގަ ކުރަމުން ގެންދިޔައީ ބިލުގައި ހުރި ކަންބޮޑުވާ ކަންކަމެއް ނޫން ހެއްޔެވެ؟ އެ ބިިލު އޮތީ މިނިވަން ނޫސްވެރިކަމުގައި ތަޅު އެޅުވޭ ގޮތަށް ކަމަށް އެ ނޫސްވެރިން މަނިކުފާނަށް ދެންނެވި ނޫންތޯ އެވެ؟

ރައީސް އެވެ. އަދި އެއް ކަމެއް ފާހަގަ ކޮށްލާނަމެވެ. ހަމަ އެ ދުވަހު، ހެނދުނު ވަގުތުގައި މަނިކުފާނު ފޮނުއްވައިގެން، މި އުޅޭނީ ޓީވީ ޚަލީލް އާއި އަސްވާޑުއާ ދެ ބޭފުޅުން ނޫސްވެރިންނާ ބައްދަލު ކުރި ނޫން ތޯ އެވެ؟ ނޫސްވެރިންގެ ކަންބޮޑުވުން އެ ދެ ބޭފުޅުންނަށް ނޫސްވެރިން އޮއްސާލި ނޫންތޯ އެވެ؟ އެ ދެ ބޭފުޅުން އޮފީހަށް ވަޑައިގެން އެކަމުގެ ވާހަކަތައް މަނިކުފާނަށް ނުދަންނަވާ ހެއްޔެވެ؟ ގައިމު، ތިޔަ ޤާނޫނުގައި ލިޔެފައި އޮތް އެއްޗެއް ނޫސްވެރިން ކިޔައި، އެކަމުގެ ކަންބޮޑުވުން އެ ދެ ބޭފުޅުންނާ ހިއްސާ ކުރެއްވި އެވެ. އެ ދެ ވެރިން ދޯކާ ދިނީ ތޯއްޗެކެވެ.

ރައީސް އެވެ. މިކަންކަން އޮޅުވާލަން ތިޔަ އުޅުއްވަނީ ކާކަށް ހެއްޔެވެ؟ ލައިވް ޓީވީގައި، މުޅި ޤައުމުގެ އެންމެ ކުރިމަތީގައި މަނިކުފާނު ސިއްރު ކުރަން ތިޔަ އުޅުއްވަނީ ކޮން ކަމެއް ހެއްޔެވެ؟ މި ދައްކަނީ އިއްޔެ މެންދުރު، މި ޤައުމުގެ އެންމެން ކުރިމަތީ ހިނގި ކަންތައްތަކެއްގެ ވާހަކަ އެވެ. އެކަންކަން އޮޅުވާލުމަށް މަނިކުފާނު މަސައްކަތް ކުރެއްވި ނަމަވެސް، އެކަންކަން އޮޅުވައެއް ނުލެވޭނެ އެވެ.