އެންމެން ވެސް ދައްކަމުން އަންނަ އެއް ވާހަކަ އެއް އެބަ އޮތެވެ. އެއީ ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުގެ ސަރުކާރުން، ރައްޔިތުންގެ ޙައްޤުތައް ނިގުޅައިގަނެ، ޤައުމު ހަލާކުގެ މަގަށް ގެންގޮސް، އަދި ރައްޔިތުންނަށް ދުއްތުރާ ޖައްސަމުން އަންނަ ވާހަކަ އެވެ. މި ވާހަކަ ނުދައްކާ މީހަކު މަދު ވާނެ އެވެ. އެެއްކޮޅެއް، އިދިކޮޅެއް ކިޔާނެ ކަމެއް ނެތެވެ.

މިއަދު ރައްޔިތުން ދައްކަމުން އަންނަނީ ކަރަންޓު ބިލާއި ފެން ބިލު ބޮޑު ވާހަކަ އެވެ. އާންމު ދިރިއުޅުގެ އަގުތައް ބޮޑުވެ، ޟަރޫރީ ގޮތުން ބޭނުން ކުރަމުން އަންނަ ތަކެތި ވެސް އަގު ބޮޑުވެފައިވާ ވާހަކަ އެވެ. އާފަލާއި، އޮރެންޖުގެ އަގު އިންތިހާ އަށް ބޮޑުވެފައިވާ ކަމަށެވެ. ނުވިތާކަށް، ރައްޔިތުންނަށް ބޭނުންވާ ބޭހާއި، އާސަަންދަ ވެސް ކަފުންކޮށް ވަޅުލާފައިވާ ވާހަކަ އެވެ.

ވިޔަފާރިވެރިންނާއި، އާންމުން ވެސް ދައްކަނީ ޑޮލަރުގެ އަގު ބޮޑު ވާހަކަ އެވެ. މިއިން ޒަމާނެއްގައި ޑޮލަރުގެ އަގު މައްޗަށް ނުދާ މިންވަރަށް އެ ހުރީ މަތީގަ އެވެ. މިއަދު ރާއްޖޭގައި ޑޮލަރެއްގެ އަގު އުޅެނީ ވިހި ރުފިޔާ އިން މަތީގަ އެވެ. މި ޤައުމުން މިހާރު ހެޔޮ އަގުގައި ޑޮލަރެއް ހޯދުމަކީ، ކަނޑު މަތިން މާވަހަރެއް ހޮވުން ކަހަލަ ކަމަކަށް ވެއްޖެ އެވެ. އެހާ ވެސް ޤައުމުގެ ޙާލަތު ދަށްވެއްޖެ އެވެ.

އެވަރުން އަދި ނިމުނީއެއް ނޫނެވެ. ރައްޔިތުންގެ ޙައްޤުތައް އިންތިހާ އަށް ހަނިކޮށް، މި ރާއްޖެ ހުދުމުޚުތާރު ވެރިކަމަކަށް ބަދަލު ކުރަން ވެސް މަސައްކަތް ކުރަނީ އެވެ. ތިން ބާރު ވަކިވެފައި އޮތް ނިޒާމު އޮޅާލީ ކިހިނެއް ހެއްޔެވެ؟ ޤާނޫނު ހަދާ ބާރާއި، އަދުލު އިންސާފުގެ ބާރަށް، ވެރި މީހާގެ ބާރާއި، ނުފޫޒު އަދި އަމުރު މައުރޫފު އޮތް ގޮތް ނޭނގޭ މީހަކު އުޑު ބަޅު ކުރެއްވި ހިސާބުގައި އެބަ ހުރި ހެއްޔެވެ؟

އަނެއްކޮޅުން، ސަރުކާރުން ކުރަމުން އަންނަ ވައްކަންތަކާއި، ހިންގަމުން އަންނަ ކޮރަޕްޝަނާއި، ޖަރީމާ ތަކުގެ ވާހަކަ ދައްކަން ތިބި ނޫސްވެރިންނަށް ވެސް އަހުވަ ދައްކަން ފަށައިފި އެވެ. މިނިވަން ނޫސްވެރިކަމާއި، ޚިޔާލު ފާޅު ކުރުމުގެ މިނިވަންކަން މަރާލައިފި އެވެ. ސަރުކާރާއި، ރައީސް މުޢިއްޒު ހިތްޕުޅާ ނުވާ ގޮތަށް ޚަބަރު ގެނެސްދޭ މީޑިއާ ތަކާއި، ޓީވީ ސްޓޭޝަންތައް "އުލު ބައިންދަން" ރައްޔިތުންގެ މަޖިލީހުން ޤާނޫނެއް ފާސްކޮށް، ތަސްްދީޤު ވެސް ކޮށްފި އެވެ.

މިހެން ދެން ކިޔާނެ ކަމެއް ނެތެވެ. ކުރަން ހުރި ހުރިހާ ކަމެއް މިވެރިން އެ ގެންދަނީ ކުރަމުންނެވެ. ރައްޔިތުންގެ ކަންބޮޑުވުން މި ކަންކަމުގައި އިންތިހާ އަށް އެބަ އޮތެވެ. އެއާއެކު ރައްޔިތުން ދައްކަނީ، ގެއްލުވާލަމުންދާ ޙައްޤުތަކާއި، ފުނޑު ފުނޑުވަމުން އަންނަ ޑިމޮކްރަސީގެ ޙައްޤުގައި އިދިކޮޅު ޕާޓީ އިން ނިކުންނަން ޖެހޭ ވާހަކަ އެވެ. އެ ޕާޓީގެ މާ ބޮޑު ކަމެއް ނެތް ކަމަށް ވެސް ބުނެ އެވެ.

އެކަން އެހެން އޮއްވައި، ރައްޔިތުންގެ ޙައްޤު ހޯދަން ނިކުމެ، ސަރުކާރަށް އަޑު އިއްވަން އިދިކޮޅު ޕާޓީ އިން ނިންމައިފި އެވެ. އެކަން އިއުލާން ކޮށްފި އެވެ. މި ހުކުރު ދުވަހު، ފުރަ މާލޭގެ މަގުތަކަށް ނިކުންނަން ނިންމައި، އެކަމަށް ދަނީ ތައްޔާރު ވަމުންނެވެ. އިދިކޮޅު ޕާޓީގެ ޙަރަކާތް ފެންނަމުން ދަނީ ފޯރި އާއި، ޖޯޝުގަ އެވެ. އެއާއެކު، ސަރުކާރަށް ވެސް އެނގުން ވެއްޖެ އެވެ.

ދެން އޮތީ ރައްޔިތުންގެ ޒިންމާ އެވެ. އިދިކޮޅު ޕާޓީ އިން ނިކުންނަން ނިންމައި، އެއްވާ ދުވަހު ރައްޔިތުންގެ ޙައްޤު ހޯދަން ރައްޔިތުން ނިކުންނަން ޖެހޭނެ އެވެ. ޙައްޤު ހޯދޭނީ، އެ ޙައްޤު ހޯދުމަށް ތިމާ މީހާ ވެސް ނިކުމެގެންނެވެ. ޙައްޤުތައް ގެއްލެމުންދާއިރު، ތިމާ ގޭގައި ތިއްތިކޮށް އިންނަވާފައި، އެހެން މީހުން ނިކުންނަން ގޮވާނެ ކަމެއް ވެސް ނެތެވެ. ތިމާގެ ޒިންމާ ތިމާ އަދާ ކުރަން ޖެހޭނެ އެވެ. ތިމާ ވެސް ނިކުމެ، ޙައްޤުތައް ހޯދަން ވަކާލާތު ކުރާށެވެ. އެއަށް ފަހު، ދެން ތިބި މީހުން ނިކުންނަނަށް ގޮވާށެވެ.

ޙައްޤުތައް ހޯދޭނީ ތިމާ ވެސް ނިކުމެގެންނެެވެ. ޙާލަތު ބަދަލު ކުރަން އެންމެން ވެސް ބޭނުންވެ އެވެ. އެކަމަށް ގޮވާލަމުން ވެސް ގެންދެ އެވެ. އެއާއެކު، ޙާލަތު ބަދަލު ކުރުމަށް މަސައްކަތެއް ވެސް ކުރަން ޖެހޭނެ އެވެ. އެކަމަށް ގަދަ އަޅައި މަސައްކަތް ކުރުމުން، ތިމާމެން ބަދަލު ކުރަން ބޭނުންވާ ޙާލަތު ވެސް ބަދަލު ވާނެ އެވެ. މިއީ އެންމެންގެ ވެސް ޒިންމާއެއްގެ ގޮތުގައި ދެކެން ޖެހެ އެވެ. ހަމައެކަނި އިދިކޮޅު ޕާޓީ ނިކުމެގެން ޙާލަތު ބަދަލެއް ނުވާނެ އެވެ. އެކަމަށް ވެސް ބޭނުން ވަނީ ރައްޔިތުންނެވެ.